पडवळ ही एक वेल वर्गीय फळ भाजी आहे. बहुतेक सर्वांच्या परिचयाची आहे. पडवळ हे ह्रदयासाठी उत्तम टाँनिक आहे. कमी कँलरी असल्याने वजन कमी करण्यासाठी सुध्दा खातात. पडवळाची पाने, रस व बियासुध्दा विविध तक्रारीवर उपयुक्त आहेत. सामान्यपणे आपण पडवळाची भाजीच करणे पसंत करतो पण, भरीत म्हणजेच रायते सुध्दा रूचकर लागते. पडवळाचे भरीत हा एक पारंपरिक पदार्थ आहे. कसा केला साहीत्य व कृती :-

साहीत्य :-

* पडवळ पाव किलो
* ताजे दही अर्धी वाटी
* चविनुसार मीठ व साखर
* फोडणीसाठी तेल व फोडणी साहीत्य
* हिरवी मिरची एखादी
* कोथंबिर

कृती :-

सर्वात आधि पडवळ स्वच्छ धुवून, चिरून त्याच्या मधील गर व बिया काढून टाका. (बियांची वेगळी चटणी होउ शकते) मोठे -मोठे एक एक इंचाचे तुकडे करून घ्या.

केलेली तुकडे कुकरमधे वाफवून घ्या. शक्यतो डाळ -भाताच्या कुकर सोबत वेगळ्या डब्यात वाफवले तरी चालते .

वाफवलेले तुकडे थंड झाल्यावर हाताने कुस्करावेत व त्यामधे दही, मीठ, साखर घालावे.

आता कढल्यात तेल गरम करून हींग, जिरे,  मोहरी व थोड़ी हळद घालून फोडणी करा. फोडणीमधेच मिरचीचे तुकडे घाला. फोडणी थंड होऊ दे.

आता थंड झालेली फोडणी तयार भरीतावर घालावी. वरून बारीक चिरलेली कोथंबिर घालून सर्व एकत्रित व्यवस्थित हलवा.

चटकदार तयार भरीत जेवणात डाव्या बाजूला वाढावे. जेवणाची लज्जत वाढवते.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

सिमला मिरची सर्वाच्या परीचयाची भाजी आहे. यालाच कोणी ढब्बू मिरची तर कोण ढोबळी मिरची पण म्हणतात. ही मिरची हाताशी असेल तर पट्कन कशातही म्हणजे मसाले भात ,पोहे, इ. मधे घालता येते. एक विशिष्ठ चव असते. ती सर्वानाच आवडते. सिमला मिरचीची तीन-चार प्रकारे भाजी बनविता येते. पण कोणत्याही भाजीचा,'मसाला भरलेला प्रकार सर्वाना जास्तच आवडतो. तर आज, "भरलेली सिमला" करू आपण

साहीत्य :-
* लहान आकाराची सिमला 1/4 किलो
* चणा डाळीचे पीठ पाव वाटी
* सुक खोबरे पाव वाटी
* ओले खोबरे पाव वाटी
* भाजलेल्या शेंगदाण्याचे कूट अर्धी वाटी
* भाजलेले तिळ एक टेस्पून
* गोडा मसाला 2 टीस्पून
* लाल मिरची पावडर 2 टीस्पून
* हळद
* मीठ चवीनुसार
* चवीला किचित साखर/गुळ
* फोडणी साहीत्य हिंग,जीरे,मोहरी
* तेल
* कोथिंबीर
* कांदा एक मोठा बारीक चिरून

कृती :

प्रथम मिरची धुवून पुसून अर्धे देठ कापून पोटात उभे चिरून घ्या. आरपार चिरू नका. पोटात मसाला भरता आला पाहीजे.

डाळीचे पीठ किंचित भाजून घ्या.कच्चेपणा जाण्यापुरतेच. सुके खोबरेही थोडे परता. एका डिशमधे काढा.

