सुट्टी लागली म्हणले की मुले दिवसभर घरात असतात. त्यामुळे त्यांना ठराविक वेळी नुसते जेवण देऊन भागत नाही व ती नीटसे जेवत पण नाहीत.कारण सारे लक्ष खेळणे व मस्ती यातच असते. त्यामुळे सतत काही ना काही वरचे खायला लागते.मग सारखे वेगवेगळे काय द्यावे ?हा प्रश्नच असतो. मग अशावेळी झटपट होणारे व पौष्टीक असे 'चाॅकलेट बाॅल' ट्राय करा.
ही रेसिपी करण्यासाठी गॅस ची अजिबात गरज पडत नाही. कसे करायचे पहा-

साहीत्य :-

1) कोको पावडर 1/2 वाटी
2) मिल्क पावडर 1वाटी
3) पाच-सहा मारी बिस्कीट्स चा चूरा 4 टेस्पून
4) काजू,बदाम,अक्रोड ची भरड 2 टेस्पून
5) बटर 1 टीस्पून
6) गरम दूध गरजेनुसार (साधारण पाव कप लागेल)
7) डेसिकेटेड कोकोनट 2 टेस्पून

कृती :-

     प्रथम मारी बिस्कीट्स मिक्सर मधून चुरा करून घ्यावित.

आता एका बाऊल मधे तयार चुरा व कोको पावडर,मिल्क पाडर, ड्रायफ्रूट पावडर आणि बटर सर्व एकत्र करून हातानेच एकसारखे करावे.

नंतर एका वाटीत गरम दूध घेऊन अंदाज घेत घेत वरील मिश्रणात घालावे . कणिकेसारखा गोळा झाला की थांबावे.

तयार मिश्रणाचे टेनिस बाॅल च्या आकाराचे लहान-लहान गोळे करून डेसिकेटेड कोकोनट मध्ये घोळवावेत.

चाॅकलेट बाॅल तयार ! मुलांना पाच वाजताच्या दूधासोबत द्या. किवा नुसतेच द्या तरी चालते दूध ,बिस्कीटे ,ड्रायफ्रूट्स सर्वच पोटात जाते. आणि थोडा वेगळा प्रकार असल्याने व पट्कन हातात घेऊन पळण्यासारखा असल्याने लगेच पसंतीस उतरतो.व आपल्याला करणेसही सोपा !!

उन्हाळ्याची चाहूल लागली की मला थंडगार वाळ्याचं माठातलं पाणी, कैरीचं गारेगार पन्हं, चमचमीत आंबा डाळ, कैरी बारीक चिरून केलेलं तात्पुरतं ताज लोणचं, हे लहाणपणीचे सर्व आठवू लागते.चैत्र लागला की,चैत्रातले हळदी-कुंकू एखाद्या मंगळवारी ,शुक्रवारी केले जाते. तेव्हा खास कैरीचे पन्हे व आंबा डाळ करतात. अतिशय रूचकर लागते.अशी आंबेडाळ किवा डाळीची कोशिंबीर कशी करायची व साहीत्य काय ते पहा.

साहीत्य :-

1) चणाडाळ, 2 वाट्या (2-3 तास भिजवलेली) 2) मध्यम एक कैरी साल काढून किसून,
3) हिरव्या मिरच्या 2-3
4) मीठ साखर चवीनुसार, 
5) बारीक चिरलेली कोथिंबीर,
6) रिफाईंड तेल, मोहरी ,जिरे, हळद, हिंग,मेथीदाणे फोडणीसाठी, दोन लाल सुक्‍या मिरच्या. कडीपत्ता

कृती:-

प्रथम भिजवलेली डाळ जाडसर कुटावी. खलबत्यात कुटली तर जास्त चांगली होते.रद्दा होत नाही.नाहीतर आजकाल मिक्सर मधे करतातच पण अवल-चवल अशी भरड ठेवा.
कुटताना पाव चमचा जिरे,मीठ,मिरची व साखर सर्व घालून कुटावे. म्हणजे नीट मिक्सही होते.

नंतर त्यात किसलेली कैरी व कोथिंबीर घालून नीट कालवून घ्यावी.

आता तेल गरम करून त्यात मोहरी, जिरे,मेथी, हिंग, लाल मिरच्या,कडीपत्ता घालून फोडणी करावी. शेवटी हळद थोडी जास्त घालावी.
ही फोडणी गार करून डाळीत मिसळावी व डाळ नीट कालवून घ्यावी.

