कचोरी ही सामान्यपणे उत्तर भारतीयांची खासियत. वरून मैद्याचे आवरण (पुरी) व आत बटाटा, वाटाण्याचे सारण असते. पण मी थोडा बदल केलाय. मैदा टाळण्यासाठी हा प्रयोग केला व छान जमले. टिपिकल कचोरी पेक्षाही वरचे आवरण खुसखूषीत होते.व भाज्याही पोटात जातात. कसे केले साहीत्य व कृती :-

साहीत्य :-
सारणासाठी --
* कोबी किसान/बारीक चिरून 2 वाट्या
* मटार 1वाटी
* शिमला मिर्च बारीक चिरून 1
* आलं-लसूण हिरवी मिरची पेस्ट 2टीस्पून
* कोथंबिर चिरून
* धना-जिरा पावडर 2 टीस्पून
* चाट मसाला पाव टीस्पून
* साखर चिमूटभर
* मीठ चविनूसार
* हळद.,हींग मोहरी
* तेल 1टेस्पून
वरच्या पारीसाठी
* उकडलेले बटाटे मध्यम आकाराचे 2-3
* जाड पोहे भाजून 2वाट्या
* मीठ चविला

कृती :-

    प्रथम बटाटे सोलून जाड खिसणाीने किसून घ्या. त्यामधे पोहे भाजून घाला. चविला मीठ घाला व एकत्र मळून घ्या. बाजूला ठेवून द्या.

आता सारणासाठी पँन मधे तेल गरम करा. हळद, हींग, मोहरी घालून फोडणी करा.  त्यामधे आलं-लसूण, हिरवी मिरची पेस्ट घाला. नंतर कोबी, शिमला, मटार घाला. थोडे परतून घ्या. नंतर मीठ,गरम मसाला, धना-जीरा पावडर, साखर, चाट मसाला घालून एक वाफ आणून घ्या. फार मऊ शिजवू नका. क्रंची पणा राहू दे. शेवटी वरून कोथंबिर घालून हलवा.

आता आधि करून ठेवलेल्या कणिकेचा मोठ्या लिंबाइतका गोळा घ्या व वाटीचा आकार करून तयार सारण भरा.  अलगद हाताने तोंड बंद करून एकसारखा गोळा करा. अशा सर्व कचेार्या  करून घ्या.

गरम तेलात मध्यम आचेवर खरपूस तांबूस रंगावर तळा.

गरमा-गरमच खायला द्या. आवडत असेल तर हिरवी चटणी, साँस द्या. पण नुसत्याही छान लागतात. पोह्यामुळे खूप खुसखूषीत होतात. तूम्हीही करून बंघा. नक्की आवडतील.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

सुंदल हा एक कर्नाटकी पदार्थ आहे.ही पाककृती माझे आवडते शेफ श्री विष्णू मनोहर यानी Colors t v वरील "मेजवानी" या खाद्य  कार्यक्रमामधे दाखविलेली आहे. मी पाहीली तर एकदम सोपी व सहज करता येण्यासारखी वाटली. मुख्य म्हणजे घरातल्या घरात जे उपलब्ध साहीत्य असते त्यात तयार होणारी असल्याने मी पट्कन करून पाहीली. आवडली!  खूप झटपट व चवदार बनली. तसेच पोटभरीची पण आहे. मुलांना शाळेतून घरी आल्यावर संध्याकाळच्या नाष्टाला घ्यायला छान आहे. कसे करायचे कृती व साहित्य -

साहित्य :-

* तांदुळाचे पीठ 1 वाटी
* पाणी 1 वाटी
* मीठ, साखर चविनुसार
* खोवलेलेे ओलं खोबर अर्धी वाटी
* तेल 2 टेस्पून
* फोडणी साहित्य
* उडीद डाळ 1 टीस्पून
* कढीपत्ता
* कोथंबिर
* लिंबू ऐच्छिक

कृती :-

प्रथम पाणी गरम करण्यास ठेवा. त्यामधे चिमूटभर मीठ व थोड़े तेल टाका. उकळी आली की, पीठ घाला. झार्याच्या टोकाने हलवा. गुठळी न होउ देता, उकडीच्या मोदक सारखी उक्कड शिजवा. पंधरा मिनिट झाकून ठेवा.

