एखादा मोठा उपवास म्हणजे आषाढी-कार्तिकी एकादशी, महाशिवरात्र असेल तर घरात लहान-थोर सर्वचजण करतात. आपणही मग त्यानिमित्ताने चार उपवासाचे वेगवेगळे पदार्थ बनवतो. पण होते काय शाबू वडा, थालीपिठ, वेफर्स असे चटपटीत पदार्थ लगेच संपतात व एखाद वेळी वरीचा भात (भगर) शिल्लक रहातो. परंतू दुसर्या दिवशी आधिच शिळे व त्यात परत उपवासाचे असे काही खायला नकोसे होते. व या महागाईच्या दिवसात वाया घालवणे पटत नाही. कालच एकादशी झाली. थोडा वरीचा भात उरला , विचार केला व द्वादशीच्या इतर साग्रसंगीत जेवणासोबत त्याची भजी करून टाकली ! मी-तू करून सर्वानी फस्त केली...कशी केली बघा.

साहीत्य :-

1) शिजलेला वरीचा भात(भगर) 2 वाट्या
2) मिरची, आल-लसूण पेस्ट
3) कोथंबिर बारीक चिरून
4) चना डाळ पिठ 2 टेस्पून
5) तांदूळ 1 टेस्पून
6) मीठ चवीला
7) धना-जिरा पावडर 1टीस्पून
8) हिंग चिमूटभर
9) तेल तळणीसाठी

कृती :-

    प्रथम वरीचा भात हातानेच चूरून घ्यावा. पण जर भात कोरडा व फडफडीत असेल तर पाण्याचा हबका मारून कुकरला एक वाफ आणून घ्या किवा मिक्सरला एकदा थोडे फिरवून घ्या.

नंतर मऊ केलेल्या भातात वर दिलेल्या साहीत्यातील सर्व मसाला व पीठं घालावित व हातानेच नीट एकजीव करावे. हाताने तेलात भजी सोडता येतील इतपत सैलसर पीठ ठेवावे. गरज वाटली तर डाळ किवा तांदुळचे पीठ कमी-जास्त करा किवा पाणी घाला.

आता तयार मिश्रणाची लहान-लहान भजी गरम तेलात सोडून मंद आचेवर तळा. तळून टिश्यू पेपरवर काढा.

मस्त कुरकरीत भजी तयार. कशीही खा ! जेवणात खा किंवा चटणी- साॅस काही घेऊन नुसतीच खा. मस्तच लागतात.

टिप :- या भजीला सोडा किवा गरम तेल पोटात घालण्याची अजिबात गरज नाही. तांदुळच असल्याने अतिशय हलकी व कुरकूरीत होतात.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

पोळी-भाजी खायचे म्हणले की, मुलांच्या अगदी जीवावर येते. कशी बशी थोडीशी भाजी खाल्ली जाते. त्यातून आवडीची भाजी म्हणजे बटाटा, फ्लाॅवर किंवा मटकीची उसळ असेल तर जरा ठिक. पण शेंगवर्गीय भाज्या किवा भोपळा वगेरा तर अजिबातच नको. परंतू याच भाज्या वापरून पावभाजी केली तर खाल्ली जाते. म्हणून तोच विचार करून व सर्वच भाज्या थोड्या-थोड्या होत्या तर, मी थोडे पौष्टीक पण चटपटीत व्हेज ओट्स कटलेट केले. कसे पहा.

साहीत्य

1) कोबी किसून 1 वाटी
2) सिमला मिरची मध्यम 2-3
3) बिन्स बारीक चिरून 1 वाटी
4) दुधी फोडी चिरून 1 वाटी
5) गाजर किसून 2नग
6) मध्यम आकाराचे बटाटे उकडून दोन
7) हिरवी मिरचो, आले-लसूण पेस्ट
8) कांदा बारीक चिरून
9) तेल एक टेस्पून
10) मीठ चवीला
11) पावभाजी मसाला 2 टीस्पून
12) चाट मसाला अर्धा टीस्पून
13) हळदपूड अर्धा टीस्पून
14) प्लेन ओट्स एक वाटी
15) शॅलो फ्राय करण्यासाठी बटर किवा तेल आवडीनुसार

कृती :-

      प्रथम सर्व भाज्या व बटाटे वाफवून घ्यावे.
वाफवलेल्या भाज्या एका चाळणीवर ओतून त्यातील जादाचे पाणी काढून टाकावे.

