'सांजोरी' यालाच सारनोरी, साठोरी असेही म्हणतात.हा पारंपारिक व पौष्टीक पदार्थ आहे. गणेश चतुर्थी मधे गणपतीच्या,महालक्ष्मीच्या नैवेद्याला, दिवाळीच्या लक्ष्मीपुजना दिवशी नैवेद्याला केला जातो.तसेच मुलांना मधल्या वेळचे खाणे, शाळेच्या डब्यात किंवा प्रवासात न्यायला सोयीचा प्रकार आहे.तीन-चार दिवस सहज टिकतो.घरात नेहमी उपलब्ध असणार्या साहित्यात होतो.साहित्य व कृती 👇

साहित्य :-
वरील पारीसाठी
* बारीक रवा १ कप
* मैदा २ टेस्पून
* तेल २ टेस्पून
* चिमुटभर मीठ
* चिमुटभर साखर
* पाणी गरजेनुसार
आतील सारणासाठी
* बारीक रवा १/२ कप
* पीठीसाखर १/२ कप
* तूप २ टेस्पून
* मिल्क पावडर १/४ कप ( ऐच्छीक)
* खसखस १ टीस्पून
* वेलची पूड
*  पाणी गरजेनुसार
* तेल तळण्यासाठी

कृती :-
प्रथम रवा,मैदा मीठ,साखर घालून एकत्र करून घ्यावे. नंतर तेल गरम करून त्यामधे घालून हाताने चोळून घ्यावे.आता गरजे इतकेच थोडे - थोडे पाणी घालून पीठ मळावे.जास्त सैल नको व अती घट्टही नको.मळलेले पीठ एक तास झाकून ठेवावे.

आता सारण तयार करावे. पँनमधे घेतलेल्या एकूण तूपामधले १ टेस्पून तूप घालून रवा गुलाबी रंगावर भाजून घ्यावा.भाजून ताटलीत काढून त्यावर थोडे पाणी शिंपडावे व पांच मिनिट झाकावे. पांच मिनिटानंतर कोमट असतानाच पीठीसाखर,वेलची पूड घालून सारण हाताने एकजीव करावे. आत्ताच सारणात शिल्लक १ चमचा तूप व मिल्क पावडरही घालून मळावे.सारण फार कोरडे वाटले तर किंचित पाण्याचा हात घेऊन मळावे.मिश्रणाचे मुठीत दाबले तर लाडू व्हावेत इतपत ओलसर असावे. आता सारणाचेे हलक्या हाताने साधारण लाडू करून घ्यावे. दाबून फार घट्ट लाडू करू नये.

नंतर आधीच मुरून तयार असलेले पीठ परत एकदा मळून घ्यावे अथवा कुटून घ्यावे. मिक्सर मध्ये थोडे-थोडे घेऊन फिरवून काढावे. या पीठाच्या थोड्या लहान आकाराच्या म्हणजे सारणाचेे लाडू केलेत त्या आकाराचे समान गोळे करून घ्यावेत व एकेक गोळी घेऊन त्यामधे सारणाचा लाडू भरून व्यवस्थित बंद करावे. हलक्या हाताने फार पातळ नाही अशी किंचित जाडसर मोठी पुरी लाटावी व अगदी मंद आचेवर गुलाबी रंगावर तळून घ्यावी.तळताना सारखी उलटवू नये.अलगद तळावी,जेणेकरून फुटणार नाही याची काळजी घ्यावी.

थंड झाल्यावर अतिशय खुसखूषीत खमंग अशी सांजोरी खायला उत्तम लागते. बाजारी पदार्थ आणण्यापेक्षा घरीच असा एखादा सहज सोपा पौष्टीक पदार्थ मुलांना खायला करून ठेवावा.

वर दिलेल्या साहित्या मधे फोटोतल्या आकाराच्या ८ साठोऱ्या होतात.

टिप्स :-
* सारण तयार करताना किंवा पारीसाठी कणिक मळताना पाण्याचाच वापर करावा,दूध नको. दूधामुळे नंतर वास येण्याची शक्यता असते.