आता थंड झाल्यावर त्यामधे राहीलेले सर्व साहीत्य दाण्याचे कूट,ओले खोबरे,तिळकूट व मसाला, तिखट, मीठ, साखर सर्व घाला.हाताने नीट एकजीव करा.

नंतर चिरून ठेवलेल्या मिरची मधे मसाला भरून घ्या.

आता तेल गरम करून हिंग मोहरी फोडणी करा. त्यात कांदा गुलाबी परता. त्यावर भरलेल्या मिरच्या घाला व अलगद परता . वर ताटली झाकून त्यात पाणी घाला व वाफेवर शिजवा भाजी .दहा मिनिटात छान वाफ येते व शिजते . मधे एक-दोनदा हलवा. गॅस बंद करा. वरून कोथंबिर घाला.

तयार भाजी ,भाकरी  किवा पोळीसोबत वाढा. अतिशय रूचकर लागते.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

 याचे नांव "फराळी रोल" असे असले तरी हे फक्त उपवास असेल तरच करावे व खावे असे नाही. आपण इतर वेळी सुध्दा करू शकतो .. संध्याकाळचे वेळी खाण्यासाठी किंवा कोणी येणार असेल तर चहा सोबत देण्यासाठी. उपवास आहे म्हणले की नेहमीचीच तीच ती  खिचडी खाउन कंटाळा येतो . काही नवीन चटपटीत बरे वाटते जिभेला . तर असे हे खमंग व झट्पट रोल कसे करायचे बघू !

साहित्य :-

१ ) कच्चे बटाटे साल काढून किसून  २ नग
२ ) राजगिरा पीठ ४ टेस्पून
३ ) शिंगाडा पीठ २ टेस्पून
४ ) भाजलेल्या शेंगदाण्याचे कूट २ टेस्पून
५ ) मीठ व लाल तिखट / ही. मिरची चवीनुसार ६ ) जिर पूड १ टिस्पून
७ ) तेल तळणी साठी

कृति 
      प्रथम किसलेला बटाटा एका  बाऊल मधे घ्यावा .

नंतर त्या मधे वरील सर्व साहित्य घालावे व हाताने नीट एकजीव करावे . दहा मि. ठेवा ..

आत मिश्रणाचे लहान लहान गोळे घ्यावेत व हाताने त्याचे साधारण लांबट गोल रोल तयार करून राजगिरा पिठात घोळवा .

नंतर गरम तेलात तांबूस रंगावर तळून टीश्यु पेपर वर काढा .

हिरव्या चटणी सोबत किंवा दह्यात थोडे शेंगदाण्याचे कूट ,लाल तिखट व मीठ घालून एकत्र करा . उपवासाची चटणी तयार करा . रोल सोबत द्या .
आणी  जर उपवास नसेल तर टोमॅटो सॉस पण देऊ शकतो .

टिप्स :- बटाट्याच्या ऐवजी साबूदाणा जर भिजलेला तयार असेल तरी तोही वापरू शकतो .

आमच्याकडे श्राावण महिन्यातल्या प्रत्येक सणाचे सणाचे पक्वान्न ठरलेले आहे. जसे की ,पंचमीला कानोले , सोमवार सोडण्यासाठी सांजा पोळी ,निरनिराळ्या खिरी,, गणपती उकडिचे मोदक तसेच राखी पोर्णिमा म्हणले की , "गोड नारळीभात " झालाच पहिजे. असा हा पारम्पारिक भात कसा केला जातो पहा !

साहित्य :-
१) बासमती तांदूळ १ वाटी
२) साखर किंवा गुळ १  वाटी
३) ओले खवलेले खोबरे १ १/२ वाटी
४) तूप पाव वाटी
५) फोडणी साठी लवंगा ४- ५
६) वेलची पूड व ड्रायफ्रूट्स आवडिनुसार
७) पाणी  २ वाट्या

कृती :-

तांदूळ धुवून १५ मिनट ठेवावे .तोपर्यत गॅस वर पाणी गरम करण्यास ठेवावे .