सर्व्ह करताना वरून कोथिंबीर पेरावी. ही डाळ जेवणात पण कोशिंबीर म्हणून वाढता येते व नुसतीसुध्दा बशीत घेऊन खातात.परंतू चना डाळ पचायला जड असते व त्यात आंबे डाळ कच्चीच असते.त्यामुळे आपले प्रकृतीमान संभाळून खावी.

टीप:-कैरीचा आंबटपणा पाहून प्रमाण कमी-जास्त करावे.

ही माझी रेसिपी २ मे २०१५ महाराष्ट्र टाइम्स, च्या,"चख दे " या  सदरा खाली प्रसिद्ध झाली होती.

नागली किंवा रागी या नावाने ओळखलं जाणारं हे  धान्य गरिबांचं अन्न म्हणून आजवर माहीत होतं, पण या गुणी नाचणीचं महत्त्व हल्ली खूपच जाणवायला लागलं आहे. लोह आणि कॅल्शियम यांनी युक्त असलेली नाचणी मुलांच्या वाढीसाठी अप्रतिम आहे. म्हणूनच नाचणी सत्त्वाची लापशी मुलांना देतात. तसेच मोड आलेल्या नाचणीच्या सेवनामुळे नाचणीतलं नैसर्गिक लोह शरीराला मिळतं आणि बाळंतिणीला दूध येण्यासाठी मदत होते. वजन घटवायचे असेल तर आहारात नाचणीची भाकरी खातात. गहू व ज्वारी ऐवजी. नाचणी ग्लुटेनफ्री आहे, नाचणीला कीड लागत नाही, हा तिचा आणखी एक गुण.आणि अतिशय थंड आहे .उन्हाळ्यात खास याचे अंबिल केले जाते.याचाच थोडा माॅडर्न प्रकार म्हणजे सूप ! कसे केले पहा.

साहित्य :

1) नाचणीचं पीठ, एक टेस्पून
2) आंबट ताक, एक वाटी
3) जिरेपूड, 1/2 टीस्पून
4) काळी मिरपूड, 1/4 टीस्पून
5) गाजर, भोपळी मिरची इ. भाज्यांचे बारीक तुकडे एक वाटी,
6) अक्रोड किवा बदाम काप ऐच्छीक
7) चवीला मीठ,
8) लसणीच्या दोन पाकळ्या बारीक चिरून,
9) तूप एक टीस्पून
10) पाणी 2 वाट्या
11) कोथिंबीर.

कृती :

तूप गरम करून त्यात लसूण परतावी, भाज्या आणि अक्रोडचे बारीक तुकडे घालून परतावे, पाणी घालून उकळत ठेवावं.

ताक आणि नाचणीचं पीठ एकत्र कालवून उकळत्या पाण्यात घालावं आणि शिजेपर्यंत ढवळत राहावं. आवडीनुसार घट्ट किंवा पातळ ठेवा .

नंतर मीठ, जिरेपूड, मिरपूड घालून खाली उतरावं, कोथिंबीर घालून गरम प्यायला द्यावं.

गाजर एक कंदमुळ वर्गीय भाजी आहे.गाजरात जीवनसत्व 'अ' मोठ्या प्रमाणात असते. डोळ्यासाठी खूप उपयुक्त आहे.गाजर नुसते तर खाता येतेच,शिवाय त्यापासून खूप पदार्थ केले जातात. चटणी,कोशिंबीर,भाजी,खीर,हलवा, गाजर रोल,कटलेट,सूप ! अशा खूप सार्या पदार्थांची नावे घेता येतील. मी आज गाजराची बर्फी करणार आहे.काय साहीत्य व कशी ते पहा .

साहीत्य :-

1) गाजराचा किस 2 वाट्या
2) ओल्या नारळाचा चव 2 वाट्या
3) साखर 3 वाट्या
4) सायीसह दूध 1 वाटी किवा फ्रेश क्रीम (अमूल) 1/2 वाटी
5) मिल्क पाडर 1टेस्पून
6) वेलची पावडर, ड्राय फ्रूट्स आवडीनुसार
7) तूप 1 टेस्पून

कृती :-

प्रथम गाजराचा किस व खोबरे एका पॅनमधे तुपावर थोडे परतावे.

नंतर त्यात दूध / क्रीम घालावे. चांगले शिजू द्यावे.

आता त्यात साखर घाला.सतत हलवत रहा. थोडा गोळा होत आले की मिल्क पावडर घाला. हलवत रहा.गोळा होऊन कडेने सुटत आला की गॅस बंद करा.