आता तेल पाण्याच्या हाताने उक्कड नीट मळून घ्या व सुपारी सारख्या लहान गोळ्या करा.

आता चाळंणीवर गोळ्या ठेउन मोदका सारखे 10 मी. वाफवा.

नंतर कढईत तेल घाला व फोडणी करा. फोडणी मघे उडद डाळ गुलाबी होईपर्यंत तळा. आता कढीपत्ता व ओले खोबर घालून थोडे परता.मीठ व साखर चवीला घाला. थोडे लिंबू पिळा.

शेवटी वाफवलेल्या गोळ्या घालून, सर्व व्यवस्थित हलवा व परत पाच मिनिट वाफवा.

आता तयार सुंदल डिश मधे काढून वर कोथंबिर  घालून गरमा-गरम खायला द्या.

आपल्या प्रतिसादाने नविन गोष्टी करण्यास प्रेरणा मिळते.आपल्या मौल्यवान सूचना व अभिप्राय, आम्हाला ज़रूर द्या.

चाकवत ही पालाभाजी आहे.या भाजीचे भिजवलेली चना डाळ व शेंगदाणे घालून गरगटे(पातळ भाजी) छान होते.पण आज मनात आले की भाजी खूप जास्त आहे, थोड्या भाजीचे वडे करावेत. तसा हा फार जूना प्रकार आहे. पण ही भाजीच तशी सहसा मिळत नसल्याने सर्रास केले जात नाहीत.असो, साहीत्य व कृती -

साहीत्य :-

* बारीक चिरलेले चाकवत 2 वाट्या
* डाळीच पीठ 1 वाटी
* तांदुळाची पीठी 1 टेस्पून
* हिरवी मिरची+लसूण+आलं पेस्ट 2 टीस्पून
* मीठ चवीनूसार
* हंळद
* तेल

कृती :-

प्रथम कढईत अगदी थोडेसे तेल गरम करून, आल-लसूण,मिरची पेस्ट व हळद घाला. त्यावर भाजी टाका. एक वाफ येउन भाजी खाली बसली की, लगेच डाळीचे पीठ,तादुळ पीठ व मीठ घालून गुठळी न होऊ देता घोटा. फार घट्ट वाटले तर पाण्याचा हबका मारा व एक वाफ आणून गॅस बंद करा. थंड होऊ द्या.

आता ते थंड मिश्रण चांगले मळा व हातावरच थापून साधारण गोल,चपटसर वडे करा. गरम तेलात सोडा व मंद आचेवर तांबूस तळा.

अतिशय खुसखूषीत, हलके असे वडे तयार होतात. चटणी,साॅस सोबत अथवा नुसतेच खा.
छान लागतात. तुम्हीही करून बघा. नक्की आवडतील. प्रतिक्रिया द्यायला विसरू नका.

आपल्या प्रतिसादाने नविन गोष्टी करण्यास प्रेरणा मिळते.आपल्या मौल्यवान सूचना व अभिप्राय, आम्हाला ज़रूर द्या.

पालक एक स्वस्त अशी पालेभाजी आहे. मात्र पालकाची भाजी शक्यतो बर्याचजणाची नावडतीच ! मुलांना तर भाज्या नकोच असतात त्यात पालकाची तर नकोच नको. पालकाला स्वताची अशी खास वेगळी चव नसते.पण रंग मात्र छान असतो. तसेच यात लोह, फाॅलीक अॅसिड, जीवनसत्वे असतात.पालकाचे विविध प्रकार करता येतात.तसेच ते नुसते कच्चेच सलाड रूपात पण खाता येते.आज आपण बटाट्यासोबत करू. कारण बटाटा तसा सर्वानाच व खास मुलांना आवडतो.

