शंकरपाळे (Shankarpale)

शंकरपाळे फार गोड किंवा खारेही नसतात. त्यामुळे चहासोबत खायला छान लागतात. त्यातही मला पुरीसारखे फुगलेले पातळ शंकरपाळे नाही आवडत. कारण हाताळताना वरच्या फुग्याचा पार चुरा होतो व दिसायला चांगले नाही दिसत. मला हाँटेलमधे जाड, ठुसठूशीत, खुसखूषीत असतात असे आवडतात. त्यामुळे मी नेहमी तसेच बनवते. कसे करायचे साहित्य व कृती 

साहित्य:-

* मैदा ३ वाट्या
* साखर १/२ वाटी
* पाणी १/२ वाटी
* तेल १/२ वाटी
* मीठ
चिमूटभर
* तळणीसाठी पुरेसे तेल

कृती:-

प्रथम मैदा स्वच्छ चाळून एका पसरट भांड्यामधे घ्यावा व त्यामधे मीठ  घालून सारखे करून घ्यावे. 

दुसर्या एका भांड्यामधे पाणी, तेल व साखर एकत्र करून गॅसवर ठेवावे.ढवळत रहावे. साखर विरघळून पाणी उकळू लागले की, मैद्यामधे घालावे.नंतर हाताने मैदा मळून घट्ट गोळा तयार करावा. दहा मिनीटे झाकून ठेवावा.

आता तयार  कणिकेचा एक-एक मोठा गोळा घेऊन पराठ्याप्रमाणे जाडसर पोळी लाटावी व सुरीने किंवा कातरण्याने त्याचे चौकोनी तुकडे कापून घ्यावेत.

एका तळपाइतके झाले की गरम तेलात टाकावेत व ते तळत-तळत दुसरी पोळी लाटावी.

अशा रीतीने सर्व शंकरपाळे मंद आचेवर सोनेरी रंगावर तळावेत.थंड होऊ द्यावेत. म्हणजे खुसखूषीत होतात.नंतर हवाबंद डब्यात भरून ठेवावे.चहा बरोबर खायला छान लागतात.

टीप्स :-

* पाण्याऐवजी दूध वापरले तर फारच खुसखूषीत होतात.निम्मे दूध व निम्मे पाणी वापरले तरी चालते.
* शंकरपाळ्यासाठी मैदा फार जूना वापरू नये.

आपल्या मौल्यवान सूचना व अभिप्राय, आम्हाला ज़रूर द्या. आपल्या प्रतिसादाने नव-नवीन पदार्थ करण्यास प्रेरणा मिळते.