नंतर गॅस वर पातेल्यात तूप घालून त्यात लवंगा टाका .आता त्यावर तांदूळ टाकून परता.

नंतर गरम पाणी घालून भात शिजत राहू दे . पूर्ण शिजणेच्या आधी शेवटी भातात खोबरे ,साखर व वेलची पूड ,ड्रायफ्रूट्स घालून नीट हलवा .एक वाफ येऊ दे.

पांच मिनिटांनी गॅस बंद करावा  व वरून कडेने थोडे तूप सोडावे..म्हणजे चिकट होत नाही भात .

आता वाटिला आतून तुपाचा हात लावून काजू बदमाचे काप घाला व भात भरून मुद पडावि व वरून साजूक तुपाची धार सोडून गरमागरम गोड नारळी भात भाऊरायाला खायला द्या .

टिप :-  ४-५ वाट्यापर्यत करायचा असेल तर अशा पध्दतीने झट्पट केला तर चालतो .जास्त मोठ्या प्रमाणावर करायचा असेल तर भात आधी शिजवुन घ्यावा व नंतर सखरेच्या पाकात टाकून करावा.
शक्यतो गुळच वापरावा .रंग पण छान केशरी येतो व आरोग्याला पण चांगला. साखर घातली तर चिमुटभर खाद्यरंग वापरा .

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

मुलांना नेहमी काहीतरी खमंग चटपटीत असे येता -जाता तोंडात टाकायला लागते असे आपण म्हणत आसतो. पण खरं सांगा आपण मोठ्याना पण चहा बरोबर असे काही खमंग असले तर बरे वाटतेच ना? मुले बाहेरचे रेडिमेड चिप्स आवडीने खातात. पण त्यापेक्षा आपण घरीच असे काही बनविले तर , पौष्टीक पण होईल . तसेच मुलांचे जोडीला आपली ,आला -गेला पाहूणा सर्वांचीच सोय होईल ! चला तर मग आपण खमंग चिप्स बनवू .

साहित्य :-

१) गव्हाचे पीठ २ वाट्या
२) मैदा २ वाट्या
३) बारिक रवा १/२ वाटी
४) तिखट ,मीठ चवीनुसार
५) हळद , हिंग गरजे पुरते
६) धना-जीरा  पावडर २ चमचे
७) कसुरी मेथी चिमुटभर
८) कडिपत्ता बारिक चिरून
९) ओवा १/२ टिस्पुन ,तीळ १/२ टिस्पुन
१०) मोहन २ टेस्पुन
११) तळणि साठी  तेल
१२) पाणी

कृती :-

सर्वात आधी रवा, मैदा व गव्हाचे पीठ चाळून घ्यावे.

नंतर वर साहित्यात दिलेला सर्व मसाला घालून व्यवस्थित मिक्स करून घ्या .

आता तेलाचे मोहन घाला व सर्व पिठाला हाताने नीट चोळा . लागेल तसे पाणी घालून कणिक पुरीच्या ,कणकेप्रमाणे घट्ट मळा. अर्धा तास झाकून ठेवा.

नंतर तयार पीठाचा रोजच्या पोळीसाठी घेतो  इतका मोठा एक गोळा घ्यावा व पातळ पोळी लाटावी. त्यावर सूरी अथवा काट्यांनी टोचे मारावेत.नंतर कट्लेटच्या साच्याने आपल्या आवडीचे  लहान -लहान आकार कापावेत.

आता गरम तेलात मंद आचेवर तळावेत. गार होऊ द्यावेत. म्हणजे कुरकूरीत होतात .

टिप :-लाटलेलि पोळी पातळच असावी . नाहीतर चिप्स तळल्यावर कटकटित  किंवा मऊ होतील .