* सारणामधे भाजलेला खवा अथवा शिल्लक पेढा घातला तरी चालते.

* सांजोरी तूपावर शॅलोफ्राय केली तरी चालते.  तसेच आधी तव्यावर थोडी भाजून नंतर तेलात तळल्यास तेल कमी लागते.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

आजकाल घरात छोट्या -मोठ्या प्रसंगासाठी म्हणजे वाढदिवस, लग्नाचा वाढदिवस, किंवा न्यू इयर अगदी कांही नसले तरी मुलांना आवडतो म्हणून केक विकत आणला जातो. सहसा केक रोजच्या खाण्यातल्या इतर पदार्थाप्रमाणे घरी करण्याचा कोणी विचार करत नाही. एकतर सामान्य व्यक्ति च्या डोक्यात केक म्हणजे कांहीतरी अवघड पदार्थ आहे,त्यामधे अंडी घालतात त्याशिवाय केक होतच नाही असे व इतर अनेक गैरसमज बसलेले असतात. तसेच आमच्याकडे मायक्रोवेव ओवन नाही ही पण एक समस्या असते. अाणखी मी केलेला केक फुगत नाही, कडक होतो, जाळी पडत नाही असे बरेच मुद्दे येतात. मग त्या वाटेला जायलाच नको. केक म्हणजे केव्हातरी खायचा पदार्थ, अन् कशाला पाहीजे झंझट असे विचार होतात. कारण आपण केक बनविताना त्यातील बारकावे लक्षात न घेता ढोबळमानाने कुठूनतरी वाचून,बघून करतो.मग हवा तसा मनासारखा होत नाही. शेवटी आपण नाद सोडून देतो.

परंतु खरं सांगू? घरात केक बनवायचा तर यातील एकही समस्या येत नाही. फक्त त्याची आपल्याला व्यवस्थित माहीती व कृतीचे बेसिक पक्के नीट माहीत असले पाहीजे. बस्स! कोणतीही अडचण येत नाही.आपण सर्व प्रकारचे केक अगदी वरील आईसिंग सह घरी बनवू शकतो.

आपल्याला जर विकतच्या सारखा मऊ लुसलू़शित स्पाँजी अन् कमी खर्चात ताजा, हायजेनिक केक घरातच करता आला तर मस्तच ना? तर पुढे सांगितलेले कांही बारकावे लक्षपूर्वक वाचा. नक्की तुम्हीसुध्दा घरच्या-घरी मनात येईल तेव्हा केक करू शकाल.अन् खाताना किंवा खिलवताना स्वत: केलेल्या केकचे कौतुक व टेस्ट कांही औरच.

* सर्वात आधी हे लक्षात घ्यावे की, केक बिना अंड्याचाही होऊ शकतो.

* केक करण्यासाठी घरात मायक्रोवेव ओवनच असला पाहीजे असे नाही.कुकरमधे अथवा कढई मधे केक करता येतो.कुकर/ कढईच्या तळाला वाळू किंवा बारीक मीठ पसरावे व त्यावर गोल स्टील रींग किंवा टेबलवर गरम भांडी ठेवण्यासाठीचे स्टँड ठेवावे व त्यावर केक टीन ठेवावा.कढईवर मापाचे जड झाकण ठेवावे.जर कुकर असेल तर शिट्टी काढावी व ओवनप्रमाणे १० मिनिट प्रीहीट करावे.देशी ओवन तयार!

आता केकची सुरवात -

* आता सर्वात प्रथम केक रेसिपी काळजीपूर्वक वाचून/ऐकून घ्यावी. त्यामधे दिलेले सर्व साहित्य दिलेल्या प्रमाणात आपल्याकडे उपलब्ध आहे का? याची खातरजमा करावी. कांही पदार्थ पुरेसे नसतील किंवा उपलब्ध नसतील तर आधीच  त्या साहित्याची जुळवाजुळव करावी.तडजोड अजिबात नको. नाहीतर अपेक्षेप्रमाणे केक होत नाही.

