दम आलू ( Dum Aloo)

आलू, बटाटा म्हणले की लहान थोर सर्वांनाच आवडतो . दम आलू ही पंजाबी डिश आहे . पण आजकाल सगळीकडेच लोकप्रिय असल्याने केली जाते . नेहमीच्या बटाटा भाजीपेक्षा थोडी वेगळी चव असल्याने आवडीने खाल्ली जाते . कशी करायची कृती व
साहित्य काय ते पुढे पहा .

साहित्य:-:-
 १) बेबी आलू १०-१२
२) मोठे लाल टोमॅटो २
३) मोठे कांदे २
४)हिरवी मिरची २-३
५) लसूण १०-१२ पाकळ्या
६) लाल मिरची ५-६
७) कोथिंबीर
८) काजू १/४ कप
९) बडीशेप १टीस्पून
१०) मीठ ,साखर चविसाठी
११) फोडणीसाठी तेल २ टेस्पून,लवंगा ४ ,वेलदोडे २ ,दालचीनी १ इंच व हळद
१२ ) फ्रेश क्रीम १/२ वाटी

कृती :- 
       प्रथम बटाटे साल निघण्या इतपत उकडून घ्यावेत . फार  मऊ नको .

बटाटे उकडेपर्यंत फोडणीचे साहित्य व फ्रेश क्रीम सोडून बाकीचे वरील सर्व साहित्य मिक्सर वर वाटू घ्या .

आता उकडलेल्या बटाट्याच्या साली काढून काटे चमच्याने टोचून थोडी भोके पाडा. व नंतर  तांबूस तळून घ्या .

नंतर पॅन मध्ये तेल गरम करून त्यामध्ये लवंग , दालचीनी, वेलदोडे  टाका व त्यावर तयार पेस्ट घाला . तेल सुटेपर्यंत छान परता .

आता परतलेल्या  पेस्ट मध्ये गरजे पुरते पाणी घालावे. फार पातळ  नको . ग्रेवी दाट असावी . मीठ ,साखर घालून एक उकळी येऊ द्यावी .

शेवटी तळलेले बटाटे ग्रेवी मध्ये सोडावेत . परत एक उकळी येऊ द्यावी . दम आलू तयार .

 डिश मध्ये काढून वरून फ्रेश क्रीम व कोथिंबीर घालून ,गरमा-गरम फुलके किवा पराठया  सोबत खायला द्या .