'इन्स्टंट ढोकळा' हा नाष्ट्याला, डब्यात देण्यासाठी किंवा अचानक कोणी पाहुणे घरी आले असता चहासोबत देण्यासाठी खमंग असा सोपा व झटपट होणारा हा पदार्थ आहे.

साहित्य :-
* बेसन १ कप
* बारीक रवा १ १/२ टेस्पून
* सायट्रीक अँसिड १/२ टीस्पून
* साखर १ टेस्पून
* मीठ १/४ टीस्पून
* इनो फ्रूट साॅल्ट १ टेस्पून
* आलं, मिरची पेस्ट १ टीस्पून
* हळद चिमूटभर
* तेल १ टेस्पून
* पाणी १ कप
* फोडणी साहित्य तेल, हिंग, मोहरी, तिळ, कढीपत्ता

कृती :-
प्रथम गँसवर कुकर पाणी घालून गरम करण्यास ठेवावा. नंतर एका बाऊलमधे बेसन घेऊन त्यामधे इनो सोडून,रवा व इतर सर्व साहित्य मिसळावे.

नंतर गुठळ्या होणार नाहीत याची दक्षता घेत थोडे -थोडे पाणी घालावे व मिश्रण तयार करावे.

सर्वात शेवटी इनो पावडर घालून मिश्रण ढवळावे व झटपट तेलाने ग्रीस केलेल्या थाळीत ओतून ढोकळा स्टँड कुकरमधे ठेवावे. १५-२० मिनिट शिट्टी न लावता वाफवावे.

थंड झाल्यावर बाहेर काढून हींग,मोहरी,तिळ, कढीपत्ता घालून फोडणी करावी व तयार ढोकळ्यावर घालावी.

वरून सजावटीसाठी कोथंबिर घालून खाण्यास द्यावा.

टिप:
* दिलेल्या साहित्यापैकी फक्त कोरडे साहित्य एकत्र करून बरणीत भरून ठेवले तर दोन महीन्यापर्यंत टिकते व ऐनवेळी पटकन् ढोकळा करता येतो.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

सकाळच्या घाईमधे रोज नाष्टा काय करावा हा प्रश्न नेहमीच पडतो.  बरं, नाष्टा पौष्टीक हवे,  झटपट होणारा हवे व सर्वाना आवडणारा पाहीजे. तर या सर्व मापात बसणारा ढोकळा हा उत्तम पदार्थ आहे. याचे प्रीमिक्स तयार करून ठेवले तर सकाळी किंवा संध्याकाळी चहासोबत आपण पट्कन ढोकळा बनवू शकतो.तसैच मुलांना डब्यात ही देता येतो. तर प्रीमिक्स कसे करायचे साहित्य व कृती-👇

साहित्य :-
* तांदुळ १ कप
* चणा डाळ १/२ कप
* उडीद डाळ १/४ कप
* साखर १/ ४ कप
* मीठ १ टेस्पून
* सोडा १ टेस्पून
* सायट्रीक अँसिड १ टेस्पून

ढोकळ्यासाठी साहित्य
* प्रीमिक्स १ कप
* पाणी १ कप
* चिमुटभर हळद
* हिरवी मिरची,आलं पेस्ट १ टीस्पून
* फोडणीसाठी तेल,हिंग,मोहरी,तिळ, कङीपत्ता
* सजावटीसाठी कोथिंबीर

कृती :-
प्रथम तांदुळ व दोन्ही डाळी एकत्र करून मिक्सरमधे पावडर करून घ्यावे.

नंतर मीठ, साखर, सोडा व सायट्रीक अँसिड एकत्र करून मिक्सरमधे पावडर करा.

आता वरील दोन्ही पावडरी एकत्र करून हलकेच एकदा मिक्सरमधून फिरवून घ्यावे.

तयार झालेले प्रीमिक्स हवाबंद डब्यात भरून ठेवावे.  एक महीन्यापर्यंत टिकते.  गरजेनुसार प्रीमिक्स घेऊन ढोकळा बनवावा.

प्रीमिक्स ढोकळा कृती :-
प्रथम ढोकळा कुकरमधे तळाशी गरजेइतके पाणी घालून गरम करण्यास ठेवावे.  ढोकळा पात्राला तेलाचा हात लावून घ्यावा.

