आमसुल किंवा कोकम किंवा यालाच कोकणात रातांबा असेही म्हणतात. कोकम कोकण, गोव्याची खासियत आहे. ही आंबट -गोड चविची रसाळ फळे असतात. कच्ची असताना रंग हिरवा असतो. पिकल्यावर लाल रंग येतो. या पिकलेल्या लाल फळांच्या रसापासून "कोकम सरबत" केले जाते. या सरबतापासून प्रकृतिला थंडावा मिळतो. उन्हाळी उष्णतेच्या अनेक विकारांवर अत्यंत गुणकारी आहे. तसेच ज्यांना पित्ताचा त्रास आहे त्यांनी रोज एक ग्लास हे सरबत प्यावे. पित्तशामक आहे. उन्हाळ्यात बाजारी रंग-बिरंगी कृत्रिम सरबत पिण्यापेक्षा हे आयुर्वेदीक सरबत उत्तम आहे. कोकम सरबताला फ्रिजमधे ठेवायची आवश्यकता नहीं. बाहेरही वर्षभर टिकते. कोकमची फळे उन्हाळी सिझनमधे येतात. याच्या रसापासून सरबत (किंवा याला "आगळ " ही म्हणतात) तयार केले जाते. शक्य असेल तर फळे विकत आणून घरीच करून ठेवावे. अथवा आजकाल बाजारात तयार आगळ मिळते. घरी आणून गरजेनुसार साखर, मीठ,पाणी घालून सरबत तयार करावे. कोकम सरबत कसे करायचे साहित्य व कृती-👇

साहित्य :-
अर्क तयार करण्यासाठी,
* कोकम फळे १ किलो
* साखर फळे बुडतील इतकी. अंदाजे २ ते २.५ किलो
सरबतासाठी,
* मीठ चिमूटभर (ऐच्छीक)
* जिरेपूड
* लिंबू स्वादासाठी (ऐच्छीक) 
* अर्क १भाग +पाणी ३ भाग

कृती :-
प्रथम कोकमची लाल पिकलेली फळे आणून स्वच्छ धुवून घ्यावीत. नंतर चाकूने चिरा माराव्यात.

नंतर त्यामधे साखर मिसळून बरणीत भरून ४ -६ दिवस ठेवावे. मधून मधून बरणी हलवत रहावी.

चार-सहा दिवसांनी भरपूर रस सुटतो.हा रस गाळणीने गाळून बाटलीमधे भरून ठेवावा. हा झाला अर्क किंवा आगळ. हे वर्षभर टिकते.

आता गरजेनुसार जेव्हा प्यायचे तेव्हा एका भांङ्यामधे एक भाग आगळ व तीन भाग थंड पाणी घालावे.

त्यामधे आवडीनुसार जिरेपूड, मीठ व लिंबू घालून ढवळावे व थंडगार प्यायला द्यावे.

आंबट -गोड चवीचे कोकम सरबत खूप सुंदर लागते व तहान भागते. रंगही आकर्षक लाल दिसतो.

टिप :
* तयार करून ठेवलेले आगळ सोलकढी साठी किंवा आमटी, भाजीत स्वयंपाकातही वापरता येते .

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

मधल्या वेळचे खाणं किंवा जेवणात साईड डिश म्हणून या वड्या खूप चविष्ट लागतात. पौष्टीक व करायला सहज सोप्या आहेत. कशा करायचा साहित्य व कृती-👇

साहित्य :-
* छिलका मुगडाळ २ वाट्या (२ तास भिजवलेली)
* खिसलेला कोबी अर्धी वाटी
* पालक चिरून अर्धी वाटी
* खिसलेले गाजर अर्धी वाटी
* हिरवी मिरची, आलं-लसूण पेस्ट २ टीस्पून
* मीठ चवीनुसार
* लाल मिरचीपूड १ टीस्पून
* हळद १/२ टीस्पून
* हींग चिमूटभर
*आमचूर पावडर १ टीस्पून
* धना-जिरा पावडर २ टीस्पून
* तिळ २ टीस्पून
* तेल तळण्यासाठी

कृती :-
प्रथम डाळ मिक्सरमधे मोटसर वाटून घ्यावी. नंतर त्यामधे वरील सर्व मसाला मिसळावा.

