"मँगो पुडींग" एक डेजर्ट चा प्रकार आहे. सहज सोपा व करायला सुटसूटीत आहे. सिझनमधे जेवणात रोज आमरस असतोच परंतु जेवणानंतर पण आंब्याचाच पदार्थ खायचा असेल तर असे "मँगो पुडींग" तयार करा. याआधी मी मँगो आईसक्रीम, मँगो कुल्फी, मँगो हलवा, मँगो फ्रूटी मँगो मस्तानी, मँगो केक मँगो बर्फी अशा विविध आंब्याच्या पदार्थाची कृती दिली आहेच. आज मँगो पुडींग कसे करायचे साहित्य व कृती 👇

साहित्य :-
* मँगो पल्प २ आंब्याचा
* दूध १/२ लिटर
* कंडेन्सड् मिल्क अर्धा कप
* साखर २ टेस्पून
* आगार आगार /चायना ग्रास २ टेस्पून
* सजावटीसाठी चेरी, आंब्याचे क्यूब

कृती :-
प्रथम एकीकडे आगार आगार गरम पाण्यात पारदर्शक होईपर्यंत ढवळून विरघळून घ्यावे.

नंतर दूध गरम करून त्यामधे साखर घालून विरघळून घ्यावी. (दूध उकळण्यास आवश्यकता नाही)

आता आंब्याचे साल काढून तुकडे करून घ्यावेत. यातील चार-सहा तुकडे सजावटीसाठी ठेवावेत व राहीलेले तुकडे मिक्सरमधे घालून मँगो पल्प तयार करून घ्यावा.

शेवटी दूधामधे कंडेन्सड् मिल्क, मँगो पल्प व आगार -आगार घालून, सर्व साहित्य एकत्रीत ढवळून घ्यावे व लहान -लहान बाऊलमधे ओतून फ्रिजमधे ३-४ तास सेट होण्यासाठी ठेवावे.

जेवणानंतर मस्त थंडगार गोड 'मँगो पुडींग ' खायला द्यावे. खायला देताना वरून रेड चेरी व मँगो क्यूब घालावेत. आवडत असल्यास वरून अजून थोडे कंडेन्सड् मिल्क किवा फ्रेश क्रिम अथवा वँनिला आईसक्रीम घालावे.

टिप :
* आंबा एकदम गोड असेल व कंडेन्सड् मिल्क गोडच असते तर साखर नाही वापरली तरी चालते. अथवा आवडीनुसार कमी-जास्त करावी.
* मँगो पल्प तयार करताना आंबा जर केशरयुक्त असेल तर, पल्प गाळणीतून गाळून घ्यावा. अन्यथा पुडींग गुळगुळीत, मऊ न बनता खाताना तोंडामध्ये धागे येतात.

आपल्या प्रतिसादाने नव-नविन पदार्थ करण्यास प्रेरणा मिळते. आपल्या मौल्यवान सुचना व अभिप्राय, आम्हाला ज़रूर द्या.

उन्हाळा म्हटले की सहाजिकच थंडगार कांही प्यावे वाटते, परंतु बाजारी सरबते किंवा ज्यूस कृत्रिम रंग, टिकण्यासाठी प्रिझर्वेटीव वापरलेली असतात. त्यापेक्षा आपण घरीच निरनिराळ्या ताज्या फळांची सरबते, ज्यूस सहज व पट्कन बनवू शकतो. अशी घरीच बनविलेले सरबत/ज्यूस आरोग्याच्या दृष्टीनेही उत्तम. तर आज ताजा मस्त थंडगार कलिंगड -डाळींब ज्यूस बनवू साहित्य व कृती-👇

साहित्य :-
* कलिंगडाच्या साल काढून केलेल्या चौकोनी फोडी २ मोठ्या वाट्या
* डाळींबाचे दाणे २ वाट्या
* साखर १ टेस्पून (ऐच्छीक)
* सैंधव मीठ चिमूटभर

कृती :-
प्रथम कलिंगडाच्या फोडी व डाळींबाचे दाणे मिक्सरमधे हलकेच फिरवून घ्यावेत. साखर घालायची असल्यास आताच घालावी.

नंतर  गाळणीने गाळून घ्यावे. चोथ्यामधे एक ग्लास थंडगार पाणी घालून व्यवस्थित चमच्याने चोथा दाबून रस काढून घ्यावा.