आता प्रीमिक्स एका बाऊलमधे घेऊन त्यामधे हळद व मिरची, आलं पेस्ट घालावी व गुठळ्या होणार नाहीत याची दक्षता घेत पाणी घालून ढवळावे.  तयार मिश्रण झटपट ढोकळा पात्रात ओतून, ढोकळा स्टँड कुकरमधे ठेवावे. पंधरा मिनिट वाफवावे.

आता ढोकळा वाफेपर्यंत फोडणी तयार करून ठेवावी.  ढोकळा वाफून तयार झाला की, थोडा थंड झाल्यावर एका थाळीत काढावा, त्यावर फोडणी चमच्याने पसररावी व वरून कोथिंबीर घालून कापून ढोकळा चटणीसोबत खायला द्या.

टिप्स :
* प्रेशर कुकर मधे करणार असाल तर रींग व शिट्टी काढावी.
* डाळी व सोडा, साखर वगेरे सांगितल्याप्रमाणे वेगवेगळेच बारीक करावे, अन्यथा पीठात गुठळ्या होऊ शकतात.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

कारल्याची भाजी म्हटले की सहसा नाक मुरडले जाते. परंतु कारले जरी कडू असले तरी चविला खमंग लागते. व अशा पध्दतीने केले तर कारल्याची भाजी आहे हे सांगावे लागते. कडवडपणा पार निघून जातो. बघा कशी ते साहित्य व कृती-👇

साहित्य :-
* पांढरी कारली पाव किलो
* बेसन पीठ ४ टेस्पून
* दाण्याचे कुट २ टेस्पून
* ओलं खोबरं २ टेस्पून
* गोडा मसाला १ टीस्पून
* लाल मिरचीपूड १ टीस्पून
* मीठ चवीनुसार
* आमचूर पावडर अर्धा टीस्पून
* हळद
* आलं-लसूण हिरवी मिरची पेस्ट १ टीस्पून
* तेल फोडणीसाठी
* हींग चिमूटभर
* मोहरी
* कोथंबिर

कृती :-
प्रथम कारली स्वच्छ धुवून चाकूने किंवा सालकाढण्याने खरडून घ्यावीत.नंतर मधे उभी चीर देऊन आतील बीया काढाव्यात व हळद, मीठाच्या पाण्यात १५ मिनिट टाकून ठेवावीत. तोपर्यंत मसाला तयार करून घ्यावा.

कढईत किंचित तेल घालून त्यावर बेसनपीठ भाजून घ्यावे फक्त पीठाचा कच्चेपणा जावा इतकेच भाजावे.

नंतर  भाजलेल्या पीठामधे सर्व मसाला, दाण्याचे कुट, ओले खोबरे घालून मिश्रण तयार करावे.

आता पाण्यात ठेवलेली कारली पाणी निथळून काढून घ्यावीत व त्यामधे तयार मसाला हाताने दाबून  भरावा.

नंतर भरलेली कारली चाळणीवर ठेवून वाफवून घ्यावीत.

नंतर बोटाने दाबून कारली मऊ झालीत का तपासून पहावे व नंतर कढईमधे फोडणीसाठी तेल गरम करावे व हींग-मोहरीची फोडणी करून कारली त्यामधे घालून थोडे परतावे. तेल सुटायला लागले की गँस बंद करावा.

तयार भाजी पोळी किंवा भाकरी सोबत खायला द्यावी. सुकी असल्याने डब्यात देण्यासाठी पण सोयीची आहे. आदले दिवशी भरून, वाफवून फ्रिजमधे ठेवावी. दुसरे दिवशी सकाळी पट्कन फोडणी करून परतावी.

आपल्या प्रतिसादाने नव-नविन पदार्थ करण्यास प्रेरणा मिळते. आपल्या मौल्यवान सुचना व अभिप्राय, आम्हाला ज़रूर द्या.