* केकसाठी लागणारे सर्व पदार्थ ताजेच असावेत. खासकरून मैदा,बेकींग पावडर, सोडा.

* केकसाठी लागणारे बटर,दूध,मिल्कमेड रूम टेंपरेचरचे असावे. फ्रिजमधले गार नको.

* आपण ज्या प्रकारचा केक करणार आहे, त्याला लागणारे सर्व साहित्य आधी एका ठिकाणी एकत्र काढून घ्यावे. म्हणजे एखादा पदार्थ विसरत नाही. नेमका सोडाच विसरला बघा... बाकी सर्व सांगितल्याप्रमाणे केले हो! ☺ असे होत नाही.

* रेसिपीत सांगितल्याप्रमाणेच अचूक मोजून मापून सर्व पदार्थ घ्यावेत. केेकमधे प्रमाणाला खूप महत्व आहे. अंदाजे कांही नको.

* आता साहित्याची इतकी सर्व जमवाजमव केल्यावर बँटर तयार करण्याआधी केकचा डबा बटर पेपर लावून किंवा मैद्याचे डस्टींग करून तयार करून ठेवावा.म्हणजे तयार बँटर पट्कन ओतता येते.

* मायक्रोवेव ओवन असेल तर त्यामधे लोअर रँक ठेवून 180 ° तापमानाला प्रीहीटला लावावा.  कढई /कुकर असेल तर ते ही मध्यम आचेवर १० मिनिटे गरम करण्यास लावावे. केक  बेक करण्यासाठी ओवन आधी गरम करणे गरजेचे असते. जसे पोळी भाजताना तवा आधी गरम असावा लागतो तसे.

* आता एका योग्य आकाराच्या बाऊलमधे केक साहित्यातील कोरड्या वस्तु चाळून घ्या. यामुळे कांही कचरा, गुठळ्या,साखरेतील मोठे कण असतीेल तर निघते व मैद्यामधे हवा गेल्याने केक हलका होतो. 

* ओले साहित्य म्हणजे बटर,दूध इत्यादी वेगळ्या बाऊलमधे एकत्र करावे.मात्र जेव्हा कोरडे व ओले साहित्य एकत्र करतो तेव्हा मिश्रण गरजेपेक्षा जास्त वेळ न ढवळता पटकन् आधीच तयार केलेल्या केक डब्यात घालून ओवनला लावावे. नाहीतर फुलण्याची क्रिया बाहेरच होते व प्रत्यक्षात बेक केल्यावर फुलत नाही.

* रेसिपीत सांगितलेल्या वेळेनंतरच ओवन किंवा कुकर उघडावा मधे- मधे उघडून बघू नये.केक बसतो.

* केक तयार झाल्यानंतर एकदा टूथपिकने चेक केल्यावर पांच मिनिट केक आतच राहू द्यावा. वाफ मुरू द्यावी.याला स्टँडींग टाईम म्हणतात. याने केक चिकट रहात नाही.

* बाहेर काढल्यावर केकचे भांडे गार झाल्यावर, कडा सुरीने सोडवून नंतर वायर रँकवर, व  नसेल तर घरातील पीठाच्या चाळणीवर काढून ठेवावा व पुर्णपणे गार होऊ द्यावा. म्हणजे खालून चिकट न रहाता सर्व बाजूने हवेने गार होतो.नंतर कापावा.

* या केकवर आईसिंग करायचे असेल तर केक फ्रिजमधे ठेवून चांगला गार करावा अथवा शक्य असल्यास आदल्यादिवशी करून फ्रिजमधे ठेवावा. तरच केकचे डेकोरेशन आकर्षक होते. नाहीतर क्रिम पघळते डिजाइन नीट होत नाही.

आपण वरील सर्व मुद्दे विचारात घेऊन जर काळजीपूर्वक केक केला तर अतिशय उत्कृष्ट केक घरी होतो व एकदा जमला की आत्मविश्वास वाढतो. मग आपण हौसेने वरचेवर केक करतो व सराईतपणा येतो.

