हिरव्या मुगाचे डोसे (Sprouts Dosa)

कडधान्यामधे हिरवे मुग पचनास एकदम हलके . अगदी लहान मुलांना सुध्दा मुग डाळीचे कढण, खिचड़ी असे देतात. तसेच पथ्यकर आकारात मुग डाळ अग्रक्रमांकावर असते. वजन कमी करण्यासाठी डॉक्टर मोड आलेले मुग खाण्यास सांगतात. एकूण काय तर हिरवे मुग, मुगडाळ आरोग्याला उत्तम. परंतु तूरडाळीच्या तुलनेत चविला मुगडाळीला खमंगपणा तितकासा नसतो. त्यामुळे आहारात वापर कमी असतो.पण हिरव्या मुगाचा चविष्ट, खमंग असा एखादा पदार्थ तुम्हाला करून दिल्यास नक्की आवडेल.तर आपण मोड आलेल्या हिरव्या मुगाचे डोसे करू -

साहीत्य -
* मोडाचे मुग 2 वाट्या
* डाळीचे पीठ 2 टेस्पून
* हिरवी मिरची, आलं-लसूण पेस्ट 2 टीस्पून
* मीठ चविनूसार
* हळद, हींग
* कोथंबिर
* पाणी
* तेल

कृती :-

प्रथम मुग मिक्सरमधे थोडे पाणी घालून भरड वाटून घ्या.

नंतर वाटलेल्या मुगामधे कोथंबिर, हिरवी मिरची, आलं-लसूण पेस्ट, डाळीचे पीठ,चविला मीठ व हळद,हींग घालून नीट ढवळून घ्या. गरज वाटल्यास थोडे पाणी घाला. परंतु जास्त पाणी घालून पातळ करू नका. मिश्रण घटसरच ठेवावे.

आता तापलेल्या तव्यावर थोडे तेल सोडा व डावाने थोडे -थोड़े मिश्रण घाला. डावानेच पसरवा. हे किंचित जाडसरच असतात. एक बाजू भाजली की दुसरीही बाजू तेल सोडून भाजून घ्या.

तयार डोसे हिरव्या चटणी सोबत खायला द्या. सकाळी नाष्टाला किंवा मुलांना डब्यात द्यायला सोईचे व पौष्टिक आहेत. तूम्हीही करून बघा नक्की आवडतील.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.