कोबीची भाजी त्याच्या उग्र वासामुळे बर्याच जणाना आवडत नाही. पण पुढील पध्दतीने त्याच कोबीच्या वड्या केल्या तर आवडीने खाल्या जातात. कशा केल्या साहित्य व कृती-👇

साहित्य:- 
१) किसलेला कोबी अर्धा किलो (४ वाट्या ) 
२)  डाळीचे पीठ दिङ ते दोन वाटी 
3) तांदूळ पीठ एक टे स्पून 
४) कोथिबीर,आल लसूण मिरची पेस्ट 
५) आमसूर पावडर किंवा लिंबूरस आंबटपणासाठी
६) हिंग मोहरी तिळ कढीपत्ता व तेल फोङणीसाठी 
७) मीठ,चिमुटभर साखर, धना जिरा पावङर
८) पाणी गरजेनुसार

कृती:- प्रथम किसलेला कोबी एका पसरट भांङ्यामधे घेऊन त्यामधे  वरील पीठे व म मसाला घालून व्यवस्थित कालवावे.जरूरीएवढे पाणी घालून थोडे सैलसर पीठ भिजवावे.

नंतर ढोकळा पात्राला तेलाचा हात लावून त्यामधे तयार पीठ ओतावे  व वाफवून घ्यावे.

आता वाफवलेले वड्या ढोकळ्याप्रमाणे कापा व हिंग,मोहरी,तिळ कढीपत्ता घालून फोडणी करून त्यावर टाकून थोडे परतावे.

तयार वड्या जेवणात साईड डिश म्हणून किंवा चहासोबत खायला द्या.

टीप :- आंबटपणासाठी चिंचेचा कोळ किंवा आंबट ताकही चालते. कोबीमधे आंबट काही पदार्थ व चिमूटभर साखर घातल्याने उग्र वास कमी होतो.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

आजकालच्या मुलांना नेहमीच पिझ्झा, बर्गर, वडा-पाव अशा प्रकारचे बाहेरचे जिभेला चटपटीत पदार्थ खुणावत असतात. बरं घरीच करून द्यावेत तर बराच खटाटोप करावा लागतो. अशा पदार्थाना लागणारे निरनिराळे साँसेस्,चीज नेहमीच घरात उपलब्ध असतीलच असे नाही. तर मग घरातच उपलब्ध साहीत्यात पण त्या चविचा पदार्थ कसा बनवावा ? ते पहा. मी व्हेज बर्गर बनवलाय पण त्यामधे मेयाेनिज साँस नाही. त्याऐवजी घरचेच बटर व टोमँटो साँस वापरलाय. तसेच लेट्यूस ची पाने नाहीत तर,कोबीची पाने ब्लांच करून वापरली. तसेच चविसाठी चाट मसाला, पुदीना असे वापरले. पण काय सांगू, अफलातून टेस्टी बर्गर बनला. विकतचा सुध्दा इतका चवदार लागत नाही. तर बघा कसा केला, साहित्य व कृती :-

साहीत्य :-
* तिळ लावलेले बर्गर बन 2 नग
* व्हेज ओट्स कटलेट 2 *
* कोबीची पाने 2
* कांदा गोल काप 4
* टोमँटो गोल काप 2
* शिमला मिरची गोल काप 2
* चीज क्यूब 1
* चाट मसाला पाव चमचा
* पुदीना चार-पांच पाने
* टोमँटो साँस
* बटर

* http://swadanna.blogspot.in/2015/07/veg-oats-cutlet.html?m=1

कृती :-

प्रथम कटलेट्स तयार करून घ्या. कृती साठी वर लिंक दिली आहे. कटलेट आपल्या आवडीचे म्हणजे, आलू कटलेट, बीटरूट कटलेट,व्हेज कटलेट असे कोणत्याही प्रकारचे वापरले तरी चालते. मी व्हेज ओट्स कटलेट वापरले. फक्त कटलेटचा आकार नेहमीच्या कटलेटपेक्षा मोठा म्हणजे बनच्या आकाराचा मोठा ठेवा.

आता बर्गर बन घ्या. उघडा व त्याच्या एका भागावर बटर लावा. व दुसर्या भागावर टोमँटो साँस लावा. नंतर बटर लावलेल्या भागावर कोबीचे ब्लांच केलेले पान वाटीने गोल कापून ठेवा. आता त्यावर तयार कटलेट ठेवा. नंतर त्यावर कांदा, टोमँटो, शिमला मिरचीचे काप,पुदीना पान ठेवा. चाट मसाला भुरभूरा. शेवटी वरून चीज किसून टाका व बनचा आधिच साँस लावून ठेवलेला दुसरा भाग वर ठेवा.