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

कोणताही पराठा प्रकार मला नेहमीच आवडतो.कारण गरमा-गरम पराठ्यासोबत एखाद लोणचं, दही किंवा लोणी असलं की मस्त पूर्ण जेवण झाल्याचच समाधान मिळत. बर्याचदा सुटी भाजी व पोळी मुलांना नको असते पण तीच भाजी घालून केलेला पराठा आवडीने खातात. आज मी 'पनीर पराठा' केलाय. पनीरमधे प्रोटीन,कार्बोहायड्रेड व कॅल्शियम भरपूर असते व पौष्टीक असते. साहीत्य व कृती,

साहीत्य :-

* पनीर
* हिरवी मिरची,आलं पेस्ट
* कोथंबिर बारीक चिरून
* धना-जीरा पावडर
* मीठ चवीला
* गव्हाचे पीठ
* पाणी कणिक मळण्यासाठी
* बटर/ तेल भाजण्यासाठी

कृती :-

प्रथम गव्हाचे पीठ चमचाभर तेल व चिमूटभर मीठ घालून नेहमीच्या कणिकेप्रमाणे कणिक मळून घ्या. पंधरा मि. झाकून ठेवा. तोपर्यंत,

पनीर हाताने चूरून मोकळे करून घ्या. नंतर त्यामध्ये मिरची ,आलं पेस्ट , धना-जीरा पावडर,मीठ,कोथंबीर घालून, हाताने  नीट एकजीव करून सारण तयार करा.

आता तयार सारण कणकेचा लहानसा गोळा घेऊन त्यामधे पूरणा सारखे भरा. व अलगद पीठावर लाटा. बटर/तेल सोडून तव्यावर दोन्ही बाजूनी खरपूस भाजा.

गरमा-गरम पराठा लोणचं/ हिरवी चटणी  कशासोबतही खा. तसाच नुसता खाल्ला तरी छान लागतो. मुलांना डब्यात देण्यास पण सोईचा आहे.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

श्रावण महीना म्हणजे रोजच काही गोड-धोड करावे लागते कधी उपवास सोडताना तर कधी नैवेद्याला ! तर हि सांजाची पोळी खास करून श्रावणसोमवार चा उपवास सोडताना बरेच ठिकाणी केली जाते . कशी केली पहा,

साहित्य :-
सारणासठी
१) रवा १ वाटी
२) चिरलेला गुळ १ १/२ वाटी
३) तूप १/४ वाटी
४) वेलची पुड
५) पाणी १ १/२ वाटी
आवरणासाठी :-
१) गव्हाचे पीठ ४ वाट्या
२) तेल किंवा तूप पोळी भाजण्यासाठी
३) मीठ चिमुटभर
४) पाणी गरजेनूसार

कृती :-

    प्रथम तूपावर रवा चांगला गुलाबी भाजून घ्या.

नंतर पाणी गरम करणेस ठेवा. त्यात चिरलेला गुळ घालावा .गूळ विरघळला  की त्यात रवा  घालून नीट हलवा. झाकून एक वाफ आणावि. गॅस बंद करा . थंड होऊ दे .

तोपर्यंत कणिक मीठ घालून मळून घ्या .फार घट्ट नको व अगदी पुरण पोळी प्रमाणे सैल पण नको. मध्यम असावी . पंधरा मिनीट मुरु द्यावी.

आता वर तयार असलेला सांजा वेलची पुड  घालून चांगला मळून घ्या.

आता तवा तापत ठेवावा  व पुरणपोळी  प्रमाणे कणिकेचा उंडा घेऊन त्यामधे तेवढाच सांजा भरावा. व थोडी जाडसरच पोळी लाटावि . तव्यावर तेल /तूप सोडून खरपुस भाजावी .

गरम पोळीवर तूप घालून दुधासोबत खावी .

टिप्स :- सांजा साखर घालून पण केला तरी चालतो . पण गूळ आरोग्याला चांगला व गोड पण व्यवस्थित होते.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या. 

