खमंग कांही खावे वाटले किंवा बाहेर पाऊस पडायला लागला की आपल्याला हमखास कांदा भजीची आठवण येते. तर याच पारंपारिक कांदभजी प्रकारातील पण थोडासा वेगळा ओनियन रिंग्स हा पदार्थ आहे.  करायला एकदम सोपा व खायला खमंग असा आहे.  तर कसे करायचे साहित्य व कृती-👇

साहित्य :-
* मोठे कांदा १
* मैदा १ वाटी
* काँर्नफ्लोअर १ टेस्पून
* ताक १ वाटी
* मीठ चवीनुसार
* धना-जीरा पावडर १ टीस्पून
* हींग चिमूटभर
* लाल मिरचीपूड १ टीस्पून
* काळी मिरी भरड अर्धा टीस्पून
* सोडा चिमूटभर
* तेल तळण्यासाठी गरजेनुसार
* चाट मसाला वरून घालण्यासाठी

कृती :-
प्रथम कांदा साल काढून गोल आकाराच्या व साधारण पाव इंच रूंद चकत्या कापून घ्यायच्या.  नंतर फोटोत दाखविल्या प्रमाणे त्याच्या एक -एक रिंग ⭕ हाताने सुट्या कराव्यात.

आता त्या रिंग्जवर थोडासा मैदा व चिमुटभर काँर्नफ्लोअर घालून हाताने सर्व रिंग्जना चोळून घ्यावे.

नंतर एका भांङ्यामधे मैदा व काँर्नफ्लोअर एकत्र घेऊन त्यामधे वरील सर्व मसाला मिसळावा. तसेच ताकही एकदम न घालता थोडे थोडे घालून कालवावे. गुठळ्या रहाणार नाहीत याची काळजी घ्यावी व बँटर तयार करावे.

शेवटी कांद्याच्या एकेक रिंग घेऊन तयार बँटरमधे बुडवून गरम तेलामधे तांबूस तळून काढाव्यात.

तयार ओनियन रिंग्ज एका डिशमधे घेऊन वरून चाटमसाला भुरभुरावा.  मस्त कुरकुूरीत ओनियन रिंग्ज तयार.

टिप्स :
* या रिंग्ज पीठात बुडवून नंतर ब्रेडक्रम्स मधे घोळवून तळले तर अधिक कुरकुरीत होतात.
* पीठामधे आवडीनुसार आलं-लसूण हिरवी मिरची पेस्ट घालावी.
* गरम असतानाच खावीत. थंड झाले की त्याचा क्रिस्पीनेस कमी होतो.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

पाऊस असो किंवा थंडी, गार वातावरण असेल तर चहासोबत कांही चटपटीत खायला हवेच. तसेही चटपटीत खायला कोणाला नाही आवडत?  तर आवडीनुसार सगळ्या डाळी थोड्या थोड्या घेऊन मस्त डाळ पकोडे केले. पौष्टीक व चटपटीतही होते. एकदम सोपे आहेत. साहित्य व कृती-👇

साहित्य :-
* चणाडाळ १ वाटी
* छिलका मुगडाळ १/२ वाटी
* मसूरडाळ १/४ वाटी
* तूरडाळ १/४ वाटी
* उडीदडाळ मूठभर
* कांदा १ चिरून
* हिरवी मिरची,आलं-लसूण पेस्ट १ टीस्पून
* कोथिंबीर
* धना-जीरा पावडर १ टीस्पून
* गरम मसाला १ टीस्पून
* हळद, तिखट, मीठ
* तेल तळण्यासाठी

कृती :-
प्रथम सर्व डाळी धुवून २-३ तास पाण्यात भिजत घालाव्यात. नंतर पाणी निथळून काढून टाकावे व भरड वाटून घ्याव्यात.

आता वाटलेल्या डाळीमधे दिलेला सर्व मसाला व  कांदा, कोथिंबीर घालून एकत्र मिश्रण करावे. पाणी अजिबात घालू नये. धट्टच ठेवावे.

