मिश्र भाज्यांचे सूप (Mix Veg soup)

सूप म्हणजे एक प्रकारचे पातळ स्वरूपातील अन्नच असते. लहान मुले , आजारी माणसे,  वृध्द ज्यांना अन्न चावून खाणे जमत नाही त्याच्यासाठी अत्यंत उपयुक्त असा पोटभरीचा व पौष्टीक प्रकार आहे. तसेच सर्वसामान्य माणसे मुख्य जेवणाच्या आधिचा पाचक पदार्थ म्हणून घेतात. सूप करणे म्हणजे अनेक गृहीणीना क्लिष्ट काम वाटते. पणे ते तसे नाही. अत्यंत सोपे व कमी साहीत्यात व पट्कन होणारा पदार्थ आहे. आपण जर भाज्याचा स्टाॅक (पातळ स्वरूपात भाज्यांचा अर्क) फ्रिज मधे तयार करून ठेवला तर कोणत्याही भाजीचे सूप पट्कन बनविता येते. सूपचे खूप विविध प्रकार आहेत. आपण आपल्या बुध्दीमत्तेचा वापर करून अनेक नवनवीन प्रकारचे सूप बनवू शकतो. मी आज चार-पाच भाज्या पण थोड्या-थोड्याच शिल्लक होत्या म्हणून मिक्स व्हेज सूप बनविले. कसे ते पहा.

साहीत्य :-

1) सिमला मिरची 1
2) कोबी अर्धी वाटी
3) फ्लाॅवर अर्धीवाटी
4) गाजर 1
5) मटार दाणे पाव वाटी
6) बटर 1 टीस्पून
7) 7-8 काळ्या मिर्याची भरड पूड
8) मीठ चवीला
9) भाजीचा स्टाॅक 4 कप
10) गव्हाचे पिठ 1-1/2 टेस्पून

टीप :- आपल्या आवडीप्रमाणे व उपलब्धतेनुसार भाज्या व भाज्यांचे प्रमाण घ्यावे.

कृती ;-

   सर्व भाज्या आधि धुवून मग बारीक चिरून घ्याव्यात .

नंतर पॅनमधे बटर घाला व भाज्या त्यावर थोड्या परता.सिमला व कोबी थोडे नंतरच घालावे म्हणजे क्रंची रहाते व दाताखाली आलेले चांगले लागते.

नंतर त्यामधे गव्हाचे पिठ घालून थोडे परता.(गव्हाच्या पिठाने दाटपणा येतो) आता भाजीचा स्टाॅक चार कप घाला. मीठ व मिरपूड घाला.चांगले उकळवा.

गरमा-गरम पौष्टीक सूप तयार ! जेवणाचा फारच कंटाळा आला एखादे दिवशी तर रात्रिच्या जेवणाला पोटभरीचा व पौष्टीक असा पर्याय ठरू शकतो.कारण सर्व भाज्या व कणिक म्हणजे पोळी,भाकरीची जागा भरून काढते.

समजा आपल्याजवळ भाजीचा स्टाॅक तयार नसेल तर बटरवर आधि एखादे तमालपत्र,मिरे चार ,दोन लवंगा, लसूण दोन पाकळ्या,आलं लहान तुकडा टाका नंतर बारीक कांदा टाका व परतत परतत एक-एक भाज्या,पिठ व पाणी घाला व उकळवा. वरून मिरपूड घालून सर्व्ह करा. असेही सूप आपण करू शकतो पण स्टाॅक वापरल्यास त्याचा पौष्टीकपणा जास्त वाढतो. तसेच गव्हाच्या पिठाऐवजी पाण्यात मिसळून काॅर्नफ्लोअर पण वापरू शकतो.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.