हरा-भरा कबाब पौष्टीक व सर्वाना आवडणारा स्नँक्सचा प्रकार आहे. तसेच करायलाही एकदम सोपा आहे. कसा करायचा साहित्य व कृती-

साहित्य :-
* हिरवे मटार २ वाट्या
* पालक एक जुडी
* शिमला मिरची २ नग
* बीन्स १ वाटी
* कांदापात चिरून १ वाटी
* कोथिंबीर १ वाटी
* हिरवी मिरची व आलं पेस्ट १ टीस्पून
* उकडलेले बटाटे २ नग
* ब्रेडक्रम्स २+२ टेस्पून
* काँर्नफ्लोअर २ टेस्पून
* मीठ चवीनुसार
* चाट मसाला १ टीस्पून
* धना-जीरा पावडर १ टीस्पून
* आमचूर पावडर १/२ टीस्पून
* हळद १ टीस्पून
* जीरे १/२ टीस्पून
* तेल १ टीस्पून
* तेल तळण्यासाठी / शॅलोफ्राय साठी गरजेनुसार

कृती :-
प्रथम पालक निवडून स्वच्छ धुवून मोठा मोठा चिरावा व उकळत्या पाण्यात घालून दोन मिनिट ठेवावा. नंतर गरम पाण्यातून काढावा व चाळणीवर ठेवून वरून गार पाणी ओतून निथळत ठेवावे.

आता बाकीच्या भाज्या बारीक चिरून घ्याव्यात.  नंतर गँसवर पँनमधे तेल गरम करून त्यामधे जीरे तडतडवून घ्यावेत. आले -मिरची पेस्ट घालावी व चिरलेल्या भाज्या मटार टाकून साधारण मऊ होईपर्यंत परतावे.  भाज्या मऊ झाल्यावर पालक हाताने हलकेच दाबून पाणी काढून त्यामधे घालावे व कोरडे होईपर्यंत परतावे. नंतर गँस बंद करून सर्व मिश्रण थंड होऊ द्यावे. 

आता थंड झालेले मिश्रण पाणी न घालता मिक्सरमधे भरड वाटावे खूप मऊ पेस्ट करू नये.  वाटलेले मिश्रण बाऊलमधे काढून त्यामधे उकडलेला बटाटा किसून, काँर्नफ्लोअर, थोडे ब्रेडक्रम्स, कोथिंबीर,मीठ  व वर दिलेले सर्व मसाले घालून घट्टसर गोळा तयार करावा. 

आता थोड-थोडेे मिश्रण घेऊन आपल्याला हव्या त्या आकाराचा थोडा चपटा गोळा तयार करावा व ब्रेडक्रम्स मधे घोळवून गरम तेलात तळावा किंवा शॅलोफ्राय करावा.मी शॅलोफ्राय केलेत. 

गरमा-गरम क्रिस्पी कबाब टोमँटो साँस सोबत खायला द्यावे. 

टिप्स: 

* भाज्या परतताना त्यांचा हिरवा रंग टीकून राहीत इतपतच परताव्यात थोड्या क्रंची राहू द्या. 

* मिश्रण सर्व कोरडे झाले पाहीजे.  

* ब्रेडक्रम्स,बटाटे यांचा कमीत-कमी कमी वापर करावा. तरच कबाबला हिरवा रंग येतो. बाहेरच्यासारखे शरीराला हानिकारक कृत्रिम रंग वापरायला नको. 

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.