बाॅम्बे खारे शेंगदाणे ( Bpmbay Salted Peanut)

मला काय किवा घरातसुध्दा सर्वाना खारे शेंगदाणे अतिशय आवडतात. खारे म्हणजे नुसते साधे मीठ लावून भाजलेले खारे शेंगदाणे नव्हे बरं का ! हे विशिष्ट पध्दतीने भाजलेले असतात व छान सोललेले गुलाबी रंगाचेअसतात. हे 'बाॅम्बे शेंगदाणे' म्हणून पण ओळखले जातात. येता-जाता तोंडात टाकायला, मुलांना खिशात भरायला छानच लागतात. मी असेच माझ्या भावाबरोबर  बोलत होते.तोच तो एकदम बोलला ,' अगं एकदम सोपे आहेत ! ' परवाच माझा एक दोस्त की ज्याच्या शेंगदाणे,पोहे ,चिरमुरे असे तयार करण्याच्या भट्ट्या आहेत.त्याचा तो व्यवसायच आहे.त्याने मला असेच बोलता बोलता बाॅम्बे शेंगदाणे कसे करतात ते सांगितलेय व मी करून पाहीलेत तू पण कर सांगतो तसे.मी पडत्या फळाची आज्ञा !  लगेच शेंगदाणे भिजत टाकले व केले छानच जमले अगदी हुबेहूब बाहेरून आणतो तसे जमले. कसे केले पहा !

साहीत्य :-

* टपोरे व वेचलेले शेंगदाणे २५० ग्रॅम
* मीठ १ टीस्पून
* पाणी शेंगदाणे भिजतील इतकेच

कृती :-

प्रथम पाणी एका बाऊलमधे घ्यावे व त्यात मीठ टाकून विरघळावावे. व त्यात शेंगदाणे भिजत टाकावेत. पाणी बेताचेच ठेवावे म्हणजे खारे पाणी पूर्ण शेंगदाणे ओढून घेतात व शेंगदाण्याना छान खारी चव येते. किमान ४-५ तास भिजू द्यावेत.

आता शेंगदाणे एका चाळणीवर काढा. शिल्लक पाणी पूर्ण निथळू द्यावे.नंतर एका स्वच्छ कपड्यावर अर्धा तास पसरावेत व सुकू द्यावेत.

आता हे शेंगदाणे मायक्रोवेव ओवनला मायक्रो मोडला हाय टेपरेचरला ७-८ मि.भाजावेत.मधेच एकदा चेक करावे हलवून. वेळ कमी-अधिक लागू शकतो.कारण प्रत्येक कंपनीनुसार ओवनचे तापमान काही प्रमाणात वेगवेगळे असू शकते.

थंड झाले की सोलून स्वच्छ करून हवाबंद बरणीमधे भरून ठेवा. खुसखूषीत खमंग 'बाॅम्बे शेंगदाणे' तयार ! वाचून झाले की तुम्हीपण पट्कन करून बघा,बरं !ओवन नसेल तरी नेहमीच्या वापरातल्या पण जाड बुडाच्या कढईत सुध्दा वाळू घालून भाजता येतात.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.