साहीत्य :-
* पालक एक जूडी
* बटाटे मध्यम दोन
* कांदा एक
* टोमॅटो मोठा एक
* आल-लसूण,मिरची पेस्ट
* काजू 5-6 (ऐच्छिक)
* फ्रेश क्रिम (ऐच्छिक)
* तेल फोडणी साठी
* हिग ,हळद
* मीठ चवीनुसार
* गरम मसाला एक सपाट टीस्पून
* पाणी

कृती :-

प्रथम पालक निवडून, स्वच्छ धुवून घ्या.तो गरम पाण्यात टाकून नुसता एक मिनिट ब्लांच करावा. चाळणीत काढून वरून गार पाणी घालून थंड करत ठेवा. तोपर्यंत,

बटाटा साल काढून चौकोनी मोठे तूकडे करा. कांदा, टोमॅटो व काजूची पेस्ट करा.

आता पालकाची पण मिक्सरमधून पेस्ट करा

नंतर पातेल्यात तेल गरम करून हळद व हींग घाला, त्यावर आधी आल-लसूण,मिरची पेस्ट, नंतर कांदा,टोमॅटोची पेस्ट घालून तेल सुटेपर्यंत परता.

आता बटाट्याच्या फोडी अगदी थोडे पाणी घालून साधारण मऊ करून घ्या. कारण पालकबरोबर पण थोड्या शिजणार आहेत.

सर्वात शेवटी पालकाची पेस्ट घाला. मीठ,गरम मसाला घाला व एक उकळी येऊ द्या.

गरमा-गरम भाजी सर्व्ह करताना वरून फ्रेश क्रीम घालून पोळी किवा फुलक्या सोबत द्या.

टीप :- फार वेळ भाजी शिजवू नये.पालकाचा रंग जास्त शिजले की पिवळा पडतो.

ब्लांच केल्यावर अगदी फ्रिजमधील गार पाणी घातल्यास , रंग हिरवा रहाण्यास मदत होते.

आपल्या प्रतिसादाने नविन गोष्टी करण्यास प्रेरणा मिळते.आपल्या मौल्यवान सूचना व अभिप्राय, आम्हाला ज़रूर द्या.

बरेच वेळा असे होते की,भुक तर लागलीय पण रोजची तीच ती पोळी-भाजी करायचा व खायचा पण कंटाळा येतो.नविन दुसरे काही करायचे काय ? चविला खमंग पाहीजे, पौष्टीक पाहीजे,जास्त मेहनत व साहीत्य नको  व मुख्य म्हणजे झटपट झाले पाहीजे !! तर अशा सर्व अटी मधे बसणारा असा हा रवा डोसा आहे.आपले दक्षिण भारतीय बांधव करतात असे डोश्याचे वेगवेगळे बरेच प्रकार .मी पण बरेचवेळा करते.संध्याकाळचे वेळी खाण्यास करणेस सोईचा आहे.कसा केला पहा.

साहीत्य:-

1) बारिक रवा 1 वाटी
2) तांदुळाचे पीठ 1/2 वाटी
3) मैदा 1/4 वाटी
4) पाच-सहा मिर्यांची भरड
5) जीरे अर्धा टीस्पून
6) हिरवी मिरची,कढीपत्ता,कोथंबिर,आले आवडीप्रमाणे बारीक चिरून
7) हींग,मीठ चवीनुसार
8) आंबट दही अर्धी वाटी (ऐच्छिक)
9) तेल भाजण्यासाठी
10)पाणी भिजवण्यासाठी

कृती :-

     सर्वात आधी कच्चाच रवा एका बाऊल मध्ये घ्यावा. त्यामध्ये मैदा व तांदुळ पीठ घालावे.नंतर एक एक करत तेल व पाणी सोडून वरील सर्व साहीत्य त्यात मिसळावे.