श्रावण महीना म्हणजे सण-वार यांची रेलचेल असते. रोजच नैवेद्यासाठी काही गोड करायचे असते. तसेच बरेच जण श्रावणी धरतात म्हणजे की फक्त संध्याकाळीच जेवतात. तर जेवणात तिखट ,गोड ,खारट आंबट असे सर्वच चवीचे जेवण असेल तर जेवणात मजा येते व पोट पण भरते. तर आज तांदूळाची खीर करुया .काय साहित्य लागते व कशी करायची पहा.

साहित्य :-

१) बासमती तांदूळ अर्धी वाटी
२) साखर अर्धी वाटी
३) दूध अर्धा लिटर
४) लवंगा ४
५) वेलची , सुका मेवा
६) तूप  २ टेस्पुन

कृती :-

    प्रथम तांदूळ तूपामधे लवंगा टाकून त्यावर गुलाबी भाजून घ्या.ते थंड होऊ द्या . तोपर्यंत दूध एका बाजूला आटवत ठेवून द्या .

आता  तांदूळ मिक्सरवर रवाळ वाटून घ्या . नंतर आटवत ठेवलेल्या दूधामधे घाला. थोडे उकळू द्या . तांदूळ बारीक केले असलेने लगेचच शिजतात .

नंतर साखर, सुका मेवा व वेलची पूड घालून गॅस बंद करावा .

पुरी सोबत किंवा पोळी सोबत खाण्यास द्या.

टिप : खीरीसाठी तांदुळ शक्यतो आम्बेमोहोर किंवा बासमतीच वापरा .

आधी भात शिजवुन घेऊन नंतर दूध घालून पण ही खीर केली जाते.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या. 

या पदार्थाचे नांव वाचून तुम्हाला हा काही गुजरात, मध्यप्रदेश तिकडचा पदार्थ असण्याची शक्यता वाटली असणार. पण खरं सांगू हा आपला पारंपारिक असा, जूनाच मराठी पदार्थ आहे ,' वाटली डाळ' ! यालाच कांहीजण 'खमंग डाळ' तर कोणी, ' डाळीचे तिखट' तर कुठे 'मोकळे बेसन' म्हणतात. परवा सहज टीव्ही लावला तर खाद्यपदार्थाचा कार्यक्रम चालू होता. साहीत्य जरा सुटसूटीत वाटले ...नाव पण जरा वेगळे वाटले. हा गुजराती पदार्थ आहे असे सांगितले.. म्हणून पाहीला तर आपली वाटली डाळच की हो। फक्त सर्वात शेवटी देतेवेळी वरून खोबरे-कोथंबिरीच्या जोडीला वरून बारिक नारलाॅन शेव भुरभूरली, झाली 'शेव अमिरी' ! मग वाटले सगळ्या प्रांतात पदार्थ थोड्याफार फरकाने सारखेच असतात, फक्त नांवे वेगवेगळी असतात. पण ही 'वाटली डाळ' तरी कशी करायची पहा !

साहीत्य :-

1) दोन-तीन तास भिजलेली चणा डाळ 2 वाट्या
2) लसूण, हिरवी मिरची आवडीप्रमाणे( लसूण ऐच्छीक)
3) मीठ चवीनुसार
4) साखर अर्धा टीस्पून ( अवश्य घ्यावी कारण ही डाळ थोडी उग्रट असती )
5) वरून घालण्यासाठी ओलं खोबरं , कोथिंबीर व बारिक शेव
6) लिंबू आवडत असल्यास
7) तेल मोठे दोन टेस्पून
8) फोडणीसाठी हिंग, जीरे,मोहरी, कडीपत्ता, हळद

कृती :-

सर्वात आधी भिजलेली चणा डाळ चाळणीवर ओतून पाणी काढून , डाळ निथळून घ्यावी.