स्वादान्न 🙏

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

'इन्स्टंट ढोकळा' हा नाष्ट्याला, डब्यात देण्यासाठी किंवा अचानक कोणी पाहुणे घरी आले असता चहासोबत देण्यासाठी खमंग असा सोपा व झटपट होणारा हा पदार्थ आहे.

साहित्य :-
* बेसन १ कप
* बारीक रवा १ १/२ टेस्पून
* सायट्रीक अँसिड १/२ टीस्पून
* साखर १ टेस्पून
* मीठ १/४ टीस्पून
* इनो फ्रूट साॅल्ट १ टेस्पून
* आलं, मिरची पेस्ट १ टीस्पून
* हळद चिमूटभर
* तेल १ टेस्पून
* पाणी १ कप
* फोडणी साहित्य तेल, हिंग, मोहरी, तिळ, कढीपत्ता

कृती :-
प्रथम गँसवर कुकर पाणी घालून गरम करण्यास ठेवावा. नंतर एका बाऊलमधे बेसन घेऊन त्यामधे इनो सोडून,रवा व इतर सर्व साहित्य मिसळावे.

नंतर गुठळ्या होणार नाहीत याची दक्षता घेत थोडे -थोडे पाणी घालावे व मिश्रण तयार करावे.

सर्वात शेवटी इनो पावडर घालून मिश्रण ढवळावे व झटपट तेलाने ग्रीस केलेल्या थाळीत ओतून ढोकळा स्टँड कुकरमधे ठेवावे. १५-२० मिनिट शिट्टी न लावता वाफवावे.

थंड झाल्यावर बाहेर काढून हींग,मोहरी,तिळ, कढीपत्ता घालून फोडणी करावी व तयार ढोकळ्यावर घालावी.

वरून सजावटीसाठी कोथंबिर घालून खाण्यास द्यावा.

टिप:
* दिलेल्या साहित्यापैकी फक्त कोरडे साहित्य एकत्र करून बरणीत भरून ठेवले तर दोन महीन्यापर्यंत टिकते व ऐनवेळी पटकन् ढोकळा करता येतो.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

रोजच नाष्टा काय करावा?  संध्याकाळी काय खायला द्यावे? मुलांना डब्यात काय देऊ?  तर असे कधीतरी सैंडविच करावे. घरात उपलब्ध असतील त्या भाज्या घालून करायचे.

साहित्य :-
* ब्रेड स्लाइस चार
* मेयाेनिज साँस २ टेस्पून
* गाजर किसून १
* टोमँटो, कांदा बारीक चिरून अर्धी वाटी
* शिमला मिरची लहान एक बारीक चिरून
* कोबी मुठभर चिरून
* मिरपूड
* चिलीफ्लेक्स
* सॅडविच मसाला किंवा मिक्स हर्ब्स
* चीज क्यूब २ ( ऐच्छीक)
* बटर (ऐच्छीक)

कृती :-
प्रथम ब्रेडच्या कडा कापून घ्याव्यात. ब्रेड ताजा, मऊ असेल तर नाही कापल्या तरी चालतात.

नंतर एका बाऊलमधे चिरलेल्या भाज्या एकत्र कराव्यात.

आता त्यामधे मेयाेनिज, थोडी मिरपूड घालावी. मिश्रण तयार झाले.

आता ब्रेड स्लाईस घेऊन एकावर टोमँटो साँस पसरावे व दुसर्यावर तयार मिश्रण पसरावे. मिश्रणावर चिलीफ्लेक्स, मिक्स हर्ब्स,मिरपूड भुरभुरावी. वरून चिज किसून घालावे. साँस लावलेला स्लाईस त्यावर ठेवावा व तिरके कापून  सर्व्ह करावे. आवडत असल्यास वरून बटर लावून तव्यावर भाजून टोस्ट केला तरी चालतो.  परंतु टोस्ट केला तर लगोलग गरमच खावा. डब्यात द्यायचा असेल तर टोस्ट संँडविच गार झाले की चिवट होते.