आता तेल गरम करून हातानेच लहान-लहान गोळे तेलात सोङावेत व मध्यम आचेवर तांबूस रंगावर तळावे.

तयार मस्त गरमा-गरम कुरकुरीत "डाळ पकोडे " चहासोबत किंवा साँस बरोबर खायला द्या.

टिप :
यामधे आवडीनुसार पालक, मेथी चिरून घातले तर अधिक रूचकर लागते.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

"रवा टोस्ट " यालाच "एगलेस फ्रेंच टोस्ट" ही म्हणतात. रवा टोस्ट झटपट होणारा रोडसाईड स्नँक्स चा प्रकार आहे. तसेच सकाळचा नाष्टा किंवा संध्याकाळचे स्नँक्स अथवा मुलांना डब्यात देण्यासाठी पण उपयुक्त पदार्थ आहे. कसा करायचा साहित्य व कृती-👇

साहित्य :-
* ब्रेड स्लाइस ६
* बारीक रवा १ वाटी
* दही १/२ वाटी
* कांदा लहान १ बारीक चिरून
* शिमला मिरची लहान १ बारीक चिरून
* टोमँटो १ बारीक चिरून
* कोथिंबिर चिरून
* आलं, चिरून
* हिरवी मिरची बी काढून बारीक च्रिरलेली १
* मीठ चविनुसार
* चिमुटभर साखर
* शेजवान चटणी किंवा हिरवी चटणी
* बटर

कृती :-
प्रथम रवा एका बाऊलमधे घेऊन त्यामधे दही घालावे व एकत्र ढवळावे. आता  मिश्रण भिजेपर्यंत कांदा, टोमँटो, मिरची, कोथिंबिर, आलं सर्व बारीक चिरून घ्यावे. आधीच चिरून ठेवलेले असेल तरी चालते.

एव्हाना रवा भिजला असेल. आता त्यामधे चिरलेल्या भाज्या,कांदा, कोथिंबीर, मीठ, साखर सर्व साहित्य मिसळावे व मिश्रण तयार करावे.

आता गँसवर तवा गरम करायला ठेवावा व गरम होंईपर्यंत ब्रेड चा एक स्लाईस घ्यावा. त्यावर शेजवान चटणी लावावी व रव्याचे तयार मिश्रण त्यावर व्यवस्थित पसरावे. असे एकावेळी दोन स्लाईस तयार करायचे.

आता गरम तव्यावर थोडे बटर पसरून ब्रेडची मिश्रण लावलेली बाजू तव्याला चिकटेल अशा पध्दतीने ब्रेड स्लाईस तव्यावर ठेवावे. ब्रेडला वरच्या बाजूने पण बटर लावावे. व मध्यम आचेवर दोन्ही बाजूनी खरपूस भाजावे. मधेच उलटे-पालटे करावे. करपू देऊ नये. भाजेपर्यंत दुसरे स्लाईस मिश्रण लावून तयार करावेत.

आता तयार टोस्ट कटरने मधून तिरके कापावा व  साँस किंवा हिरव्या चटणी सोबत खायला द्यावे.

खुसखूषीत गरम टोस्ट नाष्ट्याला एकदम चविष्ट लागतो व झटपट होतो. तुम्हीही करून बघा. नक्की आवडेल.

टिप्स :-
* आपल्या आवडीनुसार बारीक चिरून पालक,कांदापात गाजर, बीट काकडी रव्याच्या मिश्रणात घातले तरी चालते.
* मिश्रण फार पातळ करू नका. घट्टच असावे.
* दही खूप आंबट असू नये. ताजे असावे.

आपल्या प्रतिसादाने नव-नविन पदार्थ करण्यास प्रेरणा मिळते. आपल्या मौल्यवान सुचना व अभिप्राय, आम्हाला ज़रूर द्या.

