साधारण ख्रीरीसारखाच हा पदार्थ आहे. आजकालच्या पध्दतीनुसार डेजर्ट म्हणून थंड स्वरूपात खाल्ला जातो. मात्र आमच्याकडे गरम व खीर म्हणून जेवणात पोळीसोबत खायला आवडते. आपल्या आवडीनुसार कसेही खावे. आहे मात्र झकास पदार्थ. साहित्य व कृती-👇

साहित्य :-
* बासमती तांदुळ १/४ कप
* दूध अर्धा लिटर
* मँगो पल्प २ आंब्याचा
* साखर अर्धा कप (आवडीनुसार कमी-जास्त)
* तूप १ टीस्पून
* वेलचीपूङ
* काजू, बदाम काप

कृती :-
प्रथम दूध एका पातेल्यात गरम करण्यास ठेवावे. दूध उकळू लागल्यावर मधे मधे ढवळत रहावे.

दूध उकळून थोडे घट्ट होईपर्यंत दोन आंब्याचा गर काढून ब्लेडरने घुसळून तयार करावा. तसेच तांदुळ धुवून, तूपावर थोडे परतून मिक्सरमधे  भरड वाटून घ्यावेत.

आता दूध चांगले उकळून दाट झालेले असेल त्यामधे वाटलेले भरड तांदुळ घालून पांच मिनिट उकळू द्यावे. शिजले की त्यामधे साखर, वेलचीपूङ घालून गँस बंद करावा.  पांच मिनिटानंतर तयार केलेला मँगो पल्प घालावा व एकत्र ढवळावे. शेवटी वरून काजू, बदाम चे काप घालावेत. मँगो फिरनी तयार!

आवडीनुसार थंड अथवा गरम खा.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

सकाळच्या घाईमधे रोज नाष्टा काय करावा हा प्रश्न नेहमीच पडतो.  बरं, नाष्टा पौष्टीक हवे,  झटपट होणारा हवे व सर्वाना आवडणारा पाहीजे. तर या सर्व मापात बसणारा ढोकळा हा उत्तम पदार्थ आहे. याचे प्रीमिक्स तयार करून ठेवले तर सकाळी किंवा संध्याकाळी चहासोबत आपण पट्कन ढोकळा बनवू शकतो.तसैच मुलांना डब्यात ही देता येतो. तर प्रीमिक्स कसे करायचे साहित्य व कृती-👇

साहित्य :-
* तांदुळ १ कप
* चणा डाळ १/२ कप
* उडीद डाळ १/४ कप
* साखर १/ ४ कप
* मीठ १ टेस्पून
* सोडा १ टेस्पून
* सायट्रीक अँसिड १ टेस्पून

ढोकळ्यासाठी साहित्य
* प्रीमिक्स १ कप
* पाणी १ कप
* चिमुटभर हळद
* हिरवी मिरची,आलं पेस्ट १ टीस्पून
* फोडणीसाठी तेल,हिंग,मोहरी,तिळ, कङीपत्ता
* सजावटीसाठी कोथिंबीर

कृती :-
प्रथम तांदुळ व दोन्ही डाळी एकत्र करून मिक्सरमधे पावडर करून घ्यावे.

नंतर मीठ, साखर, सोडा व सायट्रीक अँसिड एकत्र करून मिक्सरमधे पावडर करा.

आता वरील दोन्ही पावडरी एकत्र करून हलकेच एकदा मिक्सरमधून फिरवून घ्यावे.

तयार झालेले प्रीमिक्स हवाबंद डब्यात भरून ठेवावे.  एक महीन्यापर्यंत टिकते.  गरजेनुसार प्रीमिक्स घेऊन ढोकळा बनवावा.

प्रीमिक्स ढोकळा कृती :-
प्रथम ढोकळा कुकरमधे तळाशी गरजेइतके पाणी घालून गरम करण्यास ठेवावे.  ढोकळा पात्राला तेलाचा हात लावून घ्यावा.

आता प्रीमिक्स एका बाऊलमधे घेऊन त्यामधे हळद व मिरची, आलं पेस्ट घालावी व गुठळ्या होणार नाहीत याची दक्षता घेत पाणी घालून ढवळावे.  तयार मिश्रण झटपट ढोकळा पात्रात ओतून, ढोकळा स्टँड कुकरमधे ठेवावे. पंधरा मिनिट वाफवावे.