नंतर ढोकळा पात्राला तेलाचा हात लावून ताटलीमधे तयार मिश्रण ओतावे व १५-२० मिनिट कुकरमधे शिट्टी काढून वाफवावे.

वाफवून झाल्यानंतर कुकरमधून बाहेर काढून ठेवावे व थंड झाल्यावर चाकूने चौकोनी वड्या कापाव्यात.

शेवटी गरम तेलामधे खरपूस तळाव्यात व गरमा-गरम खायला द्याव्यात.

टीप :-
* आपल्या आवडीनुसार कोणत्याही भाज्या घ्याव्यात.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

'आटा हलवा' पौष्टीक व करायला एकदम सोपा आहे. खायलाही रूचकर लागतो. हा हलवा पंजाबी लंगरमधे,गुरूद्वारामधे प्रसाद म्हणून दिला जातो. याला 'कडा प्रसाद' असे न्हणतात. कसा करायचा साहित्य व कृती-👇

साहित्य :-
* गव्हाचे पीठ १ वाटी
* साखर १ वाटी
* तूप १ वाटी
* पाणी किंवा दूध ३ वाट्या
* वेलचीपूड, ड्रायफ्रूट्स

कृती :-
प्रथम गव्हाचे पीठ तूपावर तांबूस, गुलाबी रंगावर भाजून घ्यावे.

आता पाणी गरम करून साखर घालावी. विरघळेपर्यंत हलवावे व हे गरम पाणी भाजलेल्या पीठामधे घालावे. पाणी आटेपर्यत एकसारखे हलवावे. गुठळ्या राहू देऊ नयेत.

शेवटी वेलचीपूड घालावी व वरून ड्रायफ्रूट्स घालून खायला द्यावे. आवडत असल्यास अजून चमचाभर घरचे तूप वरून घालावे व गरमा-गरम द्यावे.

टिप्स :-
*तुपामध्ये काटकसर अजिबात करू नये.
*साखर आवडीनुसार कमी-जास्त करावी.
*शक्यतो गव्हाचे पीठ थोडे जाडसर दळलेले घ्यावे.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

उन्हाळा म्हटले की थंडगार काही प्यायला मिळाले तर सर्वानाच आवडते. त्यातही आंब्याचा सिझन चालू असतो. मग काय आंब्यापासूून बनणारी विविध थंड पेय, आईस्क्रिम, कुल्फी... मजा असते. आमच्याकडे उन्हाळा आंबामय असतो. आंब्याचेच विविध पदार्थ चालू असतात. त्यापैकीच एक "मँगो लस्सी " साहित्य व कृती-👇
साहित्य :-
* ताजे गोड दही २ वाट्या
* पिकलेला हापूस आंबा मोठा १
* साखर आवडीनुसार
* मीठ चिमूटभर
* फ्रेश क्रिम २ टेस्पून (ऐच्छीक)

कृती :-
प्रथम आंबा साल काढून चौकोनी फोडी करून घ्यावा.

आता मिक्सरमधे दही, आंब्याच्या फोडी, साखर २ चमचे व चिमुूटभर मीठ घालून घुसळावे. फारच घट्ट वाटले तर बर्फाचे खडे किवा गार पाणी घालून घुसळावे.

फ्रेश क्रिम वापरणार असाल तर मिश्रण घुसळून झाल्यावर घालावे व परत एकदा हलकेच घुसळावे. क्रिममुळे लस्सी मलईदार लागते व ग्लासमधे ओतल्यावर वर फेस (फोम) येतो. दिसायला आकर्षक दिसते.

आता तयार थंडगार लस्सी काचेच्या मोठ्या ग्लासमधे घालून प्यायला द्यावी.