यम्मी यम्मी बर्गर तयार! मुलांना खायला द्या. मुले एकदम खुष होतील. व मुले खुष तर आपण खुष. तूम्हीही नक्की करून बघा.व कसे झाले ते सांगायला विसरू नका.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

सुंदल हा एक कर्नाटकी पदार्थ आहे.ही पाककृती माझे आवडते शेफ श्री विष्णू मनोहर यानी Colors t v वरील "मेजवानी" या खाद्य  कार्यक्रमामधे दाखविलेली आहे. मी पाहीली तर एकदम सोपी व सहज करता येण्यासारखी वाटली. मुख्य म्हणजे घरातल्या घरात जे उपलब्ध साहीत्य असते त्यात तयार होणारी असल्याने मी पट्कन करून पाहीली. आवडली!  खूप झटपट व चवदार बनली. तसेच पोटभरीची पण आहे. मुलांना शाळेतून घरी आल्यावर संध्याकाळच्या नाष्टाला घ्यायला छान आहे. कसे करायचे कृती व साहित्य -

साहित्य :-

* तांदुळाचे पीठ 1 वाटी
* पाणी 1 वाटी
* मीठ, साखर चविनुसार
* खोवलेलेे ओलं खोबर अर्धी वाटी
* तेल 2 टेस्पून
* फोडणी साहित्य
* उडीद डाळ 1 टीस्पून
* कढीपत्ता
* कोथंबिर
* लिंबू ऐच्छिक

कृती :-

प्रथम पाणी गरम करण्यास ठेवा. त्यामधे चिमूटभर मीठ व थोड़े तेल टाका. उकळी आली की, पीठ घाला. झार्याच्या टोकाने हलवा. गुठळी न होउ देता, उकडीच्या मोदक सारखी उक्कड शिजवा. पंधरा मिनिट झाकून ठेवा.

आता तेल पाण्याच्या हाताने उक्कड नीट मळून घ्या व सुपारी सारख्या लहान गोळ्या करा.

आता चाळंणीवर गोळ्या ठेउन मोदका सारखे 10 मी. वाफवा.

नंतर कढईत तेल घाला व फोडणी करा. फोडणी मघे उडद डाळ गुलाबी होईपर्यंत तळा. आता कढीपत्ता व ओले खोबर घालून थोडे परता.मीठ व साखर चवीला घाला. थोडे लिंबू पिळा.

शेवटी वाफवलेल्या गोळ्या घालून, सर्व व्यवस्थित हलवा व परत पाच मिनिट वाफवा.

आता तयार सुंदल डिश मधे काढून वर कोथंबिर  घालून गरमा-गरम खायला द्या.

आपल्या प्रतिसादाने नविन गोष्टी करण्यास प्रेरणा मिळते.आपल्या मौल्यवान सूचना व अभिप्राय, आम्हाला ज़रूर द्या.

या पदार्थाचे नांव वाचून तुम्हाला हा काही गुजरात, मध्यप्रदेश तिकडचा पदार्थ असण्याची शक्यता वाटली असणार. पण खरं सांगू हा आपला पारंपारिक असा, जूनाच मराठी पदार्थ आहे ,' वाटली डाळ' ! यालाच कांहीजण 'खमंग डाळ' तर कोणी, ' डाळीचे तिखट' तर कुठे 'मोकळे बेसन' म्हणतात. परवा सहज टीव्ही लावला तर खाद्यपदार्थाचा कार्यक्रम चालू होता. साहीत्य जरा सुटसूटीत वाटले ...नाव पण जरा वेगळे वाटले. हा गुजराती पदार्थ आहे असे सांगितले.. म्हणून पाहीला तर आपली वाटली डाळच की हो। फक्त सर्वात शेवटी देतेवेळी वरून खोबरे-कोथंबिरीच्या जोडीला वरून बारिक नारलाॅन शेव भुरभूरली, झाली 'शेव अमिरी' ! मग वाटले सगळ्या प्रांतात पदार्थ थोड्याफार फरकाने सारखेच असतात, फक्त नांवे वेगवेगळी असतात. पण ही 'वाटली डाळ' तरी कशी करायची पहा !