आता ढोकळा वाफेपर्यंत फोडणी तयार करून ठेवावी.  ढोकळा वाफून तयार झाला की, थोडा थंड झाल्यावर एका थाळीत काढावा, त्यावर फोडणी चमच्याने पसररावी व वरून कोथिंबीर घालून कापून ढोकळा चटणीसोबत खायला द्या.

टिप्स :
* प्रेशर कुकर मधे करणार असाल तर रींग व शिट्टी काढावी.
* डाळी व सोडा, साखर वगेरे सांगितल्याप्रमाणे वेगवेगळेच बारीक करावे, अन्यथा पीठात गुठळ्या होऊ शकतात.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

उन्हाळ्याचे दिवसात थंडगार सरबत, लस्सी, निरनिराळे ज्यूस, फ्रूटशेक अशी पेयं प्यायला छान वाटतात. पण बाजारी पेये पिण्याऐवजी घरच्या घरी केली तर खूपच उत्तम. अन् थोडी पुर्वतयारी ठेवली तर घरी झटपट करणेही अवघड नसते. बर्याच निरनिराळ्या स्वादामधै फालुदा बनवला जातो. जसे केसर बदाम, कस्टर्ड फालुदा,  शाही फालुदा फ्रूट फालुदा इत्यादी..!तर आज मी मँगो फालुदा केला साहित्य व कृती-👇

साहित्य :-
* तापवून गार केलेले दूध अर्धा लिटर
* पिकलेले आंबे २+२
* भिजवलेले सब्जा बी २ टेस्पून
* फालुदा शेवया किंवा साध्या शेवया अर्धा कप
* रोज सिरप अर्धा कप
* साखर २ टेस्पून
* व्हँनिला किंवा मँगो आईस्क्रीम
* टुटीफ्रूटी सजावटीसाठी
* ड्रायफ्रूट्स ऐच्छिक
इतक्या साहित्यामधे फोटो मधील साईजचे ५ ग्लास फालुदा होतो.

कृती :-
प्रथम दोन आंब्याचा पल्प तयार करून घ्यावा.  व राहीलेले दोन आंबे साल काढून लहान चौकोनी तुकडे करावेत.  यातील थोडे सजावटीसाठी बाजूला ठेवून बाकीचे तुकडे व साखर गार दूधामधे घालून ब्लेडर ने घुसळावे व मिल्कशेक तयार करून घ्यावा.

आता शेवया साध्या असतील तर गरम पाण्यात टाकून मऊ करून ध्याव्यात.  नंतर वरून गार पाणी घालून गाळून घ्याव्यात.

आता सर्व साहित्याची जमवा जमव झाली असेल तर छानपैकी एक मोठा काचेचा ग्लास घ्यावा.  त्यामधे सर्वात आधी तळाला एक चमचा रोज सिरप नंतर अनुक्रमे एकेक चमचा सब्जा बी,  शेवया, मँगो पल्प घालावे. परत असाच अजून एक लेयर तयार करून मग ड्रायफ्रूट्स व मिल्कशेक घालावा.  शेवटी आईस्क्रीम घालून वर टुटीफ्रूटी व आंब्याचे क्यूब सजावटीसाठी घालावे.

थंडगार सर्व्ह करावे.

टिप :-
* सर्व साहित्य आधीच तयार करून फ्रिजमधे थंड होण्यासाठी ठेवावे ऐनवेळी ग्लास मधे सर्व साहित्य एकत्र करून द्यावे.
* साखर आवडीनुसार कमी-जास्त करावी.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

चाट मधे पुरी नेहमीच वापरली जाते. तर थोडा वेगळा व आकर्षकपणा साठी ही चाटची कटोरी केली जाते. तसेच लहान मुलांची बर्थ-डे पार्टी किंवा घरी कोणी पाहुणे येणार असतील तर थोडा वेगळा म्हणून या कटोरी मधून चाट सर्व्ह करता येते. तसेच या कटोर्या आधीच करून हवाबंद डब्यात ठेवता येतात. त्यामुळे ऐनवेळी पटकन् हे चाट करता येते. तर कटोरीचे साहित्य व कृती-👇

साहित्य :-
* मैदा १ कप
* मीठ चिमूटभर
* ओवा पाव टीस्पून
* मोहनसाठी गरम तेल २ टेस्पून
* तळणीसाठी आवश्यक तेवढे तेल
* पाणी
एवढ्या साहित्यात फोटोत दाखविलेल्या आकाराच्या पांच कटोर्या तयार होतात.