टिप्स :-
* आंबा शक्यतो हापूसच घ्यावा. केशर नसतो. इतर कोणता वापरायचा असेल तर आधी मँगो पल्प तयार करून गाळून घ्यावा.
.* दही ताजे व गोड असावे.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

""पिनव्हील सँडविच" हे चवीला,आपल्याला माहीत असणार्या नेहमीच्या सँडविच प्रमाणेच असते परंतु याचा वेगळा आकार आकर्षक दिसतो. यामुळेच लहान मुलांना खूप आवडते. मुलांना शाळेच्या डब्यात द्यायला किंवा बर्थडे पार्टीसाठी एकदम सोयीचे आहे. कसे करायचे साहित्य  व कृती-👇

साहित्य :-
* सँडविच ब्रेड स्लाईस ४
* हिरवी चटणी
* टोमँटो साँस
* बटर
* गाजर किसून
* कोबी किसून
* शिमला मिरची किसून
* चाट मसाला
* मीठ

कृती :-
प्रथम ब्रेडच्या कडा काढून घ्याव्यात व लाटण्याने साधारण लाटून पातळ करून घ्यावेत.

नंतर दोन ब्रेड एकाखाली एक व थोडेसे काठ एकमेकावर ठेेवून पाण्याने चिकटवून घ्यावे. परत एकदा अलगद हाताने जोडावरून लाटणे फिरवावे.

आता संपूर्ण ब्रेड स्लाईसला बटर लावावे. नंतर अंतरा अंतराने हिरवी चटणी एकदा व एकदा टोमँटो साँस लावावे.

नंतर हिरवी चटणी लावलेल्या पट्यावर हिरवा कोबी व शिमल्याचा किस पसरावा व साँस लावलेल्या पट्यावर गाजराचा किस पसरावा.

शेवटी त्यावर चाट मसाला व मीठ भुरभुरावे.

आता अलगद हाताने, घट्ट अशी ब्रेडची सुरळी करावी व अँल्यूमीनियम फाँइलमधे गुंडाळून,फ्रिजमधे १५ मिनिट ठेवावे.

१५ मिनिटानंतर रोल फ्रिजमधून बाहेर काढून अर्धा ते पाऊण इंचाचे स्लाईस करावेत व खायला द्यावेत.

टिप्स :-
* ब्रेड ताजा व शक्यतो रूंद मोठ्या स्लाईसचा असावा.
* भाज्या आपल्या आवडीनुसार घ्याव्यात परंतु लाल, हिरवा असे रंग असावेत. दिसायला आकर्षक दिसते.
*भाज्या खूप जास्त भरू नयेत. स्लाईसची गुंडाळी करणे अवघड होते.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

उन्हाळा म्हटले की वाळवणाचे अनेक पदार्थ तांदुळ, गहू, ज्वारी, नाचणी अशा घान्यापासून केले जातात. पापड, कुरडया,सांडगे इत्यादी. अशापैकीच एक "फुलाचे सांडगे " हा एक पारंपरिक व तांदुळापासून बनणारा उन्हाळी वाळवणाचा एक सोपा प्रकार आहे. कसा करायचा साहित्य व कृती-👇

साहित्य :-
* तांदुळाची पीठी (3 दिवस तांदुळ भिजत घालून केलेली)  २ वाट्या
* पाणी 2+ 2 वाट्या
* मीठ चवीनुसार ( अंदाजे १ टीस्पून)
* जीरे १ टीस्पून

कृती :-
प्रथम तांदुळाची पीठी २ वाट्या पाणी घालून भजीच्या पीठाप्रमाणे कालवून घ्यावी.

नंतर २ वाट्या पाणी गँसवर गरम करण्यास ठेवावे. पाण्यात मीठ व जीरे घालावेत.

आता पाणी उकळायला लागले की, एका हाताने पीठाची धार गरम पाण्यात धरावी व  दुसर्या हाताने रवीचा दांडा पाण्यात फिरवत रहावे की जेणेकरून गुठळी होऊ नये.

