होममेड श्रीखंड(Home made Shrikhand)

श्रीखंड हा पदार्थ गुजरात मधून आला. आता मात्र जगभरात स्वीटडीश म्हणून खाल्ला जातो. श्रीखंड श्रीकृष्णाचा आवडता पदार्थ असल्याने त्याच्या नैवेद्यासाठी सुध्दा वापरतात. थंडगार, मलईदार गोड श्रीखंड जेवणात पक्वान्न म्हणून पण केले जाते. तसे तर एरव्ही विकतचे निरनिराळ्या कंपन्यांचे तयार श्रीखंड आणून खाल्ले जातेच. परंतु खास मराठी नववर्षाच्या सुरवातीला म्हणजे गुढीपाडव्याला आमच्याकडे हमखास धरी चक्का बांधून केले जाते. अगदी चक्यासाठीचे दहीपण घरीच केले जाते. तर असे मलईदार, मधुर चविचे श्रीखंड कसे करायचे साहित्य व कृती-👇 

साहित्य :

* म्हशीचे दूध २ लिटर (फुल क्रीमचे)

* साखर ५-६ वाट्या (आवडीनुसार साखर कमी-जास्त घ्यावी)
* वेलची पूड,जायफळ पूड आवडीनुसार
* सूकामेवा टूटी-फ्रूटी आवडीनूसार
* केशरकाड्या चिमूटभर
* मीठ पाव टीस्पून
* दही/ताक दोन मोठे चमचे विरजणासाठी

कृती:

प्रथम दूध आदलेदिवशी सकाळी घेऊन कोमट करून (तापवू नये,साय काढू नये) दही/ताक घालून विरजावे.रात्रीपर्यंत दही तयार होते.

नंतर तयार दही रात्री एका पातळ कपड्यामधे बांधून आपल्या सोयीने लटकवून ठेवावे व त्याखाली पाणी धरण्यासाठी भांडे ठेवून द्यावे.

दुसर्या दिवशी सकाळी तयार चक्का चाळणीवर घासून अथवा पुरण यंत्रातून फिरवून गुठळ्या मोडून गुळगुळीत करून घ्यावा.

आता तयार फेटलेल्या चक्कयामधे साखर/पिठीसाखर ,(मोठी साखर मिक्सरवर बारीक करून घ्यावी. लवकर विरघळते) वेलचीपूड,जायफळपूड व केशर, थोडा सूकामेवा घालून चांगले एकत्र घोटावे वरून सजावटीसाठी राहीलेला सुकामेवा ,टुटीफ्रूटी घालावे व फ्रीजमधे थंड होण्यास ठेवावे.

जेवणाचे वेळी मलईदार ,घट्ट असे थंडगार श्रीखंड तयार ! व घरीच बनविल्याने त्याची बाहेरच्या तयार बाऊल मधील श्रीखंडापेक्षा लज्जत न्यारीच असते.आणि मनसोक्त खाता येते.

टीप: आंब्याच्या मोसमात आपण  तयार चक्कयामधे आंब्याचा रस मिसळून आम्रखंडपण बनवू शकतो.एरव्ही बनविण्यासाठी बाजारात मिळणारा तयार मॅगोपल्प आणावा .

दही बांधून ठेवल्यावर खालच्या भांड्यामधे जे पाणी जमा होते ते,टाकून देऊ नये त्या पाण्यामधे पराठ्याची कणिक भिजवावी अथवा ताकामधे मिसळून पिऊन टाकावे.खूप पौष्टीक असते.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.