डाळ ढोकळी(Dal Dhokali)

'डाळ ढोकळी' हा प्रामुख्याने गुजरात प्रांतातील पदार्थ आहे. राजस्थान, महाराष्ट्रातही केला जातो. महाराष्ट्रामधे याला 'वरणफळे' 'चकोल्या' असे सुध्दा म्हणतात. सकाळचा पोटभरीचा नाष्टा किंवा वन डिश मिल म्हणूनही खाता येतो. कसे करायचे साहीत्य व कृती,

साहित्य :-
डाळ
* तूर डाळ १ वाटी
* धना-जीरा पावडर १ टीस्पून
*,गरम मसाला १ टीस्पून
* चिंचेचा कोळ २ टीस्पून
* लाल मिरचीपूड २ टीस्पून
* मीठ चवीनुसार
* गूळ सुपारी एवढा
* हळद,  हींग, मोहरी, जीरे
* कढीपत्ता
* कोथंबिर, ओलं खोबरं
* तूप वरून घालण्यासाठी
* तेल फोडणी साठी
* पाणी
ढोकळी
* गव्हाचे पीठ २ वाट्या
* चणाडाळ पीठ १ टेस्पून
* हळद
* लाल मिरचीपूड १ टीस्पून
* ओवा चिमूटभर
* मीठ चवीनुसार
* धना-जिरा पावडर १ टीस्पून
* मोहन तेल २ टीस्पून
* पाणी

कृती :-

प्रथम डाळ कुकरला शिजायला लावा. नंतर एका पसरट भांड्यात गव्हाचे व डाळीचे पीठ घेऊन त्यामधे गार तेलाचे मोहन व वर ढोकळीसाठी दिलेलेे सर्व साहीत्य घालून कणिक मळून घ्या. फार घट्ट अथवा सैल नको नेहमीच्या पोळीच्या कणिके सारखेच असावे.

आता शिजलेली डाळ रविने अथवा डावानेच छान घोटून घ्या. गँसवर पातेले गरम करून त्यात तेल घाला व कढीपत्ता, हींग, हळद, जीरे-मोहरीची फोडणी करा.

नंतर डाळ घाला व दिलेले सर्व साहीत्य घाला. आपल्याला कितपत पातळ हवे त्यानुसार पाणी घाला. थोडे जास्तच घातले तरी चालेल. कारण नंतर ढोकळी सोडली की डाळ घट्ट होते. व पाच मिनिट चांगले उकळू द्यावे. शेवटी खोबरं, कोथिंबिर घाला.

आता डाळ उकळेपर्यंत भिजलेल्या कणिकेची पोळी लाटा व सुरीने शंकरपाळी सारखे चौकोनी तुकडे कापावेत. पोळी खूप जाड किंवा पातळ नसावी.

आता उकळत्या डाळीमध्ये कापलेलै तुकडे सोडा. गरज वाटली तर परत थोडे पाणी घाला व ५-७ मिनिट  उकळी काढा. अथवा कणकेचे काप, वेगळ्या भांड्यात गरम पाणी घेऊन ते उकळू लागल्यावर त्यात सोडावेत व पाच मिनिटांनी शिजले की वर तरंगू लागतात. मग तयार डाळीत सोडावेत  डाळ ढोकळी तयार!

आता तयार डाळ ढोकळी बाउलमधे काढा, वरून तूप घाला व गरम -गरम खाऊन घ्या किंवा खायला द्या. थंडीच्या दिवसांत अथवा पावसाळी दिवसांत गरमा -गरम अशी डाळ ढोकळी खाल्ली कि मस्त एकवेळचे जेवणच होते. 

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.