पीठ लगेच दोन मिनीटांत घट्ट होईल. गँस बंद करावा. झाकणी ठेऊ नये. ही उक्कड कच्चीच राहीली पाहीजे.

आता पीठ गरम-गरम असतानाच लहान थाळीत पीठ घ्यावे व मोदकाच्या आकाराचे लिंबाएवढे गोळे वर टोक काढून, हातानेच तेल लावलेल्या ताटात घालावेत. उन्हात २ -३ दिवस वाळवावेत.

वाळल्यानंतर हवाबंद डब्यात भरून ठेवावे.केव्हाही वाटेल तेव्हा तळून खावेत. सांडगे उन्हात ठेवले की, उकड कच्ची असल्याने तडकतात व तळले की फुलासारखा आकार येतो म्हणून "फुलाचे सांडगे "!

अतिशय कुरकुरीत व खमंग असे "फुलाचे सांडगे" चविला छान लागतात. चहासोबत किवा जेवणात घेतले तरी चालतात.

टिप्स -
* पीठ शिजताना आवडीनुसार हिरवी मिरची पेस्ट किंवा लालमिर्ची पावडर, ओवा अथवा कांदा बारीक चिरून घातला तरी चालते.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

"बटाटा-शाबूदाणा पापड " उन्हाळी वाळवणाचा पदार्थ आहे. उपवासा दिवशी किंवा इतरही वेळीही चहासोबत तळून खायला खुसखूषीत लागतात. परंतु त्याआधी करून, उन्हात वाळवून डब्यात ठेवल्यातरी पाहीजेत ना.. . कसे करायचे साहित्य व कृती-👇

साहित्य :-
* १ वाटी साबुदाणा
* बटाटे मध्यम आकाराचे ४-५ (शक्यतो चिकट नसणारे जुने बटाटे)
* ४-५ हिरव्या मिरच्या भरड वाटून 
* प्रत्येकी १ टीस्पून - जिरे, जिरे पूड
* चवीप्रमाणे मीठ
* पाणी २ वाट्या

कृती :-
प्रथम शाबूदाणा रात्रीच धुवून वर अर्धा इंच पाणी ठेवून भिजवावा. बटाटे उकडून ठेवावेत.

सकाळी बटाटे सोलून किसून घ्यावेत. शाबूदाणा हाताने मोकळा करावा.

नंतर गँसवर २ वाट्या पाणी गरम करण्यास ठेवावे. त्यामधे मीठ, मिरचीची भरङ, जीरे व जीरपूड घालावी. 

आता भिजलेला शाबूदाणा त्यामधे घालावा व शिजू द्यावा. सतत हलवत रहावे. शिजत आल्यावर किसलेला बटाटा घालून ५ मिनिट रटरटू द्यावा. गँस बंद करावा.

नंतर पळीने आपल्या आवडीच्या आकाराचे पापड प्लास्टिक कागदावर उन्हातच घालावेत.  दोन ते तीन दिवस उन्हात कडक वाळवावेत.

वाळलेले पापड घट्ट झाकणाच्या डब्यात भरून ठेवावे.केव्हाही काढून तळून खावेत.

टिप:- उकडलेल्या बटाच्याऐवजी कच्चा बटाटा किसून घातला तरी चालतो. बटाटा रात्रीच किसून, धुवून  तुरटीच्या पाण्यात घालून ठेवावे. सकाळी पाणी निथळून काढावे.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

उन्हाळ्याच्या दिवसात वाळवणाचे साठवणी पदार्थ बरेच केले जातात. उपवासाचे,  बिन उपवासाचे कुरडई, विविध प्रकारचे सांङगे ,पापड इत्यादी...की,जेणेकरून येणार्या पावसाळ्याची बेगमी झाली.एखादे दिवशी भाजी नसेल तरी तोंडीलावण्याची उणीव भासू नये. तसेच उपवासाचे काही पापड्या, चिवडा असेल तर फराळाला सोयीचे होते. आणि ते सर्व राहूदे,  तळलेले चटपटीत पदार्थ चहासोबत खायला कोणाला नाही आवडत?  सर्वानाच आवडतात. तर उन भरपूर आहे. "तांदुळाचे कुरकुरे" करून वाळवून ठेवा. कसे करायचे साहित्य व कृती-👇

