भेंडी ही भाजी बर्याच जणांना त्यातील चिकटपणामुळे आवडत नाही. परंतु भेंडी ह्रदयासाठी चांगली आहे. तसेच रक्तदाब पण भेंडीमुळे नियंत्रणात रहतो. भेंडीची भाजी खूप प्रकारांनी बनविता येते. भरली भेंडी, चिंच-गुळातली भेंडी,परतून केलेली भेंडी अजून बर्याच प्रकारांनी बनविता येते. मी मसाला भेंडी केली आहे.साहित्य व कृती-👇 👇

साहित्य :-
° भेंडी २५० ग्रँम
° कांदा मोठा १
° टोमँटो २
° आलं-लसूण हिरवी मिरची पेस्ट १ टीस्पून
° गरम मसाला १/२ टीस्पून
° लाल मिरचीपूड १ /२ टीस्पून
° आमचूर पावडर १ /२ टीस्पून
° मीठ चविनूसार
° हळद पाव चमचा
° जीरे १/४ टीस्पून
° तेल २ टेस्पून
° कोथंबिर चिरून

कृती :-
प्रथम भेंडी धुवून, पुसून कोरडी करून घ्यावी व शेंडा-बुडखा काढून उभी चिरून घ्यावी.

नंतर १ टेस्पून तेलावर परतून, भाजून घ्यावी.

आता कढईमधे १ टेस्पून तेल घालून जीरे तडतडवून घ्यावेत. हळद घालावी व वर कांदा घालून परतावे. परतत असताना आलं-लसूण हिरवी मिरची पेस्ट घालून थोडे परतावे. शेवटी चिरलेला टोमँटो घालावा व मऊ होईपरेंत पपतावा.

परतलेल्या कांदा -टोमँटो मधे गरम मसाला, मिरची पूड, आमचूर पावडर, मीठ सर्व घालावे.मिश्रण  फार कोरडे वाटू लागले तर किंचित पाणी घालून परतावे.

शेवटी तयार मसाल्यामधे भाजलेली भेंडी घालावी व एकत्र परतावे

तयार "मसाला भेडी" भाजी गरमा-गरम पोळी किंवा फुलक्यासोबत खावी.

टीप: भेडीमधे आमचूर पावडर किंवा लिंबूरस घातल्यास भेडीचा चिकटपणा कमी होतो.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

मेथी सर्वांच्या परिचयाचीच भाजी आहे. सारक व पथ्यकर असलेल्या या भाजीमध्ये लोहाचे प्रमाण भरपूर असते. याचे बी वातहारक व शक्तिकारक असते म्हणून बाळंतपणात याचा उपयोग केला जातो. मेथीची मेत्रूटे, मेथीलाडू करतात. दूधवाढीसाठी त्याचा उपयोग होतो. मेथ्यांचे पीठ तोंडाला लावल्यास चेहर्‍यावरील सुरकुत्या नष्ट होतात. तोंडाची चव गेली असल्यास या भाजीने रूची येते. मेथीची भाजी अनेक पध्दतिने केली जाते. तसेच पराठे, भजीही छान होतात. आज मी डाळवाली मेथीभाजी केली आहे. साहित्य व कृती-👇

साहित्य :-
* गोल पानांची ताजी मेथी जुडी १
* मुगाची डाळ १/२ वाटी
* लसूण ८-१0 पाकळ्या
* हिरवी मिरची ३-४
* मीठ चविनूसार
* तेल फोडणीसाठी
* हिंग-मोहरी, हळद

कृती :-
प्रथम मेथी निवडून, स्वच्छ धुवून बारीक चिरावी.मेथी निवडेपर्यंत मुगडाळ पाण्यात भिजत घालावी. मुगडाळ सहज व लवकर भिजते. वेळ लागत नाही.

आता कढईमधे (लोखंडी असेल तर जास्तच चांगले)  तेल गरम करून  हिंग,हळद मोहरीची फोडणी करून घ्या. फोडणीमधे लसूण ठेचून व हिरवी मिरचीचे तुकडे घालावेत. अशा फोडणीचा खमंग वास घरात पसरला की, कधी एकदा भाजी होतेय व आपण खातोय असे होते.

तर आता फोडणीमधे आधी भिजलेली डाळ व त्यावर चिरलेली मेथी टाकावी. पाच मिनिट झाकण ठेवावे. भाजी खाली बसते.  भाजीचा अंदाज येतो. आता चवीनुसार मीठ घालावे. आता झाकण न ठेवता, चमच्याने हलवत परतावे. भाजी सुकी झाली की गँस बंद करावा. या भाजीला वेळ लागत नाही. लोखंडी कढईत केली असेल तर लगेच दुसर्या भांड्यात काढून ठेवावी.