कृती :-
प्रथम मैदा चाळून एका पसरट भांड्यामधे घ्यावा  व त्यामधे मीठ, ओवा मिसळावा.

नंतर त्यामधे तेल गरम करून घालावे व पीठाला हाताने चोळावे.  आता अंदाज घेत पाणी घालून घट्ट पीठ मळावे.  दहा -पंधरा मिनिट झाकून ठेवावे. अंदाजे फक्त पाव कपच पाणी पुरते.

आता मंद आचेवर तेल गरम करावे. पीठाची लहान गोळी घ्यावी व मध्यम जाडीची पुरी लाटावी.  त्यावर काटेचमच्याने टोचावे व एक वाटी त्यावर ठेऊन तिला पुरी लपेटावी व वाटीसह गरम तेलात सोडावी व मंद आचेवरच तळावी.  तळताना हळू हळू झार्यान वाटीवर े तेल उडवावे वाटी सुटून येते ती चिमट्याने अलगद बाहेर काढा.  आता तेलातील पीठाची वाटी उलट-सुलट तांबूस रंगावर तळावी. (अधिक सविस्तर कृतीसाठी फोटो पहा)

तयार कटोर्या थंड झाल्यावर हवाबंद डब्यात भरून ठेवाव्यात. छान खुसखूषीत कडक रहातात. चाट करण्याचे वेळी पुरी घेऊन त्यामधे चाटचे सर्व साहित्य भरले की झाले कटोरी चाट!

टिप :-
* कटोरी अगदी मंद आचेवरच तळावी.
* पुरी फार पातळ अथवा जाड लाटू नये. फार पातळ लाटली तर हाताळणीमधे  कटोरी मोडते व लगेच चाट मऊ पडते. व फार जाड ठेवली तर कटकटीत होते व खाताना चाट चांगले लागत नाही. चाटची कटोरी नेहमी खुसखूषीतच असावी.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

विविध चाट प्रकारापैकी हा एक चाटचा प्रकार आहे.  चटपटीत खायला सर्वानाच आवडते. या चाटच्या कटोरी आकारामुळे मुलांना जास्त आकर्षक वाटतो. यातील कटोर्या आपण आधीच करून हवाबंद डब्यात ठेऊ शकतो. ऐनवेळी फटाफट चटण्या व सर्व साहित्य घालून सर्व्ह करायचे. तर हे कटोरी चाट कसे करायचे साहित्य व कृती-👇

साहित्य :-
* भिजवलेले छोले हरभरे १ वाटी
* बटाटे २ नग
* बारीक चिरलेला कांदा
* टोमँटो चिरून
* कोथिंबीर
* गोड व तिखट चटणी
* दही
* नायलाँन शेव
* भाजलेल्या जिर्याची पावडर
* चाट मसाला
* लाल मिरचीपूड
* मैद्याची तयार कटोरी 

कटोरी कशी करायची? पुढील लिंकवर पहा 👇 

http://swadanna.blogspot.in/2018/04/chaat-katori.html?m=1

कृती :-
प्रथम छोले व बटाटे मीठ, हळद घालून कुकरला उकडून घ्यावेत. तोपर्यंत बाकीचे साहित्य म्हणजे कांदा, कोथिंबीर चिरून, चटण्या तयार करून घ्याव्यात.

आता एका डिशमधे तयार कटोरी घ्या. त्यामधे सर्वात आधी उकडलेला बटाट्याच्या फोडी, छोले घालावेत. त्यावर चाटमसाला, जिरेपूड भुरभुरावी. दोन्ही चटण्या व दही घालावे.  त्यावर चिरलेला कांदा, टोमँटो घालावे. परत त्यावर चाटमसाला, जिरेपूड भुरभुरावी दोन्ही चटण्या, दही घालावे. शेवटी वरून भरपूर शेव व कोथिंबीर घालावी व खायला द्यावे.  यात आपल्या आवडीनुसार साहित्य कमी-जास्त भरावे.

