ढोकळा हा एक  गुजराथी नाष्ट्याचा पदार्थ आहे. सर्वानाच खूप आवडतो. तसे पाहिले तर करायला एकदम सोपा... पण परफेक्ट मार्केट सारखा मुलायम,जाळीदार स्पाँंजी ढोकळा बनवायचा तर अचूक प्रमाणात साहित्य व योग्य कृती हवी.नाहीतर कधी मोकळे पिठले तर कधी बेसनाचे गोटे बनतात. म्हणून पुढील पध्दतीने ढोकळा करून बघा. अतिशय मऊ लुसलुशीत, जाळीदार ढोकळा होतो.
साहित्य :-
• बेसन पीठ - २०० ग्रँम(२कप)
•पाणी - १ १/४ कप
•तेल- ३ टे स्पून 

•मीठ -१ टीस्पून
•साखर - ३ टेबल स्पून
•सायट्रीक एसिड - १ टीस्पून
•सोडा -१/२ टीस्पून
•इनो फ्रूटसाँल्ट (निळे रेग्यूलर पॅकेट)-१/२ टीस्पून
•आलं- हिरवी मिरची पेस्ट १टेस्पून
•पिवळा खाद्यरंग /हळद पाव 

फोडणीसाठी साहित्य :-

* तेल - २ टेस्पून
• मोहरी - २ टीस्पून
• तिळ - १ टीस्पून
• कढीपत्ता पाने - १०ते१५
• हिरवी मिरची (उभे काप करून)- २-३
• हिंग पाव टीस्पून
• खोबरे ,कोथंबीर सजावटीसाठी
• साखर -३ टीस्पून
• पाणी -पाउण ते एक कप

कृती :-
प्रथम एका मोठ्या बाऊलमधे पाणी घ्यावे. त्यामध्ये सायट्रीक एसिड,साखर, आलं-मिरची पेस्ट व तेल घालून साखर विरघळेपर्यंत ढवळावे.

आता दुसर्‍या बाऊलमधे चाळलेले बेसनपीठ घेऊन त्यामधे मीठ,पिवळा रंग घालून एकत्र करून घ्यावे.

आता आधी तयार केलेल्या पाण्यामधे हे पीठ थोडे थोडे मिसळावे. गुठळ्या होणार नाहीत याची दक्षता घेऊन बँटर तयार करावे.

नंतर गॅसवर जड पातेल्यात पाणी उकळण्यास ठेवून, तयार बँटरमधे सोडा व इनो मिसळावे. पट्कन एकत्र करून तेलाने ग्रीस केलेल्या भांड्यात घालून १५-२० मिनिट वाफवून घ्यावे.

शेवटी फोडणी तयार करावी व त्यामध्ये पाणी व साखर घालून साखर विरघळवून घ्यावी. फोडणी थोडी कोमट असतानाच गार झालेल्या ढोकळ्यावर घालावी व खोबरे, कोथिंबीर घालून सर्व्ह करावे.

टिप :
• बेसन पीठ एकदम मऊ, मार्केटमध्ये मिळणारे तयार वापरावे.

• ढोकळा वाफण्यासाठी गॅसवर ठेवलेले पाणी उकळायला लागल्यावरच बँटरमधे सोडा व इनो मिसळावे व लगेच वाफण्यासाठी ठेवावे. फक्त सोडा घेणार असाल तर एक टी स्पून घ्यावा.

• ढोकळा तास ते दोन तास पूर्णपणे गार झाल्यावरच कापावा.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.