पंचधान्याचे दुधीचे थालिपिठ(Panchdhanyache Thalipith)

दुधी ही एक अत्यंत पौष्टीक अशी फळभाजी आहे. या भाजीचा कोणताही भाग वाया जात नाही.चिरून भाजी तर होतेच, पण सालीची चटणी होऊ शकते.दुधीचा रस तर ह्रदय रूग्णांसाठी अत्यंत लाभदायक आहे.पण अशा पौष्टीक दुधीची भाजी सर्वांना आवडतेच असे नाही म्हणून पुढे दिल्याप्रमाणे थालिपीठे बनवावित व दुधी खावा.सर्व धान्येही पोटात जातात.

साहीत्य:

* ज्वारीचे पीठ १वाटी
* हरभरा डाळीचे पीठ १/२ वाटी
* तांदुळ पीठ १/४ वाटी
* बाजरी पीठ १/४ वाटी
* गहू पीठ एक चमचा
* दुधीचा किस पीठात मावेल एवढा (अंदाजे २ वाट्या लागतो)
* आले,लसूण,हिरवी मिरचीपेस्ट आवडीनुसार
* धना जिरा पावडर  टीस्पून
* हळद,हींग,मीठ चवीप्रमाणे
* कोथिंबीर
* तेल

कृती:-
प्रथम वरील सर्व पिठे एका बाऊलमधे एकत्र करावित.त्यामधे वर दिलेला ओला व कोरडा मसाला घालावा व नीट हलवावे.शेवटी त्यात मावेल एवढा एवढा दुधीचा किस घालावा व पिठाचा गोळा बनवावा.

नंतर तयार पीठाचा लहान गोळा घ्यावा व थंड तेल लावलेल्या तव्याला हाताने थापून पसरवावा. मधे-मधे बोटानी चार पाच छिद्रे पाडावीत व त्यामधे तेल सोडावे.एक बाजू भाजली की, उलटून दूसरी बाजू भाजून घ्यावी.

असे खरपूस भाजलेले थालिपीठ दह्याबरोबर खाण्यास द्यावे.

आपल्या मौल्यवान सूचना व अभिप्राय, आम्हाला जरूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.