आता हलवत हलवत अजिबात गुठळ्या न होऊ देता थोडे-थोडे पाणी घालावे.नेहमीच्या डोसा पीठा पेक्षा एकदम पातळ ठेवावे.मी इतक्या साहीत्याला अंदाजे तीन-साडेतीन वाट्या पाणी घातले. त्यातूनही पहीला डोसा काढल्यावर अंदाज घेऊन पाणी कमी-जास्त होऊ शकते.भिजवून 5-10 मिनिटे रहातेच. इतर काही तयारी करेपर्यंत. तेवढेच भिजणे पुरे.

आता तवा तापत ठेवा . फार एकदम कडक गरम तापवू नये. तापल्यावर त्यावर थोडे तेल सोडा कापडाने पुसा व हाताने शिंपडून किवा डावाने थोडे वरून पीठ तव्यावर घाला. मंद आचेवर खरपूस भाजा.थोडे - थोडे तेल कडेने सोडावे. भाजला की आपोआपच कडेने सुटू लागतो. याला एकाच बाजूने भाजावे.दुसर्या बाजूने भाजण्याची अजिबात गरज नसते . एकदम पातळ व जाळीदार असल्याने छान कुरकूरीत खमंग असा झटपट डोसा तयार !

कोंथिबिर ,पुदीन्याच्या हिरव्या चटणी सोबत खायला द्या .

टीप्स :-  पिठ एकदम पातळ ठेवावे . दाट ठेवले तर डोसा मऊ  होतो.जितके पातळ तितका अधिक जाळीदार व कुरकूरीत होतो.

तसेच यात आपण आवडीप्रमणे कांदा बारीक चिरून घालू शकतो किंवा मुलांना जास्त पौष्टीक करून द्यायचा असेल तर काजू पावडर घालू शकतो.

आपल्या प्रतिसादाने नवीन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

एकूणच कोणत्याही भाजीचे पराठे करायला व खायला ही एकदम सुटसूटीत असतात. भाजी ही खाल्ली जाते व पोळीचेही काम होते. डब्यात न्यायला व घरात, कशासोबत ही  खाता येतात. लोणचे,दही, लोणी,चटणी अथवा गरमा-गरम नुसतैच. तर चला आज फ्लाॅवर चे पराठे करू. साहित्य व कृती :-

साहीत्य :-

* फ्लाॅवर एक मध्यम आकाराचा गड्ढा
* हिरवी मिरची, आलं-लसूण पेस्ट
* मीठ चविनूसार
* गरम मसाला 1टीस्पून
* हळद, हींग
* चिरून कोथंबिर
* कणिक 4 वाट्या
* तेल
* पाणी

कृती :-

प्रथम कणिक तेल,मीठ घालून नेहमी प्रमाणैच मळून ठेवा.

आता फ्लाँवरची मोठी-मोठी फुले तोडून मीठाच्या पणाने धुवून घ्या.नंतर किसणीवर खिसून घ्या.

नंतर  कढईत तेल गरम करा. हळद, हींग घाला. हिरवी मिरची, आलं-लसूण पेस्ट घाला. आता खिसलेला फ्लाॅवर घाला..एक वाफ आणा. नंतर मीठ, गरम मसाला,कोथंबिर घालून थोडे परता. गँस बंद करा. सारण थंड होऊ दे.

आता कणिकेचा उंडा करून त्यामधे तयार सारण भरा व पुरणपोळी प्रमाणे लाटा. तेल सोडून खरपूस भाजा.