टिप :-
* छोले, बटाच्याऐवजी मोड आलेले मूग किंवा गाजर, कोबी सारख्या भाज्या घेतल्या तरी चालतात. अधिक पौष्टीक होते.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

सर्वसामान्यपणे बटाटा लहान थोर सर्वांना आवडतो.  मुलांना तर बटाटा कोणत्याही स्वरूपात द्या.  भाजी, भजी, पराठे, चिवडा किंवा नुसताच उकडून सुध्दा.  बटाटा अनेक प्रकाराने वापरला जातो. स्वयंपाक घरात तर ऐनवेळचा मदतनीसच असतो. कोणत्याही भाजीत मिसळता येतो. अशा बटाट्याच्या नाष्ट्याला ऐनवेळी काय करावे?  हा प्रश्न पडल्याने, मी पुर्या केल्या. कशा करायच्या साहित्य व कृती-👇

साहित्य :-
* बटाटे मध्यम आकाराचे ४ नग
* जाड पोहे १ वाटी
* काँर्नफ्लोअर २ टेस्पून
* कसूरी मेथी चिमूटभर
* कोथिंबीर बारीक चिरून
* धना-जीरा पावडर १ टीस्पून
* मीठ चवीनुसार
* तेल तळण्यासाठी

कृती :-
प्रथम बटाटे उकडावेत. थंड झाल्यावर सोलून, किसून घ्यावेत.

आता किसलेल्या बटाट्यामधे पोहे मिक्सरमधे पावडर करून,  काँर्नफ्लोअर व राहीलेले सर्व साहित्य घालावे व एकत्र मळून गोळा तयार करावा.  पाणी अजिबात घालू नये. तयार पीठाचा गोळा फ्रिजमधे १५ मिनिट सेट होण्यासाठी ठेवा.

पंधरा मिनिटानी गरम तेलात तयार पीठाच्या लहान-लहान पुर्या लाटून तळून घ्या व गरमा-गरम पुर्या साँस सोबत खायला द्या.

सहज सोपा सर्वांच्या आवडीचा नाष्टा तयार! घरी अचानक पाहुणे आले व उकडलेले बटाटे फ्रिजमधे असतील तर चहासोबत द्यायलाही मस्त पदार्थ आहे.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

खरबूज हे फळ खास करून उन्हाळ्यात येते. रसाळ, गोड चवीचे व गुणधर्माने थंड असते. याचा मिल्कशेक अतिशय उत्तम चवीचा लागतो.  कसा करायचा साहित्य व कृती-👇

साहित्य :-
* खरबूज लहान आकाराचे १ नग ( साधारण ५०० ग्रॅम)
* थंड दूध अर्धा लिटर
* साखर ४ टेस्पून
* वेलचीपूड १/४ टीस्पून
* बदामाचे काप सजावटीसाठी

कृती :-
प्रथम खरबूज मधून कापून दोन भाग करावेत व आतील बीया काढून स्वच्छ करावे. नंतर साल काढून लहान चौकोनी तुकडे करावेत.

आता मिक्सर जारमधे खरबूजाचे तुकडे, साखर, वेलचीपूङ घालून मऊ पेस्ट करावी. नंतर सर्व पेस्ट झालीय का, कुठे तुकडे राहीले नाहीत ना याची खात्री करून नंतर दूध घालावे व परत एकदा सर्व एकजीव करावे.

आता तयार खरबूज शेक ग्लास मधे घालून वरून बदामाचे काप घालून सर्व्ह करावा. थंड हवे असेल तर आधीच करून फ्रिजमधे ठेवावा.  बर्फ अजिबात वापरू नये. 

टिप :- वेलचीपूङ आवर्जून घालावी.  स्वाद खूप छान येतो व वेलची प्रकृतीला थंड असते.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

लोणी डोसा हा साऊथ इंडियन नाष्ट्याचा पदार्थ आहे. पोटभरीचा व पौष्टीक आहे. गरमा-गरम मऊ मऊ डोसा खायला खूप छान लागतो. तसेच करायला सोपा आहे. सहसा फसत नाही. कसा करायचा साहित्य व कृती-👇

साहित्य :-
* मोठा तांदुळ २ कप
* पोहे १ कप
* उडीद डाळ १/२ कप
* साबूदाणा १/२ कप
* मेथी दाणे १/२ टीस्पून
* मीठ चवीनुसार
* सोडा चिमूटभर गरजेनुसार 

* लोणी आवश्यकतेनुसार 

कृती 👇
प्रथम तांदुळ डाळ व साबूदाणा, मेथी चार -पाच तास स्वच्छ धुवून भिजत घालावेत.