साहित्य :-
* तांदुळाची पीठी मोठ्या २ वाट्या (3 दिवस तांदुळ भिजत घालून केलेली)
* पाणी २.५ + २ वाट्या
* मीठ चविनूसार (सपाट १ टीस्पून)
* ओवा, जीरे प्रत्येकी १/२ टीस्पून
* मिरची पावडर किंवा हिरवी मिरची वाटून प्रमाण आवडीनुसार (ऐच्छिक)

कृती :-
प्रथम तांदुळाची पीठी २. ५ वाट्या पाणी घालून सरसरीत भिजवून घ्यावी. पंधरा मिनिट झाकून ठेवावी.

नंतर गँसवर २ वाट्या पाणी गरम करण्यास ठेवावे व पाण्यात तिखट,मीठ, जीरे, ओवा घालावे. पाण्याला उकळी आली की, आधी भिजवून तयार केलेल्या पीठाची धार हळू एकसारखी  त्या पाण्यात सोडावी व उलथन्याच्या टोकाने एकसारखे ढवळत रहावे. जेणेकरून गुठळी होणार नाही. पांच मिनिट झाकून वाफ आणावी. नंतर गँस बंद करून तसेच झाकून १५ मिनिट राहू द्यावे.

पंधरा मिनिटानंतर तयार पीठ घोटावे व चकली पात्रात घालून त्याच्या लांब लांब सरळ रेषा ताटात किंवा कापडावर घालाव्यात. चकली पात्राला चकली ऐवजी गाठीयाची चकती बसवावी.

उन्हात ३-४ दिवस चांगले कडकडीत वाळू द्या. नंतर हवाबंद डब्यात ठेवून द्यावे. खावे वाटेल तेव्हा तेलात तळावे व आवडत असल्यास वरून चाटमसाला, लाल मिरचीपूड शिंपडावे व खावे.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

बरेचवेळा घरात केळी आणली जातात. परंतु ती घट्ट व पांढराशुभ्र असेपर्यंत म्हणजे पहिले एखाद-दोन दिवस खातात सर्वजण, व नंतर ती मऊ, काळी झाली की कोणी हात लावायला तयार होत नाही. मग त्याची शिकरण कर.. सुधारस कर असे करावे लागते. नाहीतर वाया जातात. तसेच आपण कुठे बाहेर देवाला गेलो किंवा आणखी कांही इतर कारणानी घरात ओले खोबरे (नारळ)  जमा होते. अशावेळी असे केळ व खोबरं घालून त्याचे छोटे-छोटे लाडू करून ठेवावेत. ४ -८ दिवस सहज टिकतात व मुलांना किंवा कोणी धरी आल्यावर खायला देण्यास सोयीचे होते. कसे केले साहित्य व कृती-👇

साहित्य :-
* ओलं खवलेलं खोबरं  ४ वाट्या
* पिकलेली मऊ लहान केळी ४
* साखर ४ वाट्या
* मिल्क पावडर २ टेस्पून
* डेसिकेटेड कोकोनट अर्धाी वाटी
* वेलचीपूङ
* काजू ऐच्छिक

कृती :-
प्रथम एका जाड बुडाच्या कढईमधे ओलं खोबरं व साखर एकत्र  करून गँसवर ठेवावे.

नंतर साखर विरघळून मिश्रण चटचटायला लागले केळी मँश करून घालावी. सतत हलवत रहावे. तळाला लागू देऊ नये.

आता साधारण दहा मिनिटानी मिश्रण घट्ट व्हायला लागले की वेलचीपूड, मिल्कपावङर व काजू बारीक तुकडे करून घालावे. मिश्रण व्यवस्थित घोटावे.