गरमा-गरम खायला द्या.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

बीट हे एक रसाळ कंद आहे. गडद लाल-किरमिजी रंग असतो व आतून एकदम लालभडक असते. बीटापासून खाद्यरंग तयार केला जातो. साॅस, सरबते, जेलि, आईस्क्रीम इत्यादी मधे वापरतात. तसेच बीटामधे आयर्न भरपूर प्रमाणात असते.बीट रोजच्या आहारात वापरल्यास शरीरातील लाल पेशी वाढण्यास मदत होते. शक्तिवर्धक व रक्तवर्धक आहे. बीटमधे नैसर्गिक साखरेचे प्रमाण भरपूर असते.तरीसूध्दा कॅलरीज कमी असतात. पाश्चिमात्य देशात बीटापासून साखर तयार केली जाते.बीटाला तशी काही स्वताची अशी खास चव नसते.काहीसे गोडसर लागते. मात्र याचा रंगच अधिक मोहक असतो. बीट सॅलडमधे कच्चे, उकडून भरीत तसेच किसून कोशिंबीर, सूप , पराठे, पूर्या, हलवा इ. अशा अनेक प्रकारे वापरता येते. बीट जास्तीत- जास्त कसे पोटात जाईल ? हा विचार करून ही बीटरूट बर्फी केली. कशी केली ती कृती व साहीत्य,

साहीत्य :-
* उकडून साल काढून बीटाचा किस 1 वाटी
* साखर 1 वाटी
* ओल्या नारळाचा चव 1 वाटी
* मिल्क पावडर 2 टेस्पून
* अर्धा कप दूधावरची जाड साय/ खवा पाव  
   वाटी
* पाव कप दूध
* वेलचि पाडर अर्धी टीस्पून
* सजावटीसाठी काजू-बदामाचे काप ऐच्छिक

कृती :-

प्रथम खोबरे व साखर एका जाड बुडाच्या कढईत एकत्र करून शिजत ठेवा.

नंतर साखर विरघळून खोबर शिजत आले की, त्यातच किसलेला बीट घाला.सतत हलवत रहा. हलवत-हलवतच आधी साय व दूध घाला. नंतर मिल्क पावडर घाला. एकसारखे हलवत रहा.

आता  काही वेळाने मिश्रण आटत येते व एकत्र गोळा होऊन कढई पासून सुटत येते.वेलची पूड घालून परत एकदा हलवा. गॅस बंद करा व मिश्रण एका ट्रेमधे किंवा थाळीमधे ओता. वरून काजू/बदामाचे पातळ काप पसरवा व हाताने किवा प्लास्टीक शीट ठेवून वाटीने वरून अलगद थापा. गरम असतानाच सूरीने वड्या कापून म्हणजे रेषा मारून ठेवा.

साधारण दीड-दोन तासानी वड्या सुकतात. आता त्या वड्या ट्रे मधून सुट्टया करून काढा व डब्यात भरून ठेवा. कोरडी थंड हवा असेल तर साधारण हवामानात चार दिवस सहज टिकतात. किवा मग फ्रीजमधे ठेवा. सिझन नूसार ठेवा.

आपल्या घरी कोणी येणार असेल किवा लहान मुलांचा वाढदिवस असेल तर अथवा दिवाळीत फराळाच्या ताटात रंगीत वड्या छान दिसतात. यांचा रंगच खूप सुंदर दिसतो.अतिशय रूचकर, पौष्टीक व सोप्या आहेत. तूम्हीही करून बघा  व प्रतिक्रीया द्यायला विसरू नका.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

शिंगाडा ही एक पाणथळजागी येणारी तृणवर्गीय  वनस्पती आहे. याचे कंद खाद्य म्हणून वापरतात.काहीशी गोडसर चव असते. या फळाची वरून साल काळपट रंगाची असते व आत पांढरा भाग ,गाभा जो असतो तो खाण्यासाठी वापरतात. पीठ तांबूस, गुलाबी रंगाचे असते. हे पीठ उपवासाला चालते. उपवासाचे काही पदार्थ करायचे असतील म्हणजे कटलेट, कचोरी इ.तर बाईंडींग साठी काॅर्नफ्लोअर सारखे वापरतात. काहीसा चिकटपणा असतो. तसेच शिंगाडा पीठाचे थालीपीठ, पुर्याही,  केल्या जातात. कंद बारीक चिरून शाबूदाण्या सारखी खिचडीही केली जाते.शिंगाडा अतिशय पौष्टीक असतो.चला तर आज 'शिंगाडा पिठाचा पौष्टीक हलवा' करूया. साहीत्य व कृती,

साहीत्य :-
* शिंगाडा पीठ 1 वाटी
* साखर 1 वाटी
* तूप मोठे 4 चमचे ( टेस्पून)
* वेलचीपूड अर्धा टीस्पून
* ड्रायफ्रूट्स
* पाणी

कती :-

प्रथम पॅन/कढई मधे तूप घाला. गरम झाले की, त्यामधे शिंगाडा पीठ घाला.बेसन लाडूचे बेसन जसे भाजतो तसे पीठ सतत हलवत राहून खमंग भाजून घ्या.