नंतर सर्व एकत्र मिक्सरमधे वाटून एकदम मऊ पेस्ट करावी. वाटताना पोहे भिजवून घालावेत. तयार मिश्रण आठ तास अंबण्यासाठी ठेवावे.

आता आठ तासानंतर मिश्रण अंबून दुप्पट झाले असेल. त्यामधे चवीनुसार मीठ घालावे व ढवळावे. पीठ तव्यावर डावाने ओतले तर सहज धार पडावी व डोसा आपोआप पसरेल इतपतच पातळ ठेवावे. फार घट्ट अथवा पातळ नको.

आता बिडाचा किंवा आपल्याकडे जो असेल तो तवा गरम करण्यास ठेवावा. तवा खूप गरम नसावा. खूप तापला तर मिश्रण व्यवस्थित पसरत नाही. तवा सुरवातीला एकदाच पाणी शिंपङून कापडाने पुसावा व तेलाने ग्रीस करून घ्यावा. नंतर परत परत करावा लागत नाही.

आता गरम तव्यावर मोठ्या डावाने थोड्या उंचावरून पीठ ओतावे. पीठ आपोआप पसरेल. डावाने पसरायचे नाही. नाहीतर त्याचे टेक्सचर बिघडते. एक-दोन मिनिट झाकून ठेवावा.  वरची बाजू शिजून छान जाळी पडते. मग आवडी नुसार त्यावर लोणी घालायचे व डोसा पलटी करायचा. खालची बाजू थोडी गुलाबी भाजली की डोसा तयार झाला.

तयार मऊ लुसलू़शित डोसा चटणी किंवा बटाटा भाजीसोबत खायला द्यावा.

टिप:
* लोणी शक्यतो घरचे पांढरे लोणी वापरावे. डोसा अधिक रूचकर लागतो.

* आपल्या आवडीनुसार डोश्याचा आकार ठेवावा. परंतु लोणी डोसा शक्यतो थोड्या लहान आकाराचाच असतो.  साधारण चहाच्या बशीएवढ्या आकाराचा असतो.

* पीठ अंबण्याची क्रिया तापमावर अवलंबून असते. चांगले अंबून फुगले तर सोडा घालू नये.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

गुढीपाढवा एक पारंपरिक मराठी सण व साडेतीन मुहूर्ता पैकी एक मुहूर्त. मोठ्या थाटा-माटाने साजरा केला जातो. गोडाचा नैवेद्य, गुढी सजविण्यासाठी साठी रेशमी वस्त्र, कलश, चाफ्याच्या फुलाची माळ व जोडीला साखर माळ लागते.  तर ही सहज सोपी पटकन् होणारी साखरमाळ कशी करायची साहित्य व कृती-👇

साहित्य :-
* साखर अर्धी वाटी
* पाणी साखर बुडेल इतकेच,पाव वाटी
* बेकिंग पावडर पाव टीस्पून
* तूप १ टीस्पून
* आवडीचा खाद्यरंग २ थेंब

कृती :-
प्रथम फोटत दाखवल्याप्रमाणे कप केकचे मोल्ड एका ताटात ठेवून त्यात दौरा ठेवावा.

नंतर गँसवर साखर व पाणी एकत्र करून पाक करण्यास ठेवावा. सतत ढवळत रहावे. साखर विरघळली की त्यात रंग व तूप घालावे. कडक गोळीबंद पाक करावा. शेवटी बेकींग पावडर घालावी.

नंतर झटपट गरम पाक मोल्डमधे चमच्याने घालावा.  पंधरा मिनिटानंतर कडक झाले की मोल्ड मधून सहजच साखर माळ निघते.

घरच्या घरी आपली साखर माळ तयार. आदले दिवशीच करून, अलगद डब्यात घालून ठेवावी. दुसरे दिवशी गुढीला घालावी.