आता एक टेस्पून तेल गरम करा व आलं-लसूण पेस्ट हळद घाला मग त्यात कांदा टाकून मऊ होईपरेंत परतावा.

नंतर उकडून घेतलेल्या सर्व भाज्या व बटाटा हातानेच किवा मॅशरने मॅश करून त्यावर घाला. नंतर त्यामधे मीठ, चाट मसाला, पावभाजी मसाला सर्व घालून एक-दोन परतण्या देऊन गॅस बंद करा.

थंड झाले की त्यात ओट्स घालून हाताने चांगले एकजीव करावे.ओट्समुळे पौष्टीक तसेच चिकटपणा येतो व सर्व भाज्या नीट एकत्र गोळा होण्यासपण मदत होते. ओट्स नसतील तर पातळ पोहे वापरले तरी चालतात. मळून दहा मिनीट झाकून ठेवा. मिश्रण आळून घट्टसर होते.

आता वरील मिश्रणाचे लिंबाएवढे लहान गोळे करून कटलेटचे साचे मिळतात. हव्या त्या आकारात थापून घ्या. किवा हातानेच लहान साधारण चपटे गोळे केले तरी चालते.

नंतर तयार गोळे पॅनमधे थोडे-थोडे बटर सोडून उलटे-पालटे तांबूस रंगावर शॅलोफ्राय करा.

असे गरमा-गरम तयार कटलेट हिरवी-लाल चटणी किवा साॅस सोबत सर्व्ह करा

टीप :- भाज्या आपल्या आवडीने व उपलब्द असतील त्या घ्याव्यात.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या. 

माझी आई मोठी सुगरण होती. वारसाहक्काने काहीशा प्रमाणात तो गुण आम्हा मुलींकडे आला. माझी आई जशी सुगरण तसे वडील खवैय्ये! त्यामुळे आईला नवनवे पदार्थ करण्याला प्रोत्साहन मिळत गेले. कुठेही बाहेर किवा कोणाकडे नविन एखादा पदार्थ खाल्ला आणि आवडला तर आई शक्य असेल तर लगेच रेसिपि जाणून घेत असे. नसेल शक्य म्हणजे हाॅटेल वगेरे असेल तर चवि वरून त्यात काय-काय पदार्थ वापरेत ओळखून हुबेहूब चव साधत असे.लगेच घरी दुसरे दिवशी प्रयोग होत असे. तसेच हा 'सुशिला' नावाचा साधारण आपल्या कांदापोह्या सारख्या चविचा पण चिरमुर्याचा पदार्थ आहे. जास्त करून कर्नाटकमधे केला जाणारा पदार्थ आहे. आम्ही लहानपणी कर्नाटक, रायचूर येथे  वडीलांच्या नोकरी निमित्त होतो. तेव्हा आईला शेजारणी कडून माहीत झाला. तेव्हापासून चिरमुरे उरून मऊ पडले की वाया जाऊ नयेत म्हणून नेहमीच आमच्याकडे केला जातो. कसा केला जातो कृती पहा.

साहीत्य :-

1) चिरमुरे
2) कांदा, मिरची, कडीपत्ता,
3) ओलं खोबरे खवून, लिंबू
4) कोथंबिर
5) मिठ चविला व साखर ऐच्छिक
6) शेंगदाणे आवडत असल्यास
7) तेल
8) फोडणी साहीत्य

कृती :-

      चिरमूरे चाळून स्वच्छ करून चाळणीत घ्यावेत. त्यावर अगदी थोडे पाणी शिंपडून म्हणजे चिरमुरे शोषून घेतिल इतकेच पाणी शिपडून मऊ करावेत.

आता कढईत तेल गरम करून फोडणी करा. नंतर त्यात शेंगदाणे तळा व आता चिरलेला कांदा , मिरची व कडीपत्ता घालून परतावे.

परतून कांदा साधारण मऊ झाला की , आता त्यात भिजलेले चिरमुरे घाला व चविला मीठ, साखर घालून नीट हलवा.झाकण ठेवून एक वाफ आणा.

आता गॅस बंद करून वरून सजावटी साठी लिंबू, खोबरे व कोथंबिर घालून गरमा-गरम खायला द्या .