आता निथळलेली डाळ , मिरची-लसूण सह भरड वाटून घ्यावी.

नंतर वाटलेली डाळ सरळ कुकरमधे ठेवून एक शिट्टी काढून वाफवावी.

थोड्या वेळाने थंड झाल्यावर ताटात काढून हाताने डाळ मोकळी करावी. कारण शिजल्यावर घट्ट ढिकळा तयार होतो.

आता कढईत तेल गरम करून सर्व फोडणीचे साहीत्य व कडीपत्ता घालून ,चांगली दमदमीत फोडणी करावी. नंतर त्यात मोकळी केलेली डाळ घालून मीठ व साखर घालून परतावे. एक वाफ येऊ द्यावी. पाच मिनीटानी गॅस बंद करा

आता डिशमधे काढून खायला द्या. देताना वरून लिंबू, खोबरे, कोथंबीर व बारीक शेव घाला.

टिप :- कुकरमधे न वाफवता डायरेक्ट फोडणीत डाळ टाकून पण वाफवली तरी चालते पण खाली लागण्याची शक्यता असते. व तेल थोडे अजून जास्त लागते.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

दुधी भोपळा ही एक सर्वत्र मिळणारी वेलवर्गीय भाजी आहे. पण सहसा कोणाला आवडत नाही.पथ्यकर भाजी म्हणून संबोधतात. परंतू आजारपणातून उठलेल्या व्यक्तीला रोज द्यावी. अशक्तपणा लवकर भरून येतो. तसेच ह्रदय रोग्याना सुध्दा खूपच उपयुक्त आहे. याचा रस रक्त पातळ ठेवते. दुधीमधे 96 टक्के पाणी असते. वजन घटवण्यासाठी पण उपयुक्त आहे. कमी तेलात होते. याचे विविध प्रकार करून आहारात वापरू शकतो. जसे की, भाजी, पराठे, कोफ्ते, हलवा, सालीची चटणी, नुसते फोडी वाफवून सलाड इत्यादी. काहीही करून जास्तीत-जास्त आहारात वापरावा. तर अशा या गुणी दुधीचे मी सूप केले. पौष्टीक व चवदार असे सूप कसे केले पहा !

साहीत्य :-
1) दुधीच्या फोडी 2 वाट्या
2) लसूण चार पाकळ्या
3) आले अर्धा इंच
4) लवंगा दोन
5) काळे मिरे चार
6) मीठ चवीला
7) फ्रेश क्रीम ऐच्छिक

कृती :-

       प्रथम  दुधीच्या फोडी व मीठ,क्रिम सोडून बाकीचे सर्व साहीत्य कुकरमधे वाफवून घ्यावे.

थंड झाल्यावर त्यातील लवंग मिरे काढून व ब्लेंडरने वाटावे. गाळून घ्यावे. चवीला मीठ व दोन वाट्या पाणी घालावे. एक उकळी आणावी.

गरम असतानाच बाऊलमधे घेऊन , वरून क्रीम घालावे व सर्व्ह करावे.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

एखादा मोठा उपवास म्हणजे आषाढी-कार्तिकी एकादशी, महाशिवरात्र असेल तर घरात लहान-थोर सर्वचजण करतात. आपणही मग त्यानिमित्ताने चार उपवासाचे वेगवेगळे पदार्थ बनवतो. पण होते काय शाबू वडा, थालीपिठ, वेफर्स असे चटपटीत पदार्थ लगेच संपतात व एखाद वेळी वरीचा भात (भगर) शिल्लक रहातो. परंतू दुसर्या दिवशी आधिच शिळे व त्यात परत उपवासाचे असे काही खायला नकोसे होते. व या महागाईच्या दिवसात वाया घालवणे पटत नाही. कालच एकादशी झाली. थोडा वरीचा भात उरला , विचार केला व द्वादशीच्या इतर साग्रसंगीत जेवणासोबत त्याची भजी करून टाकली ! मी-तू करून सर्वानी फस्त केली...कशी केली बघा.