टिप:
* कपकेक मोल्ड नसतील तर ताटाला तूपाचा हात चोळून त्यावर दोरा ठेवून ठराविक अंतराने पाक टाकावा.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

चिंचेचे पंचामृत हा एक पारंपरिक पदार्थ आहे. सणावाराचे दिवशी हमखास नैवेद्याच्या पानात डाव्या बाजूचा पदार्थ म्हणून केला जातो.  चविला आंबट-गोड असा अप्रतिम लागतो. कसा करायचा पहा साहित्य व कृती-👇

साहित्य : -
* चिंचेचा कोळ १ वाटी
* गूळ १ वाटी
* दाण्याचा कूट २ टेस्पून
* तिळाचे कूट २ टेस्पून
* भाजलेले दाणे मूठभर
* सुक्या खोबर्याचे पातळ काप २ टेस्पून
* कढीपत्ता
* सुक्या लाल मिरच्या २
* मीठ १ टीस्पून
* लाल तिखट १ टीस्पून
* हळद अर्धा टीस्पून
* गोडा /काळा मसाला १ टीस्पून
* मोहरी १/२ टीस्पून

* मेथी दाणे पाव १/४ टीस्पून 

* जीरे १/२ टीस्पून
* हींग पाव टीस्पून
* तेल १ टेस्पून

कृती :
सर्वप्रथम  चिंच पाण्यात भिजवून चाळणीमधून गाळून त्याचा गर काढून घ्यावा. शेंगदाणे व तिळ भाजून कूट करावे. मूठभर दाणे भरड ठेवावे. अखंड दाताखाली आले की छान लागते.

नंतर कढईमधे तेल गरम करून मोहरी, जीरे मेथीदाणे तडतडवून त्यात लाल मिरचीचे तुकडे, कढीपत्ता, हींग , खोबऱ्याचे काप,भरड शेंगदाणे घालून थोडे परतून घ्यावे .

नंतर त्यात चिंचेचा कोळ, गूळ, हळद, तिखट,काळा मसाला घालून ५ मिनिट उकळवावे. मिश्रण चमकदार झाले की चवीनुसार मीठ, तिळाचे कूट व दाण्याचे कूट घालावे .सर्व एकत्र ढवळून पाच मिनिट शिजले की झाले तयार पंचामृत.

आंबट-गोड चविचे पंचामृत जेवणाची लज्जत वाढवते. एखादी भाजी कमी असेल तरी चालून जाते.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

दक्षिणेकडे भात जास्त प्रमाणात खाल्ला जातो. त्यामुळे भाताचेच विविध प्रकार केले जातात. हा चिंच राईस तेलगू मधे "पुलिओरा" (pulihora Rice) म्हणून ओळखला जातो. एक-दोन वेळा बालाजी मंदिर मधे प्रसाद म्हणून दिलेला हा भात खाल्ला. मला खूप आवडला. म्हणून चवीवरून व गुगलवरून त्याची रेसिपी शोधून मी    सेम टेस्टचा "चिंचेचा भात " केला. सर्वाना हा भाताचा प्रकार आवडला, तेव्हापासून आमच्या घरी वरचेवर, रात्रीच्या जेवणात फारशी भूक नसेल तर वन डिश मिल म्हणून हा भात बनतो. कसा केला साहित्य व कृती-👇

साहित्य -
* शिजवलेला भात २ वाट्या
* चिंचेचा कोळ पाव वाटी
* सुक्या लाल मिरच्या २
* कढीपत्ता
* उडीद डाळ १ टीस्पून
* चणा डाळ १ टीस्पून
* शेंगदाणे मुठभर
* मीठ चवीनुसार
* गुळ सुपारीइतका
* हळद  ( ऐच्छीक)
* फोडणीसाठी मोहरी, जीरे, हिंग
* तेल २ टेस्पून

कृती :-
प्रथम कढईत तेल गरम करून त्यामधे हिग, मोहरी, जीरे तडतडवून घ्यावेत.

नंतर त्यामधे लाल मिरची, कढीपत्ता, डाळी व शेंगदाणे घालून तांबूस परतावे.

आता त्यात चिंचेचा कोळ, मीठ, गूळ घालून मिश्रण घट्ट होऊन तेल सुटेपर्यंत परतावे व शेवटी शिजलेला भात घालून परतावे. भात तयार!

तयार चिंचेचा भात गरमा-गरम सर्व्ह करावा. सोबत लोणचे, पापड द्या. अतिशय रूचकर लागतो. पोट भरते.

टिप 

* भात मोकळा शिजलेला असावा. 