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

संध्याकाळचे वेळी चहा सोबत आपल्याला काहीतरी चटपटीत पण हेल्दी असे खाण्याची इच्छा होते.तेव्हा ही टिक्की नक्की ट्राय करा एकदम सोपी, झटपट व पौष्टीकपण ! कशी करायची पहा..

साहीत्य :-
1) मेथी धुवून बारीक चिरून 2 वाट्या
2) पातळ पोहे 1 वाटी
3) उकडलेला बटाटा 2
4) कांदा 1 बारीक चिरून
5) कसूरी मेथी 2 टीस्पून
6) आल,लसूण हिरवी मिरची पेस्ट आवडीनुसार
7) गरम मसाला 1/2 टीस्पून
8) आमचूर पावडर 1 टीस्पून
9) धना-जिरा पावडर 1 टीस्पून
10) मीठ चवीनुसार
11) हींग,हळद व जिरे-मोहरी फोडणीसाठी
12) तेल 1टेस्पून फोडणीसाठी
13) तळणीसाठी गरजे इतके
14) मैदा 1 टेस्पून

कृती :-

       प्रथम पॅनमधे फोडणीसाठी तेल घालून जिरे ,मोहरी व हींग, हळद घालून फोडणी करून घ्यावी. फोडणीत कांदा व आल-लसूण,मिरची घालून परतावे.मऊ झाला कांदा की नंतर त्यात चिरलेली मेथी , कसूरी मेथी व उकडलेला बटाटा घालून परता.

आता त्यात गरम मसाला, मीठ, आमचूर पावडर,धना-जिरा पावडर सर्व साहीत्य घालून नीट हलवा व एकजीव करा. गॅस बंद करा.नंतर
त्यात पोहे थोडे(पाव वाटी) शिल्लक राखून बाकीचे घाला व एकजीव करा.आता थंड होऊ दे.

थंड झाल्या नंतर आपल्या आवडीप्रमाणे साधारण मोठ्या लिंबा एवढे चपटे गोल गोळे करावेत. व मैदा घेऊन त्यात पाणी घालून पातळ पेस्ट बनवून घ्या.त्यात एक-एक गोळे बुडवून काढा व शिल्लक पोहे डिशमधे पसरा व त्यात घोळवा.

गरम तेलात मंद तांबूस रंगावर तळून काढावेत.
मस्त क्रिस्पि टिक्की तयार! चहा सोबत किवा हिरव्या चटणी सोबत,साॅससोबत कशासोबत पण आपल्या आवडीप्रमाणे खावे.

टीप :- तळण्याऐवजी शॅलोफ्राय केले तरी चालते. पण शॅलोफ्राय करायचे असेल तर पोह्यामधे घोळवण्याऐवजी ब्रेडक्रम्स किवा रव्यात घोळवावे व मग शॅलोफ्राय करावे.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

पुदीना ही कोथिंबिर वर्गातील वनस्पति आहे. पुदीन्याचा गंध व रंगच कसा मनाला तरतरी आणणारा आहे! हा गुणाने थंड आहे.तसेच सहजासहजी कुठेही,अगदी कुंडीतसुध्दा लावला तर विनासायास येऊ शकतो. पुदीना पाचक आहे.याच्या सेवनाने भुक लागते. अपचन,मळमळ, पोटदुखी कमी होते. आणखी बरेच औषधी गुणधर्म आहेत. पुदीना चटणी, रस्सा, पुलाव, सरबत, अशा खुप काही पदार्थात वापरतात.पण फारसा रोजच्या जेवणात वापरला जात नाही व भरपूर प्रमाणात पोटात जात नाही. म्हणून मी आज त्याचे पराठे बनवणार आहे.अतिशय रूचकर लागतात. हे दोन प्रकारानी बनवता येतात. एक म्हणजे कोरडी पुदीना पावडर वापरून.व दुसरा ताज्या हिरव्या पुदीन्याचे.मी ताज्या पुदीन्याचे केलेत.कसे ते पहा.

साहीत्य :-

1) कणिक 2 वाट्या
2) पुदीना धुवून ,बारीक चिरून 1 वाटी
3) हिरवी मिरची, आलं ,लसूण पेस्ट 1 टीस्पून
4) कोथंबिर उपलब्धततेनुसार
5) धना-जिरा पावडर 1 टीस्पून
6) हळद,हींग,लाल मिरची पुड, गरम मसाला
7) मीठ चवीनुसार
8) तेल आत घालण्यासाठी 1टेस्पून
9) बटर/तूप भाजण्यासाठी
10) पाणी पीठ मळण्यासाठी

कृती :-
       प्रथम अर्ध्या पुदीन्याची व कोथंबिरची पेस्ट करून घ्यावी.