आता तयार ज्यूस ग्लास मधे घालून चिमुटभर सैंधव मीठ व बर्फाचा खडा (ऐच्छीक) घालून प्यायला द्या.

टिप :-
*मिक्सरमधून फिरवताना फार वेळ फिरवू नये. हलकेच दोन -तिनदा चालू-बंद करत वाटावे. जेणेकरून बीया वाटल्या जाऊ नयेत.
* फुडप्रोसेसर ज्यूसर असेल तर त्यातच वाटावे. गाळायची गरज उरत नाही.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

 सुट्टी लागली म्हणले की मुले दिवसभर घरात असतात. त्यामुळे त्यांना ठराविक वेळी नुसते जेवण देऊन भागत नाही व ती नीटसे जेवत पण नाहीत.कारण सारे लक्ष खेळणे व मस्ती यातच असते. त्यामुळे सतत काही ना काही वरचे खायला लागते.मग सारखे वेगवेगळे काय द्यावे ?हा प्रश्नच असतो. मग अशावेळी झटपट होणारे व पौष्टीक असे 'चाॅकलेट बाॅल' ट्राय करा.
ही रेसिपी करण्यासाठी गॅस ची अजिबात गरज पडत नाही. कसे करायचे पहा-

साहीत्य :-

1) कोको पावडर 1/2 वाटी
2) मिल्क पावडर 1वाटी
3) पाच-सहा मारी बिस्कीट्स चा चूरा 4 टेस्पून
4) काजू,बदाम,अक्रोड ची भरड 2 टेस्पून
5) बटर 1 टीस्पून
6) गरम दूध गरजेनुसार (साधारण पाव कप लागेल)
7) डेसिकेटेड कोकोनट 2 टेस्पून

कृती :-

     प्रथम मारी बिस्कीट्स मिक्सर मधून चुरा करून घ्यावित.

आता एका बाऊल मधे तयार चुरा व कोको पावडर,मिल्क पाडर, ड्रायफ्रूट पावडर आणि बटर सर्व एकत्र करून हातानेच एकसारखे करावे.

नंतर एका वाटीत गरम दूध घेऊन अंदाज घेत घेत वरील मिश्रणात घालावे . कणिकेसारखा गोळा झाला की थांबावे.

तयार मिश्रणाचे टेनिस बाॅल च्या आकाराचे लहान-लहान गोळे करून डेसिकेटेड कोकोनट मध्ये घोळवावेत.

चाॅकलेट बाॅल तयार ! मुलांना पाच वाजताच्या दूधासोबत द्या. किवा नुसतेच द्या तरी चालते दूध ,बिस्कीटे ,ड्रायफ्रूट्स सर्वच पोटात जाते. आणि थोडा वेगळा प्रकार असल्याने व पट्कन हातात घेऊन पळण्यासारखा असल्याने लगेच पसंतीस उतरतो.व आपल्याला करणेसही सोपा !!

बर्याच वेळा मुले दूध प्यायचा कंटाळा करतात. त्याना रोज-रोज एकाच चवीचे दूध नको असते.तर त्याना अशा वेळी निरनिराळे फळांचे शेक करून द्यावेत.जसे की अॅपल शेक,मॅगो शेक,चिकू शेक तसेच आज मी करणार आहे स्ट्राबेरी मिल्क शेक !म्हणजे दूध ही पोटात जाते व फळे पण ! कसा करायचा पहा...

साहीत्य :-

1) स्ट्राॅबेरी 15-20
2) स्ट्राॅबेरी क्रश दोन टे.स्पून
3) स्ट्राबेरी इसेंन्स पाव टीस्पून
4) गायीचे अथवा टोन्ड मिल्क अर्धा लिटर
5) साखर 2 टेस्पून (गरज वाटली तर वापरावी)

कृती:-

       प्रथम स्ट्राॅबेरी स्वच्छ धुवून काप करून घ्याव्यात.

नंतर हे काप,साखर, क्रश सर्व एकत्र करून अर्धा कप दूध घालून ब्लेंड करावे. चांगले एकजीव झाले की राहीलेले दूध व इसेंन्स घालून परत थोडे ब्लेडरने घुसळावे.मस्त गुलाबी लालसर शेक तयार !

थंडगार सर्व्ह करा.

टीप :- स्ट्राॅबेरी छान पिकलेल्या व गोड असतील तर साखर वापरण्याची गरज नाही.

दूध कच्चे व थंड वापरावे.