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

लिंबाचे लोणचे अनेक वेगवेगळ्या पध्दतिने बनविले जाते. मुळात लोणचे म्हटले की च, तोंडाला पाणी सुटते. त्यात लिंबूचे लोणचे आवडत असेल तर याला मुरायला बरेच दिवस लागतात. तर असे झटपट होणारे लोणचे केले तर कोणाला नाही आवडणार? हे लोणचे मुरायची वाट बघायची अजिबात गरज नाही. लिंबू बाराही महीने उपलब्ध असतात. गरजेनुसार थोडेच लिंबू आणून ताजेच केले तरी चालते. हे लोणचे लहान मुलांना किंवा वृध्द लोकांना अधिक आवडते गोडसर चविचे व चावावे लागत नाही. तर याचे साहित्य व कृती-👇

साहित्य :-
* लिंबू मध्यम आकाराचे १२ -१५ नग
* साखर १ /२ किलो ( अडीच कप)
* मीठ लहान अर्धी वाटी
* तयार लिंबू लोणचे मसाला ५० ग्रँम

कृती :-
प्रथम लिंबू स्वच्छ धुवून, पुसून कोरडे करून घ्यावेत. नंतर चिरून एका लिंबाच्या आठ फोडी करून त्यातील सर्व बिया काळजीपूर्वक काढाव्यात.

आता बी काढलेल्या फोडी मिक्सरमधे वाटायच्या व गर बाऊलमधे काढून घ्यायचा. वाटताना एकदम गुळगुूळीत पेस्ट करायची नाही बरकां..थोडं मोटसरच ठेवायचे, खाताना क्रंची क्रंची छान लागते. नंतर यात साखर, मीठ व मसाला मिसळायचा. मस्तपैकी सर्व साहित्य एकत्र ढवळायचे व साखर विरघळून घ्यायची . झाले लोणचे तयार!

हे चटकदार लोणचे पराठा, मसाला पुरी, चपातीला लावून खाता येते. मुलांच्या डब्यात ब्रेडला लावून देता येते. अगदी रोजच्या जेवणात चटक -मटक करून मधे मधे चाटून खायला मस्त लागते, तोंडाला चव येते.

तुम्हीही करून बघा. नक्की आवडेल कारण झटपट तर होतेच शिवाय अतिशय कमी साहीत्यात होते. शिवाय केल्यावर मुरेपर्येत बरणीकडे बघत बसायला नको. लगेच खाता येते हे जास्त चांगले. लिंबू व मसाला तयार असेल तर अगदी १५ मिनीटांत तयार होते.

टिप्स :
* लिंबू ताजे व रसरशीत पिवळ्या रंगाचे असावेत.
* लिंबाच्या आकारमानानुसार व आवडीनुसार साखर, मीठ कमी-जास्त करावे.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

रोज सकाळी नाष्ट्याला काय करायचे? हा प्रश्न नेहमीच गृहीणींसमोर असतो. बरं, नाष्टा पौष्टीक, पोटभरीचा व करायला सोप्पा, पट्कन होणारा हवे. तर माझ्या मते या सर्व अटी पुर्ण करणारा पदार्थ म्हणजे लापशी रव्याचा, 'व्हेजिटेबल दलिया' !  कसा करायचा साहित्य व कृती-👇

साहित्य :-
* दलिया १ वाटी
* पाणी 3 वाट्या
* मीठ चवीनुसार
* साखर चिमूटभर
* गाजर, शिमला, मटार, फ्लाॅवर चिरून सर्व मिळून २ वाट्या
* कांदा १
* टोमँटो १
* आलं, मिरची चिरून
* कढीपत्ता
* कोथिंबीर, खोबरं, लिंबू
* फोडणीसाठी तेल २ टेस्पून
* फोडणी साहित्य हळद, हींग, मोहरी, जीरे

कृती :-
प्रथम दलिया किंचित तेलावर गुलाबी रंगावर भाजून घ्यावा व कुकरमधे पाणी घालून एक शिट्टी काढून, वाफवून घ्यावा. नंतर थंड होऊ द्यावा.

आता कढईमधे तेल घालून फोडणी करावी व त्यात कांदा, कढीपत्ता, आलं, मिरची घालून परतावे.  नंतर त्यामधे चिरलेल्या भाज्या, टोमँटो घालावे व साधारण मऊ होईपरेंत परतावे. फार मऊ शिजवू नयेत, थोडे क्रंची राहू द्यावे.