नंतर खाली उतरवून वेलची पावडर घाला व तूप लावलेल्या ताटात ओतून थापावे. थापताना आधि वरून ड्राय फ्रूट्स घालावेत. थोडे थंड झाल्यावर चाकूने रेषा मारून ठेवा.व थंड होऊ दे.

आता पूर्ण थंड झाले की वड्या कापून डब्यात भरा.आठ दिवस आरामात फ्रिज शिवाय रहातात.

कैरी,चिंच असे नांव निघाले तरी तोंडाला पाणी सुटते. साधारण फेब्रुवारीच्या अखेर किंवा मार्चच्या सुरूवातीला बाजारात कोवळ्या कैर्या (आत अजून कडक कोय तयार नसते) यायला सुरवात होते.मग घरी आणल्या जातात व अनेक प्रकार केले जातात. किसून सरबत , चिरून कधी भेळेवर,जेवणात मीठ,तिखट घालून फोडी. तर मुलं येता नुसत्याच मीठ लावून खातात.तशा आत्ता या कैर्या आंबट नसतात. बरेचवेळा लाल/हीरवी चटणी,चैत्र पाडव्याला अंबेडाळही केली जाते.मी कैर्या घरी आणल्या की, सर्व पदार्थ आलटून पालटून करत असते. आज ताजे-ताजे लोणचे केले.हे लोणचे टिकाऊ नसते.दोन-चार दिवसात खाऊन संपवायचे असते.तसेही लोणचे म्हणले की संपतेच म्हणा ! हे लोणचे मुरायची गरज नसते.केले की लगेच भाज्यांच्या लोणच्या प्रमाणे खाता येते.चला तर कसे करायचे पाहू.

साहीत्य :-

1) कोवळ्या कैर्या 3 नग
2) मोहरी डाळ पाव वाटी
3) गूळ किंवा साखर पाव वाटी
4) मेथी पाव टीस्पून
5) लाल मिरची पूड 2 टीस्पून
6) हळद 1/2 टीस्पून
7) मीठ 3- 4 टी स्पून
8) हीग मोहरी फोडणीसाठी
9) तेल पाव वाटी फोडणीसाठी
10)  पाणी अर्धी वाटी

कृती :-
            प्रथम कैर्या स्वच्छ धुवून त्याची साल काढून घ्या.थोड्या बारिकच चौकोनी फोडी करून घ्या.

आता या फोडीवर मीठ ,हळद व गूळ चिरून घाला व हलवून थोडावेळ ठेवा.म्हणजे रस सुटतो.

नंतर मोहरीची डाळ कुटून त्यामध्ये पाणी घालून नाकाला झिणझिण्या येईपर्यंत घुसळा (ही क्रिया मिक्सर मधे केली तरी चालते). घुसळलेली डाळ फोडीवर घाला. तसेच मेथी पण पळीमधे तांबूस तळून कुटून फोडींवर घाला. मिरची पूड निम्मी घाला.सर्व नीट हलवा.

नंतर मेथी तळलेल्या पळीतच हींग,मोहरी हळद घालून फोडणी करा.गॅस बंद करा.थोडासा गरमपणा कमी झाला फोडणीचा की शिल्लक मिरची पूड घालावी. आता फोडणी पुर्ण थंड होऊ द्यावी.

आता वरील फोडीवर थंड फोडणी घाला व परत नीट हलवा.मस्त आंबट-गोड चवीचे ताजे झटपट लोणचे तयार ! जेवणाची रंगत तर वाढतेच व पोहे ,उपमा, पराठे,पुर्या कशाही सोबत खाता येते.

सुटले न तोंडाला पाणी ? चला तर बघू आजच्या जेवणात झटपट करून टाका ! आणि हो कसे झाले ते सांगायला विसरू नका.

आपल्या प्रतिसादाने नवीन गोष्टी करण्यास उत्साह मिळतो. आपला अभिप्राय, सुचना आम्हाला ज़रूर कळवा.

कायरस हा पदार्थ तसा पारंपारीक आहे . साधारण फेब्रूवारीच्या अखेरीस कोवळ्या कच्या कैर्या यायला सुरवात होते.तेव्हापासून ते जून परेंत आमच्याकडे हा आंबट-गोड चविचा पदार्थ अधून-मधून चालूच असतो सर्वानाच आवडतो.यालाच पंचामृत असेही म्हणतात.कायरस किंवा पंचामृत कैरी प्रमाणेच कवठ,पेरू,राय आवळे तसेच चिंच यापासून पण करतात.आज मी कैरीचा कायरस कसा केला ते पहा....

