पनीर-मटर समोसा( Paneer-Matar Samosa)

समोसा बर्याच वेगवेगळ्या चवीचा असतो. नुसत्या बटाट्याचे सारण असलेला, मिक्स भाज्यांचे सारण भरून तसेच वाटाण्याचे, कोबीचे, पनीरचे इत्यादि. आपल्या आवडीने सारण तयार करावे. परंतु कोणत्याही चवीचा समोसा असूदे वरचे कव्हर एकदम कडक, खुसखूषीत असेल तरच समोसा खायला मजा येते. समोसाच्या कृतीमधे महत्वाचा भाग कोणता असेल तर, तो म्हणजे वरचे कव्हर व तळाण्याची खुबी. या दोन गोष्टी परफेक्ट जमल्या  तर समोसा एकदम हाँटेल स्टाईलचा होतो. आज मी पनीर- मटारचा डिजाइनर समोसा केला. कसा केला साहित्य व कृती-

साहित्य:-
क्रिस्पी समोसा कव्हरसाठी
* मैदा २ कप
* मीठ  चवीनुसार
* ओवा पाव चमचा
* मोहन(पातळ केलेला डालडा किवा तूप ) पाव कप, 80ml
* थंड पाणी अर्धा कप
सारण साहित्य
* हिरवे मटार २ कप
* पनीर पाव कप
* खवलेले आेले खोबरे अर्धा कप
* मीठ
* लालमिरची पावडर
* हिरवी मिरची पेस्ट
* आलं-लसूण पेस्ट
* गरम मसाला
*  चाटमसाला
* आमचूर पावडर व वरील सर्व आपल्या चवीनूसार
* हिंग मोहरी फोडणीसाठी
* कोथिंबिर
* तेल तळण्यासाठी

कृती :-
प्रथम मैद्यामधे ओवा, मीठ व गारच तूप घालून कोरडेच हाताने एकत्र करावे . ब्रेड चुर्र्या सारखे दिसते.  नंतर हळू हळू गार पाणी घालून एकदम घट्ट मळावे व २० मिनिटे झाकून ठेवावे.

आता कढईमधे १ टेस्पून तेल घालून हिंग-मोहरीची फोडणी करावी. त्यामधे आलं-लसूण  पेस्ट, हिरवी मिरची पेस्ट घालावी. नंतर मटार व पनीर चुरून टाकून थोडे परतावे. मऊ झाले की, ओले खोबरे व साहित्यात दिलेला सर्व मसाला घालून एक वाफ आणावी. हे तयार सारण थंड होऊ द्यावे.

आता आधी मळून तयार केलेल्या मैद्याच्या लिंबाइतक्या आकाराच्या गोळ्या करा व लहान पातळ फुलका लाटावा. त्याचे चाकूने कापून मधून दोन भाग करावेत. एका अर्थ गोलावर चाकूने उभ्या रेषा मारा. त्या रेषा अर्धगोलाच्या शेवटपर्यंत नको. त्यावर दुसरा अर्धगोलाचा भाग ठेवावा व नेहमी प्रमाणे कडाना पाणी लावून कोन तयार करून सारण भरावे. असे सर्व समोसे लाटून तयार करून घ्यावेत.

नंतर पसरट कढईत तेल मध्यम आचेवर गरम करावे. एकावेळी ३-४ समोसे तेलात सोडून मंद, खरपूस तळावे.

खमंग खुसखूषीत तयार समोसा कोणत्याही चटणीसोबत किंवा साँस सोबत खायला द्यावा. चटणीशिवाय खाल्ला तरी छानच लागतो.

टिप:-
* समेासे कधीही एकदम गरम तापलेल्या तेलात तळू नयेत. वरून तळले जातात व आत कच्चे,  मऊ रहातात.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.