आता शेवटी शिजलेला दलिया मोकळा करून घालावा. मीठ,साखर घालावे व सर्व साहित्य एकत्र परतावे. वर झाकणी ठेऊन एक वाफ काढावी.

तयार गरमा-गरम दलिया डिशमधे घालून वरून खोबरं -कोथिंबीर घालून वर लिंबूची फोड ठेवावी व खायला द्यावा.  चविला अतिशय उत्कृष्ट लागतो व मस्त पोट भरते. 

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

बाजारामधे हिवाळ्यात या ओल्या तुरीच्या शेंगा भरपूर येतात. याची आमटी, उसळ, कटलेट केले जातात. चविला खूप छान लागते. परंतु या शेंगा सोलून दाणे काढणे हे किचकट काम आहे. घरात सर्वाना याची उसळ खूप आवडते. मग काय, शेंगा सोलायला ठेवते पुढ्यात! सोलून झाले की मस्तपैकी उसळ करायची व गरमा-गरम भाकरी सोबत खायची. कशी करायची साहित्य व कृती-👇

साहित्य :-
* तुरीचे दाणे २ वाट्या
* टोमँटो १
* कांदा १
* हिरवी मिरची,आलं-लसूण पेस्ट
* ओलं खोबरं १/२ वाटी
* कोथिंबीर
* शेगदाण्याचे कुट २ टेस्पून
* लाल मिरचीपूड,मीठ आवडीनुसार
* काळा मसाला २ टीस्पून
* गूळ सुपारी एवढा
* तेल, मोहरी, हींग हळद फोडणीसाठी

कृती
प्रथम दाणे किंचित परतून, कुकरमधे वाफवून घ्यावेत.

नंतर कढईत फोडणी करून कांदा परतून घ्यावा. आलं-लसूण मिरची पेस्ट घालावी. आता टमाटाही घालून मऊ होईपरेंत परतावा.

आता वाफवलेले तुरीचे दाणे घालावेत. सर्व मसाला तिखट, मीठ, मसाला, ओलं खोबरं, दाण्याचे कुट, गूळ घालावे. किंचित पाणी घालून एक वाफ काढावी. म्हणजे सर्व मसाला व दाणे एकजीव होते. थोडी घटसर पण सरसरीत अशीच ही उसळ ठेवावी.

शेवटी वरून कोथिंबीर घालून गरम ज्वारीच्या भाकरीसोबत खावी.

टिप :- या उसळीमधे गूळ अवश्य घालावा. उसळीला गुळचिटपणा येतो. तूर उग्र असते,.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.

पाऊस असो किंवा थंडी, गार वातावरण असेल तर चहासोबत कांही चटपटीत खायला हवेच. तसेही चटपटीत खायला कोणाला नाही आवडत?  तर आवडीनुसार सगळ्या डाळी थोड्या थोड्या घेऊन मस्त डाळ पकोडे केले. पौष्टीक व चटपटीतही होते. एकदम सोपे आहेत. साहित्य व कृती-👇

साहित्य :-
* चणाडाळ १ वाटी
* छिलका मुगडाळ १/२ वाटी
* मसूरडाळ १/४ वाटी
* तूरडाळ १/४ वाटी
* उडीदडाळ मूठभर
* कांदा १ चिरून
* हिरवी मिरची,आलं-लसूण पेस्ट १ टीस्पून
* कोथिंबीर
* धना-जीरा पावडर १ टीस्पून
* गरम मसाला १ टीस्पून
* हळद, तिखट, मीठ
* तेल तळण्यासाठी

कृती :-
प्रथम सर्व डाळी धुवून २-३ तास पाण्यात भिजत घालाव्यात. नंतर पाणी निथळून काढून टाकावे व भरड वाटून घ्याव्यात.

आता वाटलेल्या डाळीमधे दिलेला सर्व मसाला व  कांदा, कोथिंबीर घालून एकत्र मिश्रण करावे. पाणी अजिबात घालू नये. धट्टच ठेवावे.

आता तेल गरम करून हातानेच लहान-लहान गोळे तेलात सोङावेत व मध्यम आचेवर तांबूस रंगावर तळावे.

तयार मस्त गरमा-गरम कुरकुरीत "डाळ पकोडे " चहासोबत किंवा साँस बरोबर खायला द्या.

टिप :
यामधे आवडीनुसार पालक, मेथी चिरून घातले तर अधिक रूचकर लागते.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.