"ब्रेड पकोडा " रोड साईड स्नँक्स चा प्रकार आहे. करायला सोपा, पट्कन होणारा व तसा इतर भजी प्रकारांच्या तुलनेत पोटभरीचा आहे. साहित्य व कृती-👇

साहित्य :- कव्हर साठी
* ब्रेड स्लाइस ६
* चणा डाळ पीठ १ वाटी
* तांदुळाचे पीठ २ चमचे
* लाल मिरची पावडर
* हळद
* मीठ
* ओवा
* धना-जीरा पावडर १ टीस्पून
* लिंबू रस १ टीस्पून
* सोडा चिमुटभर
* तेल तळण्यासाठी
आतील सारण साहित्य :-
* उकडलेले बटाटे ४
* कांदा १
* टोमँटो १
* आलं-लसूण हिरवी मिरची पेस्ट १ टीस्पून
* कोथिंबिर बारीक चिरून
* मोहरी, हींग, हळद
* तेल
* मीठ
* साखर चिमूटभर

कृती :-
प्रथम उकडलेले बटाटे मँश करून घ्यावेत. कांदा उभा पातळ चिरून घ्यावा. टोमँटो बारीक चिरून घ्यावा. तेल गरम करून हींग, मोहरी हळद फोडणी करून त्यावर कांदा, आलं-लसूण हिरवी मिरची पेस्ट, टोमँटो घालून परतावे. त्यावर मँश केलेला बटाटा, चवीनुसार मीठ, चिमुटभर साखर  घालून परतावे. शेवटी ओलसरपणासाठी  चमचाभर पाणी  व कोथंबिर घालावी . हलकी वाफ काढून गँस बंद करावा. भाजी थंड होण्यासाठी बाजूला ठेवून द्यावी.

आता एका बाऊलमधे डाळीचे पीठ, तांदुळ पीठी व तिखट-मीठ, हळद, ओवा, धना-जिरा पावडर सर्व मसाला घालून व्यवस्थित एकत्र करावे व गरजेनुसार पाणी घालून सरसरीत पीठ भिजवावे. फार पातळ अथवा धट्ट नको.

नंतर तेल गरम करायला ठेवावे. तेल गरम होईपर्यंत दोन ब्रेड स्लाईस घ्यावेत. एकावर तयार भाजी सारण पसरावे. दुसरा स्लाईस त्यावर ठेवून हलकेच दाबून बंद करा. आता चाकूने मधून तिरके कापून दोन भाग करावेत. असे सर्व स्लाईस तयार करून घ्यावेत.

आता तेल गरम झाले असेल. पीठाच्या घोळमध्ये लिंबू व सोडा घालून ढवळावे. आता ब्रेडस्लाईस पीठाच्या घोळात बुडवून तेलात सोडावा व मध्यम आचेवर तांबूस तळावे. गरम-गरम खायला द्यावेत.

कोणताही पदार्थ गरम चांगलाच लागतो तरीही खासकरून भजी हा प्रकार कढईतून काढून लगेच प्लेटमध्ये आला तर मजा काही औरच. कारण गरम असताना कुरकुरीत लागतात. थंड झाल्यावर लगेच मऊ पडतात.

टीप्स :-
* लिंबू रस व सोडा ऐत्यावेळीच घालावा.
* ब्रेड स्लाइस पीठात बुडवताना कडे कडेने फिरवत आधी कडा बुडवाव्यात. भाजी बाहेर येत नाही.

आपल्या प्रतिसादाने नव-नविन पदार्थ करण्यास प्रेरणा मिळते. आपल्या मौल्यवान सुचना व अभिप्राय, आम्हाला ज़रूर द्या.

आपण कधीतरी बाहेर हाँटेलमधे जेवायला गेलो तर जेवण येईपर्यंत टाईमपास म्हणून किंवा सूप सोबत हमखास कांहीतरी स्टार्टर मागवतो. त्यातलाच हा एक पदार्थ 'मसाला पापड '. पण काय होते, आपण मागवतो मसाला पापड व आपण कडे-कडेने मोडून खाईपर्यत मऊ पडतो व मध्यभागी ओला मसाला.. मऊ पडलेला पापड सर्व मिळुन कोशिंबिरच होते. म्हणून मसाला पापड घरात करायचा असेल तर पुढे दिलेल्या पध्दतिने केला तर शेवटी शेवटी कोशिंबिर न होता मसाला पापड खाण्याचा आनंद शेवटपर्यंत मिळतो कसा करायचा पहा साहित्य व कृती-👇

साहित्य :-
* मिनी /डिस्को पापड २० -२५
* कांदा बारीक चिरून १
* लाल टोमँटो बारीक चिरून १
* हिरवी मिरची, कोथिंबिर बारीक चिरून
* बारीक शेव
* चाट मसाला
* लाल मिरचीपूड
* मीठ
* तेल पापड तळण्यासाठी

कृती,:-
प्रथम पापड तळून टीश्यू पेपरवर काढावेत.