साहीत्य :-

1) शिजलेला वरीचा भात(भगर) 2 वाट्या
2) मिरची, आल-लसूण पेस्ट
3) कोथंबिर बारीक चिरून
4) चना डाळ पिठ 2 टेस्पून
5) तांदूळ 1 टेस्पून
6) मीठ चवीला
7) धना-जिरा पावडर 1टीस्पून
8) हिंग चिमूटभर
9) तेल तळणीसाठी

कृती :-

    प्रथम वरीचा भात हातानेच चूरून घ्यावा. पण जर भात कोरडा व फडफडीत असेल तर पाण्याचा हबका मारून कुकरला एक वाफ आणून घ्या किवा मिक्सरला एकदा थोडे फिरवून घ्या.

नंतर मऊ केलेल्या भातात वर दिलेल्या साहीत्यातील सर्व मसाला व पीठं घालावित व हातानेच नीट एकजीव करावे. हाताने तेलात भजी सोडता येतील इतपत सैलसर पीठ ठेवावे. गरज वाटली तर डाळ किवा तांदुळचे पीठ कमी-जास्त करा किवा पाणी घाला.

आता तयार मिश्रणाची लहान-लहान भजी गरम तेलात सोडून मंद आचेवर तळा. तळून टिश्यू पेपरवर काढा.

मस्त कुरकरीत भजी तयार. कशीही खा ! जेवणात खा किंवा चटणी- साॅस काही घेऊन नुसतीच खा. मस्तच लागतात.

टिप :- या भजीला सोडा किवा गरम तेल पोटात घालण्याची अजिबात गरज नाही. तांदुळच असल्याने अतिशय हलकी व कुरकूरीत होतात.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

पोळी-भाजी खायचे म्हणले की, मुलांच्या अगदी जीवावर येते. कशी बशी थोडीशी भाजी खाल्ली जाते. त्यातून आवडीची भाजी म्हणजे बटाटा, फ्लाॅवर किंवा मटकीची उसळ असेल तर जरा ठिक. पण शेंगवर्गीय भाज्या किवा भोपळा वगेरा तर अजिबातच नको. परंतू याच भाज्या वापरून पावभाजी केली तर खाल्ली जाते. म्हणून तोच विचार करून व सर्वच भाज्या थोड्या-थोड्या होत्या तर, मी थोडे पौष्टीक पण चटपटीत व्हेज ओट्स कटलेट केले. कसे पहा.

साहीत्य

1) कोबी किसून 1 वाटी
2) सिमला मिरची मध्यम 2-3
3) बिन्स बारीक चिरून 1 वाटी
4) दुधी फोडी चिरून 1 वाटी
5) गाजर किसून 2नग
6) मध्यम आकाराचे बटाटे उकडून दोन
7) हिरवी मिरचो, आले-लसूण पेस्ट
8) कांदा बारीक चिरून
9) तेल एक टेस्पून
10) मीठ चवीला
11) पावभाजी मसाला 2 टीस्पून
12) चाट मसाला अर्धा टीस्पून
13) हळदपूड अर्धा टीस्पून
14) प्लेन ओट्स एक वाटी
15) शॅलो फ्राय करण्यासाठी बटर किवा तेल आवडीनुसार

कृती :-

      प्रथम सर्व भाज्या व बटाटे वाफवून घ्यावे.
वाफवलेल्या भाज्या एका चाळणीवर ओतून त्यातील जादाचे पाणी काढून टाकावे.

आता एक टेस्पून तेल गरम करा व आलं-लसूण पेस्ट हळद घाला मग त्यात कांदा टाकून मऊ होईपरेंत परतावा.