आता साखरेत अर्धा ते पाऊण वाटी कोमट पाणी घालून साखर पाण्यात विरघळवून घ्या व हे पाणी भाजलेल्या पीठात, गुठळी होणार नाही याची खबरदारी घेऊन कलथ्याने पीठ हलवत त्यात घाला. हलवत रहा.

पांच मिनिटात हे मिश्रण घट्ट होत येईल व कडेने तूप सुटू लागेल. गॅस बंद करा व वेलचीपूड , ड्रायफ्रूट्स घालून खाली उतरवा. हा हलवा साधारण सैलच असतो.

गरम लुसलूशित असा हलवा खाण्यास अतिशय उत्कृष्ठ लागतो. मुख्य म्हणजे उपवासालाही चालतो. तूम्हालाही आवडेल जरूर करून बघा व प्रतिक्रिया कळवायला विसरू नका .

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

आलू-पालक भाजी जशी ग्रेव्ही स्वरूपात करता येते तशीच सुकीसुध्दा करता येते. डब्यात न्यायची असेल तर सुकी भाजी जास्त सोईची होते.कशी करायची कृती व साहीत्य -

साहीत्य :-

* बारीक चिरलेला पालक एक जूडी
* बारीक चिरलेला कांदा एक मोठा
* एक बटाटा साल काढून चिरून चौक फोडी
* गरम मसाला 1 टीस्पून
* मीठ चवीनूसार
* लाल मिरचीपूड 1 टीस्पून
* आल-लसूण, मिरची पेस्ट 1 टीस्पून
* हळद 1/4 टीसूपून
* तेल 2 टेस्पून
* फोडणी साहीत्य ,मोहरी,हींग

कृती :-

प्रथम कढईत तेल घालून गरम करा. हींग,मोहरी व हळद घालून फोडणी करा.

आता कांदा व आलं-लसूण मिरची पेस्ट घाला. कांदा मऊ होईपर्यंत परता.

नंतर चिरलेला बटाटा घाला घाला  व मऊ होईपर्यत परता.

शेवटी पालक घाला. याला जास्त परतावे लागत नाही. फोडणीत टाकल्यावर नुसता खाली बसला की बस्स.

आता चवीला मीठ , गरम मसाला व मिरचीपूड घाला. एक-दोन परतण्या द्या व गॅस बंद करा.

तयार भाजी बाऊलमधे काढा .फुलके/ पोळी सोबत छान लागते.

आपल्या प्रतिसादाने नविन गोष्टी करण्यास प्रेरणा मिळते.आपल्या मौल्यवान सूचना व अभिप्राय, आम्हाला ज़रूर द्या.

वांग्याचे भरीत हा पदार्थ फार पुर्वीपासून केला जाणारा जुनाच व सर्वाना माहीत असणारा पदार्थ आहे. फक्त प्रत्येक प्रांतानुसार किंवा आवडीनुसार करण्याची पध्दत निरनिराळी आहे.
कुठे भरीतात दही घातले जाते तर कुठे दाण्याचे कुट किंवा काही घरात नुसते भाजलेल्या वांग्याचा गर,मीठ,मिरची फोडणी घालून केले जाते . आज मी माझ्या घरात ज्या पध्दतिचे आवडते व केले जाते, त्याची साहित्य व कृती सांगते,

