एखादे दिवशी त्याच त्या भाज्या खाऊन कंटाळा येतो किंवा भाजी आणायचा कंटाळा करतो व अचानक पाहूणे येतात अशा वेळी झटपट व चमचमित असा हा भाजीचा प्रकार उत्तम आहे.तसे पाहीले तर ही भाजी खास करून गुजराती मंडळींची खासियत ! पण आजकाल सर्वजणच करतात.अगदी एखाद्या जेवणाच्या धाब्यावर सुध्दा असते.कोणी गाठीया शेव वापरतात तर कोणी लाल तिखट शेव वापरतात.तर अशी ही शेव भाजी कशी बनवायची पाहू.

साहीत्य :-

* लाल/गाठीया शेव एक वाटी
* कांदा एक
* लाल टोमॅटो एक
* आल-लसूण पेस्ट एक चमचा
* धना-जिरा पावडर अर्धा चमचा
* गरम मसाला एक चमचा
* मिरची पावडर
* मिठ
* तेल
* फोडणीचे साहीत्य
* पाणी
* कोथंबिर

कृती :-

        प्रथम कांदा,आले-लसूण पेस्ट तयार करावी.नंतर पातेल्यात तेल घालून फोडणी करून त्यामध्ये तयार पेस्ट घालावी व परतावी.नंतर त्यावर टोमॅटो पेस्ट घालून तेल सुटेपर्यंत परतावे.

आता दोन वाट्या पाणी घाला.गरम मसाला,धना-जिरा पावडर, तिखट,मिठ सर्व घालावे व शेवटी शेव घालून एक उकळी काढावी .

तयार भाजीमधे वरून कोथंबिर घालून व आवडत असेल जोडीला कांदा-लिंबू ठेवून सर्व्ह करावे.भाकरी,पोळी अथवा तंदूर रोटी बरोबर छान लागते.

टीप :-
ही माजी थोडी रस्सादारच छान लागते.पण सूकी पाहीजे असल्यास पाणी कमी घाला.

तसेच जास्त आधि करून ठेवल्यास पाणी शोषले जाऊन भाजी घट्ट व रद्दा होते.म्हणून आयत्यावेळीच करावी.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

सरसो म्हणजे मोहरी,मोहरीची पालाभाजी ! याची भाजी म्हणजे,"सरसों का साग व मकई की रोटी.ही "पंजाब,दिल्ली व उत्तरप्रदेशांतील पश्मिमेकडील भागात फार लोकप्रिय आहे. साधारण हीवाळ्याच्या दिवसात आपल्याकडे मंडई मध्ये एखाद दुसर्या भाजीवाल्याकडे मिळते.सर्रास मेथी पालका प्रमाणे मिळत नाही.तरीपण मिळाली तर जरूर करा.खूप चवदार लागते.या भाजीच्या जोडीला मक्कयाची गरमा-गरम भाकरी व मस्त वर लोण्याचा गोळा ! व्वा क्या बात है तर चला कशी करायची भाजी ते पाहू.

साहीत्य :-

1) मोहरीची भाजी निवडून,धुवून एक जूडी
2) पालकाची भाजी निवडून,धुवून एक जूडी
3) कांदा एक मोठा
4) पिकलेले टोमॅटो मध्यम आकाराचे 2 नग
5) हिरवि मिरची,आले,लसूण पेस्ट एक चमचा
6) मक्का पिठ 2 टेबलस्पून
7) मिठ चवीनुसार
8) तेल/बटर फोडणीसाठी

कृती :-

      सर्वात आधि दोन्ही भाज्या चिरून घेउन एका पातेलीमधे पाणी घालून वाफविण्यास ठेवाव्यात.

भाज्या उकडेपर्यंत कांदा बारिक चिरून घ्यावा.टोमॅटोची प्यूरी करून घ्यावी.मिरची आले,लसूण पेस्ट तयार करावी.

आता गॅस बंद करावा व भाजी चाळणीवर ओतून त्यातील जादाचे पाणी काढून टाकावे.(शक्यतो मापातच पाणी घालावे म्हणजे काढावे लागणार नाही व जीवनसत्वे जाणार नाहीत) आणी भाजी थोडी ब्लेंडरला घोटून घ्यावी.फार गुळगूळीत नको.