साहित्य घरात उपलब्ध असेल तर असे झटपट सॅडविच छान होते. भाज्यांच्या जोडीला वाफवलेले मोडाचे मूग, मक्याचे दाणे घातले तरी चालते.  पांढर्या ब्रेड ऐवजी ब्राउन ब्रेड वापरला तर अजून पौष्टीक होते. तुम्हीही करून बघा सहज सोपा पदार्थ आहे.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

खमंग कांही खावे वाटले किंवा बाहेर पाऊस पडायला लागला की आपल्याला हमखास कांदा भजीची आठवण येते. तर याच पारंपारिक कांदभजी प्रकारातील पण थोडासा वेगळा ओनियन रिंग्स हा पदार्थ आहे.  करायला एकदम सोपा व खायला खमंग असा आहे.  तर कसे करायचे साहित्य व कृती-👇

साहित्य :-
* मोठे कांदा १
* मैदा १ वाटी
* काँर्नफ्लोअर १ टेस्पून
* ताक १ वाटी
* मीठ चवीनुसार
* धना-जीरा पावडर १ टीस्पून
* हींग चिमूटभर
* लाल मिरचीपूड १ टीस्पून
* काळी मिरी भरड अर्धा टीस्पून
* सोडा चिमूटभर
* तेल तळण्यासाठी गरजेनुसार
* चाट मसाला वरून घालण्यासाठी

कृती :-
प्रथम कांदा साल काढून गोल आकाराच्या व साधारण पाव इंच रूंद चकत्या कापून घ्यायच्या.  नंतर फोटोत दाखविल्या प्रमाणे त्याच्या एक -एक रिंग ⭕ हाताने सुट्या कराव्यात.

आता त्या रिंग्जवर थोडासा मैदा व चिमुटभर काँर्नफ्लोअर घालून हाताने सर्व रिंग्जना चोळून घ्यावे.

नंतर एका भांङ्यामधे मैदा व काँर्नफ्लोअर एकत्र घेऊन त्यामधे वरील सर्व मसाला मिसळावा. तसेच ताकही एकदम न घालता थोडे थोडे घालून कालवावे. गुठळ्या रहाणार नाहीत याची काळजी घ्यावी व बँटर तयार करावे.

शेवटी कांद्याच्या एकेक रिंग घेऊन तयार बँटरमधे बुडवून गरम तेलामधे तांबूस तळून काढाव्यात.

तयार ओनियन रिंग्ज एका डिशमधे घेऊन वरून चाटमसाला भुरभुरावा.  मस्त कुरकुूरीत ओनियन रिंग्ज तयार.

टिप्स :
* या रिंग्ज पीठात बुडवून नंतर ब्रेडक्रम्स मधे घोळवून तळले तर अधिक कुरकुरीत होतात.
* पीठामधे आवडीनुसार आलं-लसूण हिरवी मिरची पेस्ट घालावी.
* गरम असतानाच खावीत. थंड झाले की त्याचा क्रिस्पीनेस कमी होतो.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

साधारण ख्रीरीसारखाच हा पदार्थ आहे. आजकालच्या पध्दतीनुसार डेजर्ट म्हणून थंड स्वरूपात खाल्ला जातो. मात्र आमच्याकडे गरम व खीर म्हणून जेवणात पोळीसोबत खायला आवडते. आपल्या आवडीनुसार कसेही खावे. आहे मात्र झकास पदार्थ. साहित्य व कृती-👇

साहित्य :-
* बासमती तांदुळ १/४ कप
* दूध अर्धा लिटर
* मँगो पल्प २ आंब्याचा
* साखर अर्धा कप (आवडीनुसार कमी-जास्त)
* तूप १ टीस्पून
* वेलचीपूङ
* काजू, बदाम काप

कृती :-
प्रथम दूध एका पातेल्यात गरम करण्यास ठेवावे. दूध उकळू लागल्यावर मधे मधे ढवळत रहावे.