साहित्य :-
* मोठ भरताचे वांग १ नग
* लाल टोमँटो मध्यम २
* मोठा कांदा १
* लसूण पाकळ्या ६-७
* हिरवी मिरची २-४ किंवा आवडीनुसार
* कोथंबिर
* लाल मिरचीपूड २ टीस्पून
* मीठ चविनूसार
* साखर चिमूटभर (ऐच्छीक)
* हळद, हिंग, मोहरी फोडणीसाठी
* तेल २ टेस्पून

कृती :-

प्रथम वांगे स्वच्छ धुवून, पुसून कोरडे करावे व थोडे तेल चोळावे. मंद गँसवर जाळी ठेउन सर्व बाजूनी व्यवस्थित भाजावे.

वांगे भाजेपर्यंत कांदा, टोमँटो, लसूण, मिरची व कोथंबिर बारीक चिरून घ्यावे.

आता भाजलेले वांगे गार झालेले असेल तर अलगद हाताने सर्व साल सोलून काढावे व गार पाण्याने स्वच्छ धुवावे. म्हणजे भाजलेली काळी साल पुर्णपणे निघून जाईल.

आता धुतलेले वांगे चाँपिंग बोर्डवर ठेवून सुरीने कापावे व नंतर बाउलमधे ठेउन मँशरने अथवा हाताने मँश करावे.

नंतर तेल गरम करून हिंग, मोहरी व हळद घालून फोडणी करावी. फोडणीमधे कांदा (थोडा कच्चा गरात मिसळा),लसूण मिरची घालून परतावे. कांदा मऊ झाला की, चिरलेला टोमँटो घालावा व परतून मऊ झाला की लाल मिरचीपूड, मीठ व चिमूटभर साखर घालावी. शेवटी वांग्याचा गर व थोडी कोथंबिर घालावी व  सर्व नीट एकजीव करावे, पाण्याचा हबका मारावा व झाकून एक वाफ आणावी.

तयार भरीत बाऊलमधे काढून वरून कोथिंबिर घालावी. गरमा-गरम ज्वारीच्या किंवा बाजरीच्या भाकरीसोबत खावे. अतिशय रूचकर लागते. आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.

चटपटीत खायला कोणाला आवडत नाही ? सर्वानाच आवडते. पण रोज नविन करायचे तरी काय ?  दिवाळीतल्या चकलची भाजणी थोडी शिल्लक होती.पण चकली करायची नव्हती.मग काय, घरात उपलब्ध  होती ती पीठं व भाजणी घेऊन केला प्रयोग ! छान जमला. कसे केले वडे साहीत्य व कृती बघा,

साहीत्य :-
* भाजणी पीठ 2 वाट्या
* ज्वारीचे पीठ 1/2 वाटी
* नाचणी पीठ 1/4 वाटी
* गहू पीठ 1 टेस्पून
* तिखट, मीठ चवीनूसार
* धना-जीरा पावडर 1 टीस्पून
* हींग 1/4 टीस्पून
* हळद 1/4 टीस्पून
* तिळ 1टीस्पून
* पाणी
* तळण्यासाठी तेल

कृती :-

प्रथम एका बाउलमधे सर्व पीठे एकत्र करा.

नंतर त्यामधे हळद,तिखट,मीठ, धना-जिरा पावडर,तिळ मिसळा.

आता यामधे दोन लहान चमचे गरम तेल घाला. वडे थापता येतील इतपत घट्ट पीठ पाणी घालून मळा. दहा मिनीट झाकून ठेवा.

नंतर तेल गरम करायला ठेवा व मोठ्या लिंबाइतकी गोळी घेऊन हाताने साधारण चपटा आकार द्या व मधे भोक पाडा. तयार वडे गरम तेलात सोनेरी तळा.

खुसखूषीत तयार वडे नुसतेच किवा घट्ट दह्यासोबत खा.

टीप :- आपल्या आवडीनूसार बारीक चिरून कांदा किंवा लसूण-मिरची पेस्ट घातली तरी चालेल

आपल्या प्रतिसादाने नविन पदार्थ करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.