आता मिश्रण बाजूने कोरडे व्हायला लागेल व गोळा कढईपासून सुटा व्हायला लागेल. लगेच गँस बंद करावा.

नंतर मिश्रण किंचित कोमट होऊ द्यावे व पटापट् लहान -लहान गोळे बनवावेत व डेसिकेटेड कोकोनट मधे घोळवावेत.

थंड झाले की खायला द्यावेत. या लाडूला खुप मस्त केळाचा स्वाद येतो.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

केव्हाही फळे सालीसह दातानी चावून खाणे आरोग्याच्या दृष्टीने चांगले असते. परंतु काही वेळा आबाल, वृध्द लोकांना ते शक्य नसते. किंवा काही वेळा सिझनला मुबलक प्रमाणात व स्वस्त फळे येतात. तेव्हा असे प्रकार मी करते. तर कसे करायचे साहित्य व कृती-👇

साहित्य :-
* काळी द्राक्षाचे २ मोठ्या वाट्या
* साखर पाव वाटी
* लिंबू १
* पाणी १ग्लास

कृती :-

प्रथम द्राक्षे स्वच्छ धुवून १ ग्लास पाणी घालून शिजवून मऊ करून घ्यावीत.

थंड झाल्यावर मँशरने मँश करावे व रस गाळणीने गाळून घ्यावा.

गळालेला रस, साखर घालून गँसवर साखर विरघळेपर्यंत उकळावा. उकळत असताना एका लिंबाचा रस त्यामधे पिळावा.

आता रस थंड होऊ द्या. थंड झाल्यावर बाटलीमधे भरून फ्रिजमधे ठेवावा.

प्यायला देताना एक भाग द्राक्षाचा रस व तीन भाग पाणी व आवडीनुसार बर्फ घालावा.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

"कैरी भात" ही दक्षिण भारताची खासियत आहे. उन्हाळ्याच्या दिवसात कच्या कैर्या येतात. या गुणधर्माने थंड असतात. त्यामुळेच उन्हाळ्याचे दिवसात कैरीचे पन्हे, सरबत, आंबेडाळ,  कायरस असे अजून कितीतरी पदार्थ बनविले जातात.अशापैकीच हा "कैरीभात " हा करायला अतिशय सोपा आहे व  चविष्ट लागतो. कसा करायचा साहित्य व कृती-👇

साहित्य :-
* तांदुळ २ वाट्या
* कैरी मध्यम १
* चणाडाळ १ टीस्पून
* उडीद डाळ १ टीस्पून
* शेंगदाणे १ टेस्पून
* सुक्या २ लाल मिरचीचे तुकडे
* कढीपत्ता
* धना-जिरा पावडर १ टीस्पून
* गरम मसाला १ टीस्पून
* मीठ चविनूसार
* साखर चिमूटभर
* हिंग, मोहरी, हळद फोडणीसाठी
* तेल २ टेस्पून

कृती :-
प्रथम तांदुळचा मोकळा भात शिजवून घ्यावा व गार होण्यासाठी ताटात पसरून ठेवावा.

आता कैरी किसून घ्यावी. नंतर कढईत तेल गरम करून फोडणी करावी. फोडणी तडतडली की,चणाडाळ, उडीद डाळ व शेंगदाणे घालून तांबूस परतावे. परतत आले की हळद, मिरची, कढीपत्ता घालावा. बाकी मसाले, मीठ सर्व आताच घालून परतावे. शेवटी कैरीचा किस घालून मऊ होईपरेंत परतावा. गँस बंद करावा.

आता तयार मसाल्यामधे गार भात घालून व्यवस्थित एकजीव करावे. हा भात गारच खातात. त्यामुळे वाफ आणण्याची आवश्यकता नाही.

कच्या कैरीच्या चविचा थोडा आंबट,मसालेदार भात अत्यंत उत्कृष्ट लागतो. तुम्हीही करून बघा नक्की आवडेल.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.