कोबी मन्चूरीअन हा स्टार्टरचा चायनीज पदार्थ आहे तरूण वर्गाला तर खूप आवडतो. तसा मन्चूरीअन हा पदार्थ पौष्टिकच!बर्याच भाज्या यांत असतात. पण बाहेरचे खायचे म्हणजे ऩक्की त्यात भाज्या आहेत का मैद्याचे गोळे असतील.. ? भाज्या स्वच्छ धुतल्या असतील का? अशा बर्याच शंका मनात येतात.अन् खरच एके ठिकाणी भिजवलेले सोया चंक चक्क कोबी मन्चूरीअन म्हणून दिले होते. म्हणून आज विचार केला की आपल्या हाताने सर्व भाज्या स्वच्छ धुवून,भरपूर भाजी घालून आपणच घरी करावे.. व घरी केलेले असल्याने मनसोक्त खाता येते. तर चला कसे केले ती कृती व साहित्य पहा -
साहित्य :-
मन्चूरीअन बाँलसाठी
• बारीक चिरलेला कोबी २ कप
• कांदापात १ कप
• बारीक चिरून सिमला मिरची अर्धा कप
• बारीक चिरून गाजर अर्धा कप
• आलं-लसूण पेस्ट १ टीस्पून
• हिरवी मिरची पेस्ट १टीस्पून
• लाल तिखट २ टीस्पून
• हळद
• मीठ चवीनुसार
• कोथंबीर
• मैदा पाव कप
• काँर्नफ्लोर पाव कप
• तांदूळ पीठी पाव कप
• तेल तळण्यासाठी
ग्रेव्हीसाठी साहित्य -
• तेल २ टेस्पून
• बारीक चिरलेला कांदा १
• कांदापातीचा मागचा पांढरा कांदा चिरून
• कांदापात बारीक चिरून अर्धी वाटी
• चिरलेला कोबी, गाजर, सिमला प्रत्येकी एक मूठ
• आलं- लसूण बारीक चिरून २ टीस्पून
• सोया सॉस १ टेस्पून
• टोमँटो सॉस १टीस्पून
• व्हीनेगर १/२ टीस्पून
• शेजवान सॉस/चटणी १ टीस्पून
• काँर्नफ्लोर पेस्ट २ टेस्पून
• मीठ चवीनुसार
• वरून सजावटीसाठी मुठभर चिरलेली कांदापात
कृती :-
प्रथम मन्चूरीअन व ग्रेव्हीसाठी लागणाऱ्या भाज्या, कांदा सर्व बारीक चिरून घ्यावे.
आता मन्चूरीअन बाँलसाठी लागणार्‍या सर्व भाज्या एका बाऊलमधे घ्याव्यात व त्यामध्ये वर दिलेले सर्व साहित्य घालून हाताने एकजीव करावे. पाणी अजिबात घालू नये. मिश्रण सैल वाटले तर थोडी तांदूळ पीठी, कॉर्नफ्लोअर अाणखी घालावे. नंतर तयार मिश्रणाचे लहान लहान बॉल सैल हाताने करून भजी प्रमाणे तेलात सोडावेत व खमंग तळून घ्यावे. तळलेले मन्चूरीअन बॉल एका बाजूला ठेवून द्या.
आता ग्रेव्ही करायला घ्यावी. त्यासाठी पँनमध्ये तेल घालावे व गरम झाले की, त्यामध्ये कांदा, चिरलेले आलं- लसूण घालून परतावे. नंतर त्यात भाज्या घालाव्यात व थोड्या परताव्यात. फार मऊ करू नये. आता त्यामध्ये मीठ,सॉस,चटणी, व्हिनेगर घालावे. शेवटी कॉर्नफ्लोअर पेस्ट घालून थोडे पाणी घालून शिजवावे. जास्त पाणी, घालून पातळ करू नये. ग्रेव्ही दाटसरच ठेवावी.
शेवटी तयार ग्रेव्हीमधे आधी तयार केलेले मन्चूरीअन बॉल सोडावेत व व्यवस्थित मिसळून घ्यावेत .
आता तयार कोबी मन्चूरीअन एका सर्व्हिंग डिशमध्ये घालून वरून थोडी चिरलेली कांदापात घालावी व सर्व्ह करावे.
टीप्स :-
* यामध्ये भाज्या आपल्या आवडीने घ्याव्यात.
• शेजवान चटणी आँप्शनल आहे. मी झणझणीतपणासाठी व चटपटीत लागावे यासाठी वापरली आहे.
आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.
