इडली ढोकळा (Idly Dhokala)

नेहमी तेच ते पदार्थ खाउन कंटाळा आला की, काहीतरी नविन खावे वाटते. पण ते पौष्टिक ही पाहीजे, तेलकट नको झटपट होणारे ही पाहीजे,  मग काय एखाद्या जून्याच पदार्थातील घटक थोडे बदलायचे आकार बदलायचा व नविन पदार्थ करायचा. तर हा इडली ढोकळा तसाच पदार्थ आहे कसा केला साहीत्य व कृती,

साहित्य :-
* डाळीचे पीठ २ वाट्या
* रवा १ वाटी
* आंबट दही किंवा ताक १ वाटी
* पाणी गरजेनुसार
* मीठ चविनूसार
* साखर चिमूटभर
* हींग चिमूटभर
* हळद
* हिरवी मिरची व आल्याची पेस्ट १टीस्पून
* इनो फ्रूटसाँल्ट दीड ११/२ टीस्पून
* कढीपत्ता, कोथिंबिर व एक हिरवी मिरची
* फोडणीसाठी तेल व हींग, मोहरी, तिळ

कृती :-

प्रथम एका पसरट भांड्यात डाळीचे पीठ व रवा एकत्र करावा. नंतर त्यामधे वर दिल्यापैकी इनो व फोडणीचे साहीत्य सोडून बाकी सर्व घाला व गुठळ्या न होऊ देता एकजीव करावे. १५ मिनिट झाकून ठेवा.

पंधरा मिनिटा नंतर गरज वाटली तर अजून थोडे पाणी घालावे. पीठ नेहमीच्या इडली मिश्रणाइतकेच सैल ठेवावे. जास्त पातळ ठेवले तर इडली फुगत नाही व घट्ट ठेवले तर इडल्या कडक होतात. शेवटी इनो पावडर घालावी व परत एकदा मिश्रण हलवावे आणि तेल लावलेल्या इडली पात्रात भरावे.

इडली पात्र प्रेशरकुकर मधे ठेउन (शिट्टी काढून) इडल्या दहा मिनिट वाफवाव्यात. ओवनमधे वाफवणार असाल तर हाय टेम्परेचरला ३ मिनिट वाफवावे.

आता इडल्या शिजेपर्यंत तेल तापवून फोडणी करून ठेवा. फोडणीमधे हींग मोहरी तिळ आधि घाला व तडतडल्यावर उभी चिरलेली मिरची व कढीपत्ता घाला.

आता तयार इडल्या डिशमधे काढा. वरून फोडणी व कोथंबिर घाला. गरमा-गरम खायला द्या. आवडीनुसार चटणी लाल, हिरवी चटणी किंवा साँस काहीही घ्या अथवा नुसतेच खा. कसेही चांगलेच लागते. तूम्हीही नक्की करून बघा.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.