आता कणिक घेऊन त्यात राहीलेला पुदीना, कोथंबिर व वरील सर्व मसाला घालावा.थोडे तेलही पीठ मळताना घालावे.मळून अर्धा तास झाकून ठेवावे.

अर्ध्या तासाने घडीच्या पोळीप्रमाणे मधे तेल लावून घडी करून थोडे जाडसरच पराठे लाटावेत. तव्यावर दोन्ही बाजूने बटर किवा तूप सोडून खरपूस भाजावेत.

असे गरमा-गरम खरपूस पराठे कोणत्याही कोरड्या अथवा ओल्या चटणी सोबत, लोणच्या सोबत किवा नुसतेही चहा बरोबर खायला चवदार लागतात. तसेच मुलांना डब्यात द्यायलापण सोईचे!

टीप :- पुदीना व कोथंबिर वाटून घेतल्याने पराठ्याना रंग व स्वाद खूप छान येतो.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

रोज तीच ती पोळी भाजी खाऊन कंटाळा येतो. पण मंडईत पण ज्या सिझनमधे उपलब्ध असतील त्याच भाज्या येणार. मग अशा वेळी भाजी करण्याच्या पध्दतीत थोडा बदल केला तर जेवणाची लज्जत वाढते.कोबीची भाजी म्हणले की घरात सर्वजण नाक मुरडतील पण त्याच कोबीची कोफ्ता करी म्हणले की लगेच भूक प्रज्वलीत होते व आनंदाने खाल्ली जाते.म्हणून आज मी कोबीची कोफ्ता करीच कशी करायची सांगते. पहा

साहीत्य:-
कोफ्त्यासाठी
1) किसलेला कोबि 2 वाट्या
2) चना डाळीचे पिठ 3-4 टेस्पून
3) तिखट, मीठ, हिंग,हळद धना-जिरा पावडर चविनुसार
4) तेल तळणीसाठी

करीसाठी
1) कांदा 1मोठा
2) आल एक इंच-लसूण 4-5 पाकळ्या
3) लाल टोमॅटो 2
4) चना डाळ पिठ 1 टेस्पून
5) दही 2टेस्पून
6) गरम मसाला 1 चमचा
7) धना-जिरा पावडर 2 चमचा
8) लाल तिखट 2 टीस्पून
9) मीठ
10) फोडणीसाठी तेल 2 टेस्पून
11) फोडणीचे साहीत्य जिरे,मोहरी,हिंग व हळद
12) बारीक चिरलेली कोथंबिर
13) पाणी

कृती :-

      प्रथम कोबि किसून घ्यावा व उकळत्या पाण्यात टाकावा . (कोबि साधारण मऊ करून घेतला की कोफ्ते करीमधे सुटत नाहीत) पाच मिनिटात गॅस बंद करावा.

थोडे थंड झाले की एका पातेल्यावर चाळणी ठेऊन पाणी काढावे.(निघालेले पाणी फेकू नका.करीसाठी उपयोगात आणा.पुर्ण पाणी निथळलले की हातानेच दाबून पिळून शिल्लक पाणी काढून टाकावे.

आता कोबिमधे डाळीचे पिठ ,तिखट,मीठ,हींग व धना-जिरा पावडर घालावी व नीट एकत्र करावे. लिंबाच्या आकाराचे लहान-लहान गोळे करावेत व गरम तेलात मध्यम आचेवर तळून घ्यावेत.

नंतर करीसाठी एका पॅनमधे तेल गरम करत ठेवावे. कांदा,टमाटा व आले-लसुण पेस्ट करून घ्यावी. तेलात मोहरी, जिरे, हींग व हळद टाकून फोडणी करा. त्यात एक चमचा डाळीचे पिठ घालून थोडे भाजा. त्यावरच तयार केलेली पेस्ट घाला व  परतत रहा.परतानाच त्यावर गरम मसाला, धना-जिरा पावडर,मिरची पावडर व मीठ घाला. दहीपण आताच घालावे. तेल सुटेपर्यत चांगले खमंग परतावे.