अशी खमंग भाजी सोबत गरमा-गरम टम्म फुगलेली भाकरी, लोण्याचा गोळा, कांदा व मिरचीचा खर्डा अहाहा.. स्वर्गसुख म्हणतात ते हेच का ते असे वाटते. त्यात बाहेरही मुसळधार पाऊस कोसळत असावा व आपली माणसे संध्याकाळी घरट्यात परतलेली असावीत, सर्वजण मिळून, गप्पा करत अशा जेवणावर ताव मारायला छानच वाटते.

मेथीची भाजी बर्याच पध्दतिने केली जाते. परंतु अशा पध्दतीने केलेली भाजीच घरात सर्वाना खूप आवडते. तुम्हीही करून बघा नक्की आवडेल.

आपल्या प्रतिसादाने नव-नविन पदार्थ करण्यास प्रेरणा मिळते. आपल्या मौल्यवान सुचना व अभिप्राय, आम्हाला ज़रूर द्या.

"दोडक्याचा कोरडा" ही पारंपारिक पाककृती आहे. दोडक्याची डाळ घालून, दोडका, बटाटा, कांदा मिक्स भाजी, रस्साभाजी.. . भरला दोडका असे बरेच प्रकार आहेत. आज थोडे वेगळ्या पध्दतिने भाजी करण्याचे ठरविले  व या पारंपारिक पध्दतिची भाजी केली साहित्य व कृती,

साहित्य :-
* दोडका पाव किलो
* कांदा १
* आलं-लसूण हिरवी मिरची पेस्ट १ टीस्पून
* कोथंबिर
* आमचूर पावडर किंवा लिंबूरस
* भाजलेल्या शेंगदाण्यांचा कूट २ टेस्पून
* मीठ चविनूसार
* साखर चिमूटभर
* तेल १ टेस्पून
* हळद,हिंग, मोहरी

कृति :-
प्रथम दोडके स्वच्छ धुवून साल काढून, खिसणीवर किसून घ्यावे. कांदा, कोथिंबिर बारीक चिरून घ्यावे.

नंतर कढईमधे तेल गरम करून हळद, हिंग, मोहरीची फोडणी करून घ्यावी.

फोडणीमधे कांदा व आलं-लसूण हिरवी मिरची पेस्ट घालावी व चांगले परतून घ्यावे.

परतेल्या मसाल्यामधे दोडक्याचा किस घालावा. मीठ, साखर घालावी व परतावे. किस मऊ झाल्यावर शेंगदाण्यांचा कूट घालावा व वर झाकण ठेवून एक वाफ काढावी.

तयार भाजीमधे वरून लिंबू पिळून सारखी करावी व कोथंबिर घालावी. गरम भाकरी, चपाती सोबत खावी.

या भाजीला शिजण्यासाठी पाणी घालण्याची गरज पडत नाही म्हणून याला "कोरडा" असे   म्हणतात.

आलू-पालक भाजी जशी ग्रेव्ही स्वरूपात करता येते तशीच सुकीसुध्दा करता येते. डब्यात न्यायची असेल तर सुकी भाजी जास्त सोईची होते.कशी करायची कृती व साहीत्य -

साहीत्य :-

* बारीक चिरलेला पालक एक जूडी
* बारीक चिरलेला कांदा एक मोठा
* एक बटाटा साल काढून चिरून चौक फोडी
* गरम मसाला 1 टीस्पून
* मीठ चवीनूसार
* लाल मिरचीपूड 1 टीस्पून
* आल-लसूण, मिरची पेस्ट 1 टीस्पून
* हळद 1/4 टीसूपून
* तेल 2 टेस्पून
* फोडणी साहीत्य ,मोहरी,हींग

कृती :-

प्रथम कढईत तेल घालून गरम करा. हींग,मोहरी व हळद घालून फोडणी करा.

आता कांदा व आलं-लसूण मिरची पेस्ट घाला. कांदा मऊ होईपर्यंत परता.

नंतर चिरलेला बटाटा घाला घाला  व मऊ होईपर्यत परता.

शेवटी पालक घाला. याला जास्त परतावे लागत नाही. फोडणीत टाकल्यावर नुसता खाली बसला की बस्स.

आता चवीला मीठ , गरम मसाला व मिरचीपूड घाला. एक-दोन परतण्या द्या व गॅस बंद करा.

तयार भाजी बाऊलमधे काढा .फुलके/ पोळी सोबत छान लागते.

आपल्या प्रतिसादाने नविन गोष्टी करण्यास प्रेरणा मिळते.आपल्या मौल्यवान सूचना व अभिप्राय, आम्हाला ज़रूर द्या.