नंतर एका बाऊलमधे चिरलेला कांदा, टोमँटो, मिरची कोथिंबीर, तिखट मीठ सर्व एकत्र करून मसाला तयार करावा.

आता तळलेले पापड एका मोठ्या प्लेटमध्ये गोलाकृती लावून घ्यावेत व त्या प्रत्येक पापडावर तयार मसाला चमच्याने थोडा -थोडा ठेवावा. शेवटी वरून चाटमसाला भुरभूरावा व बारीक शेव घालून खायला द्यावे.

अशा पध्दतीने केलेले मसाला पापड खाई खाईपर्यंत मऊ पडत नाही. व शेवपुरी सारखे अखंड उचलून एकेक तोंडात घालता येतात.

या मसाल्यात आपण विविधता आणू शकतो. जसे की कांदा, टोमँटो व मोड आलेले हिरवे मूग घेऊ शकतो. उकडलेले चणे, कांदा, लिंबू घेऊ शकतो.

आपल्या प्रतिसादाने नव-नविन पदार्थ करण्यास प्रेरणा मिळते. आपल्या मौल्यवान सुचना व अभिप्राय, आम्हाला ज़रूर द्या.

भजी, पकोडे म्हटले की,आपल्या डोळ्यासमोर लगेच कांदा किंवा मिरची भजीच येतात. पण याशिवायही भजीचे बरेच विविध प्रकार आहेत. जसे की, पालकभजी , बटाटाभजी , मिक्स वेज भजी तसेच मुगडाळ, चणाडाळ भजी, भाताची भजी. अहो एक का दोन.. आपल्या कल्पना शक्तिचा वापर केला तर, घरात उपलब्ध साहीत्यात भजीचे विविध प्रकार बनवतात येतात. पाऊस पडयला लागला की आधी भजीचीच आठवण येते. तर नेहमी नेहमी एकाच प्रकारची भजी बनवण्यापेक्षा आज थोडी हटके व मस्त खमंग कुरकुरीत रव्याची भजी म्हणजेच "सूजी पकोडे" बनवले. कसे ते पहा साहित्य व कृती 👇

साहित्य :-
* रवा (जाडसर) २ वाट्या
* पातळ दही १ वाटी
* कांदा १ बारीक चिरून
* कच्चा बटाटा १ किसून
* कोथंबिर , कढीपत्ता चिरून
* हिरवी मिरची व आलं चिरून आवडीनुसार
* मीठ चवीनुसार
* लाल मिरचीपूड अर्धा चमचा
* धना-जिरा पावडर १ टीस्पून
* बेकिंग सोडा पाव टीस्पून किंवा इनो पावडर १ टीस्पून
* तेल तळण्यासाठी
* पाणी गरजेनुसार

कृती :-
प्रथम एका बाऊलमधे रवा घ्यावा. त्यामधे बेकींग सोडा सोडून वर दिलेले सर्व साहित्य घालावे व एकत्र ढवळून १५ मिनिट झाकून ठेवा.

पंधरा मिनिटानंतर मिश्रण परत एकदा व्यवस्थित ढवळावे व गरज वाटली तर थोडे पाणी घालावे. कारण रवा फुलतो. नेहमीच्या भजी पीठा इतपतच घट्ट ठेवावे.

आता तयार मिश्रणात सोडा घालावा व ढवळून गरम तेलात मध्यम आकाराची भजी तळून काढावी. तेलात भजी सोडताना तेल एकदम गरम असावे. नंतर गँस कमी करावा व मध्यम आचेवर सोनेरी रंगावर भजी तळावीत.