आता गॅसवर पॅन गरम करण्यास ठेवा व बटर घाला.गरम झाले की मोहरी हींगाची छान फोडणी करा त्यात हळद घाला.नंतर कांदा टाका व परता .कांदा गुलाबी रंगाचा झाला की टोमॅटी प्यूरी,आले-लसूण,मिरची पेस्ट घाला.तेल सुटेपर्यत परतत रहा.

आता शेवटी घोटलेल्य भाज्या टाका व मक्कयाचे पिठ घालून नीट हलवा गुठळ्या राहू देउ नका.शेवटी मीठ घालावे व पाच मि.शिजू द्यावे.

पाच मिनीटानी गॅस बंद करावा व भाजी सर्व्हींग बाऊल मधे काढावी.खमंग भाजी तयार ! गरमा-गरम मक्कयाच्या भाकरीसोबत वाढावी.

थंडीच्या मोसमात तर असा मेनू खूपच चवदार लागतो.त्यात मोहरी गुणधर्माने उष्ण व मक्का पचायला हलका व गोड असल्याने हीवाळ्यात उत्तम.

टीप ;- या मोहरीच्या भाजीमध्ये जोडीला "बथुआ" नावाची भाजी उ.प्रदेशमधे वापरतात.पण ती आपल्याकडे सहसा मिळत नाही.म्हणून पालक वापरले तरी चालते.नुसती मोहरीची भाजी पण होते पण मोहरी उग्र असल्याने चवीला उग्र लागते तसेच थोडी चोथटपण होते. शक्यतो बटरवरच करावी. 

पालक ही एक गडद हिरव्या रंगाची,रूंद पानाची थंड व पौष्टीक भाजी आहे.पालकामधे अॅमिनो अॅसिड,फाॅलीक अॅसिड,लोह व विटामिन ' ए ' असते.या भाजीतून आपल्याला,मांस,अंडी मासे ,कोंबडी या पासून जेवढी प्रथिने मिळतात तेवढीच प्रथिने मिळतात. पालक बर्याच प्रकारानी आपल्या आहारात वापरता येतो.उदा . भाजी , सूप ,कोशिंबिर, पराठा,पुरी इ.यातील भाजीचा एक प्रकार पूढीलप्रमाणे करता येतो.

साहित्य:-

* पालक एक जुडी
* भिजवलेले शेंगदाणे व चना डाळ अर्धी वाटी
* चना डाळ पीठ १ टेस्पून
* शेंगदाणा कूट १ टेस्पून
* आंबट ताक अर्धी वाटी किंवा चिंचेचा कोळ
* मीठ चवीसाठी
* गूळ लहान सुपारीएवढा ( आंबट घातले की थोडे गोड )
* फोडणीसाठी तेल,हींग, मोहरी,हळद हीरव्या मिरचीचे तूकडे आवडत असल्यास लसूण
* पाणी गरजेनुसार

कृती :-

प्रथम पालक निवडून स्वच्छ धुवून,बारिक चिरून घ्यावा व एका पातेलीत वाफविणयास गॅसवर ठेवावे.

आता पातेले खाली घेऊन वाफवलेले पालक पळीने घोटावे त्यात डाळीचे पीठ,दाण्याचे कूट,गूळ,मीठ घालावे. तसेच ताक व थोडे पाणी घालून सर्व नीट सारखे करून घ्यावे.पाणी फार जास्त घालू नये.थोडी घट्टसरच ठेवावी.

आता पळीमधे तेल गरम करून हींग मोहरी मिरची, हळद सर्व घालून चांगली फोडणी करावी व वरील तयार भाजीवर घालावी व एक उकळी काढावी.

अशी गरमा-गरम तयार भाजी पोळी अथवा भाताबरोबर वाढावी.खूप छान लागते.

टीप :- विटामिन ' C ' मूळे लोह शोषणाची क्रीया होते.म्हणून पालकाच्या भाजीमधे आंबट ताक किंवा चिंच अवश्य घालावे.त्यामूळे त्यातील पूर्ण  लोह शोषले जावून शरीराला मिळते.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.