परतल्यावर दोन वाट्या पाणी घालावे व झाकून पाच मिनिट उकळी आणावी. आवडी नुसार पाणी कमी-जास्त करावे.  परंतू करी शक्यतो दाटसरच असावी.

आता तयार करीमधे वर तळून तयार असणारे कोफ्ते सोडा व एक उकळी येऊ द्या. वरून कोथंबिर घाला.

गरमा-गरम कोफ्ता करी फुलके अथवा पोळीसोबत सर्व्ह करा.

टीप:- कोफ्ते तयार करताना डाळीचे पीठ घातल्यावर पण जर पीठ जर सैल वाटले तर थोडेसे ब्रेडक्रमस् घालावेत .म्हणजे गोळे खुटखुटीत असे होतात. करीमधे घातल्यावर रद्दा होत नाही.

कोबी प्रमाणे दुधी,पनीर, बटाटा, इत्यादीचे पण अशाच पध्दतीने कोफ्ते करतात.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

कारल ही भाजी सर्वांच्याच परिचयाची आहे. बर्याच घरी ती कडू असते या कारणास्तव सहसा केली जात नाही.मुलांना तर अजिबातच आवडत नाही. पण कारले औषधी आहे. शक्तीवर्धक, पित्तनाशक व सारक आहे. त्यात इन्शुलीन सारखा पदार्थ असल्याने ते मधू मेहावर उपयोगी आहे. रक्तातील साखरेचे प्रमाण कमी होण्यास मदत होते. मधूमेही रूग्णानी कारल्याचा रस, बियांची पूड, किवा कारली उकडून काढाही घ्यावा. तसेच कारल्याच्या सेवनाने रक्तदाब,मेंदूचे विकार, डोळ्याच्या तक्रारी,रक्तदोष इ. पण दूर होणेस मदत होते.अशा या गुणी कारल्याला,' तूपात तळा,साखरेत घोळवा कडू ते कडूच' असे म्हणले जाते.पण मी आज जे चिप्स सांगणार आहे ते अजिबात कडू न लागता खमंग लागतात. मुलेसुध्दा आनंदाने खातात.कसे करावेत पूढे कृती बघा.

साहीत्य:-

1) पांढरी कारली 3-4
2) लाल मिरचीपूड, मीठ,चाट मसाला,आमचूर पावडर व हळद
3) तळणीसाठी तेल

कृती :-

    प्रथम कारली धुवून पुसून त्याच्या बिया काढून बोटाएवढ्या लांबीचे पातळ उभे काप करून घ्या.

नंतर हे काप मीठ व हळद घातलेल्या उकळत्या पाण्यात टाकावेत.तसेच पाच मिनिट खळखळ उकळू द्यावेत. पाच मिनीटानी गॅस बंद करून खाली उतरवा.

आता हे काप चाळणीवर काढावे व वरून थंड पाणी ओतावे.तसेच चाळणीवर निथळत राहू द्यावेत. पाणी पूर्ण निथळल्यावर कापडावर किवा पेपरवर पसरवून पूर्ण कोरडे होऊ द्यावेत.

नंतर तेल तापत ठेवावे व गरम तेलात मंद आचेवर छान तांबूस गुलाबी रंग येईपर्यंत तळून टिश्यू पेपरवर काढावेत.

सगळे तळून झाले की त्यावर तिखट, मीठ, मसाला व आमचूर पावडर आपल्याचवीनुसार वरून भुरभूरावी आणि अलगद हातानी चिप्स मोडू न देता हलवावे. मस्त कुरकरीत चिप्स तयार. जेवणात साईड डीश म्हणून किवा नुसतेही चहासोबत तोंडात टाकता येते. 

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

जेवताना डाव्या बाजूला चटणी, लोणचे असे कांही चवीला असले की जरा जेवणाची लज्जत वाढते. आपण दोडका,दुधी,लाल भोपळा अशा अनेक भाज्या रोजच्या जेवणात वापरतो.पण आपण त्यांच्या साली टाकून देतो. पण त्यातपण पौष्टीकपणा खूप  असतो. त्यांच्या चटण्या कराव्यात.खूप छान होतात.आज दोडक्याच्या सालींची चटणी दाखवते. कशी पहा!