मस्त गरमा-गरम व कुरकुरीत भजी साँस सोबत किंवा नुसतीच मिरची सोबत खायला द्या.

अशी खमंग, कुरकुरीत भजी खायला स्वादिष्टच लागतात परंतु करायलाही सहज, सोपी व झटपट होतात. तुम्हीही करून बघा. तुम्हालाही नक्की आवडतील.

टिप :- आपल्या आवडीनुसार शिमला मिरची, गाजर, पालक, कोबी अशा भाज्यासुध्दा चिरून यात घालता येतात. चविला छान लागतात.

आपल्या प्रतिसादाने नव-नविन पदार्थ करण्यास प्रेरणा मिळते. आपल्या मौल्यवान सुचना व अभिप्राय, आम्हाला ज़रूर द्या.

उपवास असला की हमखास चटपटीत काहीतरी खावे वाटते. अशावेळी ही एकदम सोपी व पट्कन होणारी भजी करा. साहीत्य व कृती,

साहित्य :-
* बटाटे २
* राजगिर्याचे पीठ अर्धा वाटी
* आरारूट पावडर १ टेस्पून
* मीठ चविनूसार
* लाल मिरचीपूड /हिरवी मिरची पेस्ट आवडीनुसार
* जीरे पूड
* तेल तंळणीसाठी

कृती :-

प्रथम बटाटे साल काढून पातळ गोल चकत्या करा व नंतर त्या चकतीच्या उभ्या बारीक स्ट्रिप कापा. (उभ्या चिरलेल्या कांद्याप्रमाणे दिसतील)

नंतर त्यावर मिरचीपूड, मीठ व जीरपूड घालून चोळा व दहा मिनिट झाकून ठेवा.

दहा मिनिटानी बटाट्याला पाणी सुटलेले असेल, आता त्यात राजगिरा पीठ व आरारूट घाला व एकत्र करा.  गरजेनुसार राजगिरा पीठ कमी -अधिक करा. मिश्रण सुटसूटीत झाले पाहीजे.  साधारण कांद्याची खेकडा भजी करतो त्याप्रमाणे असावे.

आता गरम तेलात हाताने लहान लहान भजी सोडा व कुरकुरीत तळा.

मस्त कुरकुरीत भजी नुसतीच अथवा चटणी सोबत खा.

टीप :- आरारूट पावडर नसेल तर बाईंडींग साठी शिंगाडा पीठ वापरले तरी चालते.

चकत्या जितक्या पातळ कापला येतील तितक्या पातळ कापा.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

साधारणपणे भजी म्हटले की, सर्वात आधि कांदाभजीच आपल्या डोळ्यासमोर येतात. पण इतर बर्याच भाजांची पण भजी होतात व तितकी च  सुंदर लागतात. जसे कोथंबिर मेथी,अळू, पालक, शिमला मिरची, घोसाळी भजी करतात. तसेच आज पडवळाची भजी केली. खूपच छान लागतात. कशी केली साहीत्य व कृती :-

साहीत्य :-
* पडवळ २०० ग्रँम
* डाळीचे पीठ आवश्यकते नुसार
* तांदुळाचे पीठ १ टेस्पून
* लाल मिरची पूड आवडीनुसार
* मीठ चविनूसार
* हींग, हळद
* तेल तळण्यासाठी

कृती :-

प्रथम पडवळ स्वच्छ धुवून, आतल्या बिया,गर काढून टाका. नंतर त्याचे गोल काप करा. आता कापांवर पाण्याचा हबका मारा व हाय टेम्परेचरला ओवनला दीड मिनिट वाफवून किंचित मऊ करून घ्या. फार मऊ शिजवायचे नाही.

आता बाऊलमधे डाळीचे व तांदुळाचे पीठ एकत्र करा. त्यामधे तिखट, मीठ,  हळद, हींग घाला व एकत्र करा. आवश्यक तितके पाणी घाला व दाटसर घोळ तयार करा.