दूध उकळून थोडे घट्ट होईपर्यंत दोन आंब्याचा गर काढून ब्लेडरने घुसळून तयार करावा. तसेच तांदुळ धुवून, तूपावर थोडे परतून मिक्सरमधे  भरड वाटून घ्यावेत.

आता दूध चांगले उकळून दाट झालेले असेल त्यामधे वाटलेले भरड तांदुळ घालून पांच मिनिट उकळू द्यावे. शिजले की त्यामधे साखर, वेलचीपूङ घालून गँस बंद करावा.  पांच मिनिटानंतर तयार केलेला मँगो पल्प घालावा व एकत्र ढवळावे. शेवटी वरून काजू, बदाम चे काप घालावेत. मँगो फिरनी तयार!

आवडीनुसार थंड अथवा गरम खा.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

सकाळच्या घाईमधे रोज नाष्टा काय करावा हा प्रश्न नेहमीच पडतो.  बरं, नाष्टा पौष्टीक हवे,  झटपट होणारा हवे व सर्वाना आवडणारा पाहीजे. तर या सर्व मापात बसणारा ढोकळा हा उत्तम पदार्थ आहे. याचे प्रीमिक्स तयार करून ठेवले तर सकाळी किंवा संध्याकाळी चहासोबत आपण पट्कन ढोकळा बनवू शकतो.तसैच मुलांना डब्यात ही देता येतो. तर प्रीमिक्स कसे करायचे साहित्य व कृती-👇

साहित्य :-
* तांदुळ १ कप
* चणा डाळ १/२ कप
* उडीद डाळ १/४ कप
* साखर १/ ४ कप
* मीठ १ टेस्पून
* सोडा १ टेस्पून
* सायट्रीक अँसिड १ टेस्पून

ढोकळ्यासाठी साहित्य
* प्रीमिक्स १ कप
* पाणी १ कप
* चिमुटभर हळद
* हिरवी मिरची,आलं पेस्ट १ टीस्पून
* फोडणीसाठी तेल,हिंग,मोहरी,तिळ, कङीपत्ता
* सजावटीसाठी कोथिंबीर

कृती :-
प्रथम तांदुळ व दोन्ही डाळी एकत्र करून मिक्सरमधे पावडर करून घ्यावे.

नंतर मीठ, साखर, सोडा व सायट्रीक अँसिड एकत्र करून मिक्सरमधे पावडर करा.

आता वरील दोन्ही पावडरी एकत्र करून हलकेच एकदा मिक्सरमधून फिरवून घ्यावे.

तयार झालेले प्रीमिक्स हवाबंद डब्यात भरून ठेवावे.  एक महीन्यापर्यंत टिकते.  गरजेनुसार प्रीमिक्स घेऊन ढोकळा बनवावा.

प्रीमिक्स ढोकळा कृती :-
प्रथम ढोकळा कुकरमधे तळाशी गरजेइतके पाणी घालून गरम करण्यास ठेवावे.  ढोकळा पात्राला तेलाचा हात लावून घ्यावा.

आता प्रीमिक्स एका बाऊलमधे घेऊन त्यामधे हळद व मिरची, आलं पेस्ट घालावी व गुठळ्या होणार नाहीत याची दक्षता घेत पाणी घालून ढवळावे.  तयार मिश्रण झटपट ढोकळा पात्रात ओतून, ढोकळा स्टँड कुकरमधे ठेवावे. पंधरा मिनिट वाफवावे.

आता ढोकळा वाफेपर्यंत फोडणी तयार करून ठेवावी.  ढोकळा वाफून तयार झाला की, थोडा थंड झाल्यावर एका थाळीत काढावा, त्यावर फोडणी चमच्याने पसररावी व वरून कोथिंबीर घालून कापून ढोकळा चटणीसोबत खायला द्या.