नंतर उकडून घेतलेल्या सर्व भाज्या व बटाटा हातानेच किवा मॅशरने मॅश करून त्यावर घाला. नंतर त्यामधे मीठ, चाट मसाला, पावभाजी मसाला सर्व घालून एक-दोन परतण्या देऊन गॅस बंद करा.

थंड झाले की त्यात ओट्स घालून हाताने चांगले एकजीव करावे.ओट्समुळे पौष्टीक तसेच चिकटपणा येतो व सर्व भाज्या नीट एकत्र गोळा होण्यासपण मदत होते. ओट्स नसतील तर पातळ पोहे वापरले तरी चालतात. मळून दहा मिनीट झाकून ठेवा. मिश्रण आळून घट्टसर होते.

आता वरील मिश्रणाचे लिंबाएवढे लहान गोळे करून कटलेटचे साचे मिळतात. हव्या त्या आकारात थापून घ्या. किवा हातानेच लहान साधारण चपटे गोळे केले तरी चालते.

नंतर तयार गोळे पॅनमधे थोडे-थोडे बटर सोडून उलटे-पालटे तांबूस रंगावर शॅलोफ्राय करा.

असे गरमा-गरम तयार कटलेट हिरवी-लाल चटणी किवा साॅस सोबत सर्व्ह करा

टीप :- भाज्या आपल्या आवडीने व उपलब्द असतील त्या घ्याव्यात.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या. 

माझी आई मोठी सुगरण होती. वारसाहक्काने काहीशा प्रमाणात तो गुण आम्हा मुलींकडे आला. माझी आई जशी सुगरण तसे वडील खवैय्ये! त्यामुळे आईला नवनवे पदार्थ करण्याला प्रोत्साहन मिळत गेले. कुठेही बाहेर किवा कोणाकडे नविन एखादा पदार्थ खाल्ला आणि आवडला तर आई शक्य असेल तर लगेच रेसिपि जाणून घेत असे. नसेल शक्य म्हणजे हाॅटेल वगेरे असेल तर चवि वरून त्यात काय-काय पदार्थ वापरेत ओळखून हुबेहूब चव साधत असे.लगेच घरी दुसरे दिवशी प्रयोग होत असे. तसेच हा 'सुशिला' नावाचा साधारण आपल्या कांदापोह्या सारख्या चविचा पण चिरमुर्याचा पदार्थ आहे. जास्त करून कर्नाटकमधे केला जाणारा पदार्थ आहे. आम्ही लहानपणी कर्नाटक, रायचूर येथे  वडीलांच्या नोकरी निमित्त होतो. तेव्हा आईला शेजारणी कडून माहीत झाला. तेव्हापासून चिरमुरे उरून मऊ पडले की वाया जाऊ नयेत म्हणून नेहमीच आमच्याकडे केला जातो. कसा केला जातो कृती पहा.

साहीत्य :-

1) चिरमुरे
2) कांदा, मिरची, कडीपत्ता,
3) ओलं खोबरे खवून, लिंबू
4) कोथंबिर
5) मिठ चविला व साखर ऐच्छिक
6) शेंगदाणे आवडत असल्यास
7) तेल
8) फोडणी साहीत्य

कृती :-

      चिरमूरे चाळून स्वच्छ करून चाळणीत घ्यावेत. त्यावर अगदी थोडे पाणी शिंपडून म्हणजे चिरमुरे शोषून घेतिल इतकेच पाणी शिपडून मऊ करावेत.

आता कढईत तेल गरम करून फोडणी करा. नंतर त्यात शेंगदाणे तळा व आता चिरलेला कांदा , मिरची व कडीपत्ता घालून परतावे.

परतून कांदा साधारण मऊ झाला की , आता त्यात भिजलेले चिरमुरे घाला व चविला मीठ, साखर घालून नीट हलवा.झाकण ठेवून एक वाफ आणा.

आता गॅस बंद करून वरून सजावटी साठी लिंबू, खोबरे व कोथंबिर घालून गरमा-गरम खायला द्या .

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.