आता आधि तयार पडवळाचे काप पीठाच्या घोळात बुडवून गरम तेलात तळून काढा. गरमा-गरम कुरकुरीत भजी गरम असेपर्यंत खायला द्या. आवडीनुसार सोबत साँस, हिरवी चटणी घ्यावी. अथवा नुसतेसुध्दा छान लागतात.
तूम्हीही करून बघा.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

कोबीची भाजी म्हटले की बरेचवेळा नाक मुरडले जाते. पण मंडईत उपलब्ध असणार्या भाज्या व्यतिरीक्त वेगळ्या भाज्या तरी काय आणणार? तरी त्याची वेगवेगळ्या प्रकारांनी भाजी तर कधी पराठे, कोशिंबिर असे प्रकार केले जातात. आज कोबीचे पकोड़े काढले. मस्त झाले. कसे केले साहीत्य व कृती :-

साहीत्य :-
* लांब व बारीक चिरून कोबी २ वाट्या
* चणाडाळ पीठ गरजे नुसार. अंदाजे १/२ वाटी
* आलं-लसूण, हिरवी मिरची पेस्ट
* कोथंबिर
* मीठ, हळद, हींग
* धना-जिरा पावडर
* तळणीसाठी तेल
कृती :-

प्रथम चिरलेला कोबी एका बाऊलमधे घेऊन त्यावर मीठ व हळद घालून चोळा. तसेच १० मिनिट झाकून ठेवा.

आता १० मिनिटानंतर त्याला पाणी सुटलेले असेल, त्यात मावेल इतकेच डाळीचे पीठ घाला.आंल -लसूण,मिरची पेस्ट, चिरून कोथंबिर, धना-जीरा पावडर, हींग सर्व घाला. हलक्याच हाताने नीट मिक्स करा.

गरम तेलात कांदाभजी प्रमाणे तळून काढा. मस्त कुरकुरीत पकोडे गरम-गरम सर्व्ह करा.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

सर्वसामान्यपणे घरात नाष्टा म्हटले की,आपण  पट्कन होणारे पदार्थ म्हणून कांदापोहे किंवा रव्याच्या उपम्यालाच पसंती देतो. पण नेहमी - नेहमी तेच खायचा कंटाळा येतो. मग त्याच पोह्याचे वडे किंवा भजी केली तर?  सर्व साहीत्य थोड्याफार फरकाने तेच, फक्त प्रमाण वेगळे वआकार वेगळा. वेळही काही जास्त लागत नाही. पट्कन होतात. बघा साहीत्य व कृती :-

साहीत्य :-

* पातळ पोहे 2 वाट्या
* चना डाळ पीठ 2 टेस्पून
* तांदुळाचे पीठ 1 टेस्पून
* बारीक चिरून कांदा 1
* आलं-लसूण, हिरवी मिरची पेस्ट
* बारीक चिरून कोथंबिर
* मीठ चविनूसार
* हळद
* धना-जिरा पावडर 2 टीस्पून
* तेल तळण्यासाठी
* पाणी 

कृती :-

प्रथम पोहे धुवून चाळणीमधे निथळत ठेवा. तोपर्यत इतर तयारी करावी. कांदा चिरून घेणे,आलं-लसूण मिरची पेस्ट तयार करणे इत्यादी.

आता भिजलेल्या पोह्यामधे वर दिलेले सर्व साहीत्य घालून हाताने एकजिव करून गोळा मळून तयार करा. गरज वाटली तर मळताना पाण्याचा हात घ्यावा.

नंतर तेल तापत ठेवा,व हाताने लहान -लहान चपटे वडे करून गरम तेलात तळा. तूम्ही फोटो मधे दाखवल्या प्रमाणे छोटी-छोटी भजी पण काढू शकता.

तयार खुसखूषीत व गरम कशासोबतही खा किंवा नुसतेही छान लागतात. तूम्हीही करून बघा नक्की आवडतील. मात्र प्रतिक्रिया द्यायला विसरू नका.

टीप :- पोहे जाडही घेऊ शकता.फक्त भिजवताना थोडे पाणी वापरावे.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.