टिप्स :
* प्रेशर कुकर मधे करणार असाल तर रींग व शिट्टी काढावी.
* डाळी व सोडा, साखर वगेरे सांगितल्याप्रमाणे वेगवेगळेच बारीक करावे, अन्यथा पीठात गुठळ्या होऊ शकतात.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

उन्हाळ्याचे दिवसात थंडगार सरबत, लस्सी, निरनिराळे ज्यूस, फ्रूटशेक अशी पेयं प्यायला छान वाटतात. पण बाजारी पेये पिण्याऐवजी घरच्या घरी केली तर खूपच उत्तम. अन् थोडी पुर्वतयारी ठेवली तर घरी झटपट करणेही अवघड नसते. बर्याच निरनिराळ्या स्वादामधै फालुदा बनवला जातो. जसे केसर बदाम, कस्टर्ड फालुदा,  शाही फालुदा फ्रूट फालुदा इत्यादी..!तर आज मी मँगो फालुदा केला साहित्य व कृती-👇

साहित्य :-
* तापवून गार केलेले दूध अर्धा लिटर
* पिकलेले आंबे २+२
* भिजवलेले सब्जा बी २ टेस्पून
* फालुदा शेवया किंवा साध्या शेवया अर्धा कप
* रोज सिरप अर्धा कप
* साखर २ टेस्पून
* व्हँनिला किंवा मँगो आईस्क्रीम
* टुटीफ्रूटी सजावटीसाठी
* ड्रायफ्रूट्स ऐच्छिक
इतक्या साहित्यामधे फोटो मधील साईजचे ५ ग्लास फालुदा होतो.

कृती :-
प्रथम दोन आंब्याचा पल्प तयार करून घ्यावा.  व राहीलेले दोन आंबे साल काढून लहान चौकोनी तुकडे करावेत.  यातील थोडे सजावटीसाठी बाजूला ठेवून बाकीचे तुकडे व साखर गार दूधामधे घालून ब्लेडर ने घुसळावे व मिल्कशेक तयार करून घ्यावा.

आता शेवया साध्या असतील तर गरम पाण्यात टाकून मऊ करून ध्याव्यात.  नंतर वरून गार पाणी घालून गाळून घ्याव्यात.

आता सर्व साहित्याची जमवा जमव झाली असेल तर छानपैकी एक मोठा काचेचा ग्लास घ्यावा.  त्यामधे सर्वात आधी तळाला एक चमचा रोज सिरप नंतर अनुक्रमे एकेक चमचा सब्जा बी,  शेवया, मँगो पल्प घालावे. परत असाच अजून एक लेयर तयार करून मग ड्रायफ्रूट्स व मिल्कशेक घालावा.  शेवटी आईस्क्रीम घालून वर टुटीफ्रूटी व आंब्याचे क्यूब सजावटीसाठी घालावे.

थंडगार सर्व्ह करावे.

टिप :-
* सर्व साहित्य आधीच तयार करून फ्रिजमधे थंड होण्यासाठी ठेवावे ऐनवेळी ग्लास मधे सर्व साहित्य एकत्र करून द्यावे.
* साखर आवडीनुसार कमी-जास्त करावी.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

चाट मधे पुरी नेहमीच वापरली जाते. तर थोडा वेगळा व आकर्षकपणा साठी ही चाटची कटोरी केली जाते. तसेच लहान मुलांची बर्थ-डे पार्टी किंवा घरी कोणी पाहुणे येणार असतील तर थोडा वेगळा म्हणून या कटोरी मधून चाट सर्व्ह करता येते. तसेच या कटोर्या आधीच करून हवाबंद डब्यात ठेवता येतात. त्यामुळे ऐनवेळी पटकन् हे चाट करता येते. तर कटोरीचे साहित्य व कृती-👇

साहित्य :-
* मैदा १ कप
* मीठ चिमूटभर
* ओवा पाव टीस्पून
* मोहनसाठी गरम तेल २ टेस्पून
* तळणीसाठी आवश्यक तेवढे तेल
* पाणी
एवढ्या साहित्यात फोटोत दाखविलेल्या आकाराच्या पांच कटोर्या तयार होतात.

कृती :-
प्रथम मैदा चाळून एका पसरट भांड्यामधे घ्यावा  व त्यामधे मीठ, ओवा मिसळावा.