साहीत्य :-

1) दोन-तीन तास भिजलेली चणा डाळ 2 वाट्या
2) लसूण, हिरवी मिरची आवडीप्रमाणे( लसूण ऐच्छीक)
3) मीठ चवीनुसार
4) साखर अर्धा टीस्पून ( अवश्य घ्यावी कारण ही डाळ थोडी उग्रट असती )
5) वरून घालण्यासाठी ओलं खोबरं , कोथिंबीर व बारिक शेव
6) लिंबू आवडत असल्यास
7) तेल मोठे दोन टेस्पून
8) फोडणीसाठी हिंग, जीरे,मोहरी, कडीपत्ता, हळद

कृती :-

सर्वात आधी भिजलेली चणा डाळ चाळणीवर ओतून पाणी काढून , डाळ निथळून घ्यावी.

आता निथळलेली डाळ , मिरची-लसूण सह भरड वाटून घ्यावी.

नंतर वाटलेली डाळ सरळ कुकरमधे ठेवून एक शिट्टी काढून वाफवावी.

थोड्या वेळाने थंड झाल्यावर ताटात काढून हाताने डाळ मोकळी करावी. कारण शिजल्यावर घट्ट ढिकळा तयार होतो.

आता कढईत तेल गरम करून सर्व फोडणीचे साहीत्य व कडीपत्ता घालून ,चांगली दमदमीत फोडणी करावी. नंतर त्यात मोकळी केलेली डाळ घालून मीठ व साखर घालून परतावे. एक वाफ येऊ द्यावी. पाच मिनीटानी गॅस बंद करा

आता डिशमधे काढून खायला द्या. देताना वरून लिंबू, खोबरे, कोथंबीर व बारीक शेव घाला.

टिप :- कुकरमधे न वाफवता डायरेक्ट फोडणीत डाळ टाकून पण वाफवली तरी चालते पण खाली लागण्याची शक्यता असते. व तेल थोडे अजून जास्त लागते.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

साहीत्य :-

1) कोथिंबिर 2 वाट्या (धुवून बारीक चिरलेली)
2) डाळीचे पिठ 1वाटी
3) बारीक रवा 1/4 वाटी
4) मिठ चवीनुसार
5) मिरची-लसुण पेस्ट
6) हींग,तिळ,हळद
7) तेल एक टेबलस्पून
8) दही दोन टेस्पून
9) पाणी
10) इनो फ्रुट साॅल्ट 3/4 टीस्पून

कृती :-

प्रथम कढईमध्ये तेल तापवून त्यात हींग,तिळ हळद घालून फोडणी करावी व त्यामधे चिरलेली कोथिंबिर टाकावी.थोडी परतून वाफवावी आणि गॅस बंद करावा.

आता एका बाऊलमध्ये डाळीचे पिठ,रवा घ्यावे.
त्यामधे मिरची-लसूण पेस्ट व मिठ घालावे.दही घालावे व पाणी घालून नीट मिक्स करावे.

आता वर वाफवलेली कोथिंबीर घालावी व गरज वाटल्यास अजून थोडे पाणी घालून भजीच्या पिठा इतपत सैल मिश्रण तयार करावे.

आता आधि ढोकळा स्टॅडच्या थाळीला तेलाचा हात लावून घ्यावा. कुकर मधे तळाला पाणी घालून गरम करण्यास ठेवा.

नंतर सगळ्यात शेवटी तयार मिश्रणात इनो पावडर घालून एकाच दिशेने हलवून मिक्स करावे व झटपट थाळीत ओतावे आणि शिट्टी न लावता पंधरा मिनिट वाफण्यास ठेवावे.

थंड झाल्यावर सुरीने वड्या कापाव्यात व खाण्यास द्यावे.

टीप :- आपल्याला जास्त चटपटीत आवडत असेल तर अजून वरून फोडणी तयार करून घालावी.नाहीतर तसेसुध्दा छान लागते.