पाईनँपल हलवा म्हणजे तेच ते हो, आपला अननसाचा शिरा! तसे पाहिले तर करायला एकदम सोपा. पण नेहमीच्या शिर्यापेक्षा थोडा वेगळा भन्नाट आंबट -गोड चवीचा,स्वाद बदल म्हणून मस्त लागतो. अन्  दुसरे म्हणजे पाहुणे मंडळी घरी आली तर वेगळे काहीतरी केले म्हणून ते खूष. तर कसा केला ते साहित्य व कृती पहा.

साहित्य :
• रवा - १ कप
• साखर - १ १/२ कप
• अननसाचे बारीक तुकडे - १ कप
• अननसाचा गर - १ कप
• साजुक तूप - १ कप
• गरम पाणी - २ कप
• चिमुटभर मीठ
• वेलची पावडर - १टीस्पून
• काजू,बेदाणे

कृती :-
प्रथम रवा साजुक तुपावर खमंग भाजून घ्यावा.

ऩंतर त्यामधे सावकाशपणे गरम पाणी घालून दोन मिनीट वाफवावा म्हणजे रवा फुलतो.

नंतर त्यामधे साखर,मीठ,अननसाचा गर व तुकडे घालून साखर विरघळेपर्यंत सतत ढवळत रहावे. साखर विरघळली की,कडेने थोडे तूप सोडून परत दोन मिनिटे वाफ काढावी.
             अननसाचा गर व लहान तुकडे

शेवटी वेलचीपूड व काजू, बेदाणे घालून गरमा-गरम लुसलुशीत 'पाईनँपल हलवा' डीशमधून खायला द्यावा व प्रतिसादाची वाट पहावी.  'व्वा मस्तच!' असे उद्गगार नक्कीच कानी पडतील. तुम्हीही नक्की करून बघा व प्रतिक्रिया द्यायला विसरु नका.

टिप्स :
• अननस छान पिकलेला मधूर वासाचा आणावा.
• हलव्यामधे पाण्याच्या जागी दुधाचा वापर अजिबात करू नये.
• तूप दिलेल्या प्रमाणातच वापरावे. नाहीतर हलवा मोकळा, लुसलुशीत होण्याऐवजी चिकट होतो.
• हलव्याचा गडद पिवळा रंग हवे असल्यास केशर किंवा खाद्यरंग वापरावा. मी नाही वापरला. ऐच्छिक आहे.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.