नंतर त्यामधे तेल गरम करून घालावे व पीठाला हाताने चोळावे.  आता अंदाज घेत पाणी घालून घट्ट पीठ मळावे.  दहा -पंधरा मिनिट झाकून ठेवावे. अंदाजे फक्त पाव कपच पाणी पुरते.

आता मंद आचेवर तेल गरम करावे. पीठाची लहान गोळी घ्यावी व मध्यम जाडीची पुरी लाटावी.  त्यावर काटेचमच्याने टोचावे व एक वाटी त्यावर ठेऊन तिला पुरी लपेटावी व वाटीसह गरम तेलात सोडावी व मंद आचेवरच तळावी.  तळताना हळू हळू झार्यान वाटीवर े तेल उडवावे वाटी सुटून येते ती चिमट्याने अलगद बाहेर काढा.  आता तेलातील पीठाची वाटी उलट-सुलट तांबूस रंगावर तळावी. (अधिक सविस्तर कृतीसाठी फोटो पहा)

तयार कटोर्या थंड झाल्यावर हवाबंद डब्यात भरून ठेवाव्यात. छान खुसखूषीत कडक रहातात. चाट करण्याचे वेळी पुरी घेऊन त्यामधे चाटचे सर्व साहित्य भरले की झाले कटोरी चाट!

टिप :-
* कटोरी अगदी मंद आचेवरच तळावी.
* पुरी फार पातळ अथवा जाड लाटू नये. फार पातळ लाटली तर हाताळणीमधे  कटोरी मोडते व लगेच चाट मऊ पडते. व फार जाड ठेवली तर कटकटीत होते व खाताना चाट चांगले लागत नाही. चाटची कटोरी नेहमी खुसखूषीतच असावी.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

विविध चाट प्रकारापैकी हा एक चाटचा प्रकार आहे.  चटपटीत खायला सर्वानाच आवडते. या चाटच्या कटोरी आकारामुळे मुलांना जास्त आकर्षक वाटतो. यातील कटोर्या आपण आधीच करून हवाबंद डब्यात ठेऊ शकतो. ऐनवेळी फटाफट चटण्या व सर्व साहित्य घालून सर्व्ह करायचे. तर हे कटोरी चाट कसे करायचे साहित्य व कृती-👇

साहित्य :-
* भिजवलेले छोले हरभरे १ वाटी
* बटाटे २ नग
* बारीक चिरलेला कांदा
* टोमँटो चिरून
* कोथिंबीर
* गोड व तिखट चटणी
* दही
* नायलाँन शेव
* भाजलेल्या जिर्याची पावडर
* चाट मसाला
* लाल मिरचीपूड
* मैद्याची तयार कटोरी 

कटोरी कशी करायची? पुढील लिंकवर पहा 👇 

http://swadanna.blogspot.in/2018/04/chaat-katori.html?m=1

कृती :-
प्रथम छोले व बटाटे मीठ, हळद घालून कुकरला उकडून घ्यावेत. तोपर्यंत बाकीचे साहित्य म्हणजे कांदा, कोथिंबीर चिरून, चटण्या तयार करून घ्याव्यात.

आता एका डिशमधे तयार कटोरी घ्या. त्यामधे सर्वात आधी उकडलेला बटाट्याच्या फोडी, छोले घालावेत. त्यावर चाटमसाला, जिरेपूड भुरभुरावी. दोन्ही चटण्या व दही घालावे.  त्यावर चिरलेला कांदा, टोमँटो घालावे. परत त्यावर चाटमसाला, जिरेपूड भुरभुरावी दोन्ही चटण्या, दही घालावे. शेवटी वरून भरपूर शेव व कोथिंबीर घालावी व खायला द्यावे.  यात आपल्या आवडीनुसार साहित्य कमी-जास्त भरावे.

टिप :-
* छोले, बटाच्याऐवजी मोड आलेले मूग किंवा गाजर, कोबी सारख्या भाज्या घेतल्या तरी चालतात. अधिक पौष्टीक होते.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.