साहीत्य :-

1) अर्धा किलो दोडके स्वच्छ धुवून मग त्याच्या काढलेल्या साली
2) भाजलेले शेंगदाण्याचे कूट 2 टेस्पून
3) तिखट,मीठ
4) फोडणीसाठी जिरे,मोहरी,हिंग व तिळ
5) तेल 2 टेस्पून

कृती:-

         दोडक्याच्या काढलेल्या साली दगडी खलबत्त्यामधे प्रथम थोड्या हलकेच ठेचा व हाताने दाबून त्यातील रस पिळून काढा.

आता एका कढईत तेल घाला व तापले की त्यात फोडणीचे साहीत्य घालून फोडणी करा.नंतर त्यावर ठेचलेल्या शिरा घाला व मंद आचेवर परतत रहा. खरपूस भाजून झाल्या की त्यात दाण्याचे कूट व तिखट,मीठ घाला आणि एक-दोन परतण्या द्या.मस्त कुकूरीत चटणी तयार !

हवाबंद बाटलीत भरून ठेवा.एक-दोन दिवसांत संपवून टाका.कारण चुरचूरीत असेपरेंतच छान लागते.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

आमच्याकडे गोड सर्वानाच फार आवडते. अक्षयतृतीयेपासून जे आंबा व आंब्याचे विविध प्रकार चालू होतात ते एक पाऊस पडला कीच बंद ! पण आता सतत गोड काय ?हा प्रश्न सतावतो.मग पट्कन होणारे चिरोटे केले.हे अगदी दहा मिनिटात होतात.तसेच शाळेच्या मुलांना लहान सुट्टीच्या डब्यात द्यायला पण सोईचे आहे.अगदी कमी साहीत्य व झटपट ! कसे ते पहा...

साहीत्य :-
1) खारी पापुद्र्याची बिस्कीट्स  10-12
2) साखर 1 वाटी
3) पाणी 1/2 वाटी
4) वेलचीपूड
5) ड्रायफ्रूट्स पातळ काप आवडीनुसार

कृती :-
        प्रथम साखरेत पाणी घालून मंद आचेवर पाक करून घ्यावा.पाक कच्चा किंवा फार घट्ट असू नये. एकतारी करावा. खाली उतरवून त्यात वेलची पूड घालावी.

आता एक-एक बिस्कीट पाकात बुडवून पापडाच्या चिमट्याने काढावे व एका डिशमधे ठेवावेत. थंड व्हायच्या आधी पट्कन बदाम पिस्ता काप वर लावावेत म्हणजे चिकटतात. व थंड होऊ द्या.

थंड झाले की खायला तयार. असे झटपट चिरोटे आपल्या पारंपारीक चिरोट्या पेक्षाही अतिशय खुसखूषीत लागतात व चव पण हुबेहूब किवा काकंणभर सरसच लागते.
बघा तुम्हीपण करून. पण याला अट एकच की बिस्कीटे ताजी  व खुसखूषीत असावीत.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

 टिफीनला पोळी भाजी नेणे मुलांना सहसा नको असते.आवडत नाही ! त्यापेक्षा तीच भाजी भरून केलेला किवा मसाला पराठा आनंदाने खातात.मुळात पराठा हा प्रकार खाण्यास,नेण्यास सुटसूटीतच असतो. तसेच करणेही सोईचे असते. पट्कन होतो व दही, लोणचं किवा चटणी साॅस कशा सोबतही खायला छान लागतो.तर आज मसाला पराठा करू .काय काय साहीत्य लागते व कसा ते पहा.

साहीत्य:-
1) कणिक 4 चमचे
2) कसुरी मेथी 2 टेस्पून
3) धना-जिरा पाडर 2 टीस्पून
4) लाल मिरची पावडर आवडीनुसार
5) हळद,हिंग,मीठ चविनूसार
6) ओवा चिमूटभर
7) तेल
8) पाणी

कृती :-
  प्रथम कणिक एका पसरट भांड्यात घ्या. त्यात वरील सर्व मसाला घाला व नीट एकत्र करा. दोन टीस्पून तेल घाला व गरजेनुसार पाणी घालून कणिक मळा.फार घट्ट अथवा सैल नको.पंधरा मि.झाकून ठेवा.

आता घडीच्या पोळीप्रमाणे तेल घालून घडी करा व थोडं जाडसरच लाटा व तव्यावर तेल सोडून खरपूस भाजा.

गरमा-गरम खमंग पराठे तयार ! लोणच चटणी लावून डब्यात द्या किवा दह्यासोबत घरात खा ! एकदम पोटभरीचे होते. झटपट होते.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.