साहीत्य :-

1) कच्ची कैरी मध्यम आकाराची एक
2) चिरलेला गूळ पाव वाटी(कैरीच्या आंबटपणा नुसार कमी-जास्त घ्यावा) टीप पहा
3) भाजलेल्या तिळाचे कूट 1 टेस्पून
4) भाजलेल्या दाण्याचे कूट 2 टेस्पून
5) लाल सुकी मिरची तूकडे 7-8
6) कडीपत्ता,कोथंबिर
7) सुके खोबर्याचा किस 1टेस्पून
8) मेथी दाणे 7-8
9) हिंग,जिरे,मोहरी हळद फोडणीसाठी
10) तेल 1 टेस्पून
11) मीठ चवीनुसार
12) धणा-जिरा पावडर किंवा गोडा मसाला      1 टीस्पून
13) पाणी गरजेनुसार

कृती:-
      प्रथम कैरीची साल काढून पातळ चपट्या अशा साधारण एक-दीड इंचाच्या रूंद फोडी करून घ्याव्यात.

नंतर पातेल्यात तेल घालून, मेथी ,हींग ,मोहरी जिर्या ची फोडणी करा . त्यात हळद मिरची व कडीपत्ता टाकून परता व कैरीच्या फोडी त्यावर टाकाव्यात व परतून थोडेच पाणी घाला. झाकणी घालून थोडी वाफ आणावी.
फोडी मऊ होतील इतपत.

आता फोडी मऊ झाल्या असतील तर त्यामध्ये बाकीचे मीठ गूळ,मसाला घालून थोडे पाणी घालावे.उकळी आली की दाण्याचे,तिळाचे कूट खोबरे कूटून घालावे. गरज वाटली तर अजून थोडे पाणी घाला. कायरस रायत्या सारखा घट्टसरच असतो. पण जर का आवडत असेल तर थोडा वरणा सारखा पातळ करावा.म्हणजे भाता सोबत पण खाता येतो.एक उकळी आणा व गॅस बंद करा.वरून कोथंबिर घाला. कायरस तयार!

असा हा आंबट-गोड चवीचा कायरस चपाती किवा भात कशासोबतही छान लागतो.
बर्याच वेळा त्याच त्या भाज्या खावून कंटाळा येतो किंवा सूकी भाजी असते व अजून एखादी ग्रेव्हीसब्जी काय करावी असा प्रश्न असतो तेव्हा करून बघायला हरकत नाही.

टीप :- जर कैरी कोवळी असेल व आंबट नसेल तर गूळ कमी लागतो . कैरीच्या आंबटपणा नुसार घ्यावा.

दाल बाटी हा खाद्यप्रकार राजस्थानी बांधवांचा पारंपारीक खाद्यप्रकार आहे.यालाच इंदौरकडे दाल बाफना पण म्हणतात.वन डीश मिल म्हणून अतिशय उत्तम असा प्रकार आहे.जास्त स्पायसी नसल्याने मलाही आवडला.एक-दोन वेळा खाण्याचा योग आला पण करण्याचा कधीच आला नाही.पण दाल बाटी करणार्या व खाणार्या मित्र/मैत्रीणींच्या सहकार्याने व गुगलच्या मदतीने मी स्वता ही दाल बाटी आज बनविली ,अतिशय उत्तम झाली व मुख्य म्हणजे घरातल्या सर्वाना आवडली.कशी केली पहा.अतिशय सोपी व कमी साहीत्यात आहे.

साहीत्य :-

बाटीसाठी-
1)  मोटसर  दळलेली गव्हाची कणिक 2         मोठ्या वाट्या
2) रवा 1/2 वाटी(जर कणिक नेहमीची मऊ असेल तरच वापरा)
3) तेल /तूप 4 टेस्पून
4) दही 2 टेस्पून
5) ओवा 1 टीस्पून
6) बेकींग पावडर 1/2 टीस्पून किवा चिमूटभर सोडा ऐच्छीक
7) मीठ चवीला
8) तळण्यासाठी तेल

डाळीसाठी-
1) तूर डाळ अथवा आपल्या आवडीच्या मिक्स डाळी 1 वाटी
2) बारीक चिरून टमाटा
3) चिरून आल एक इच लसूण 8-10 पाकळ्या
4) सुकी लाल मिरची 2-3
5) गरम मसाला/काळा मसाला
6) चिंच,गूळ आवडीनुसार
7) कडीपत्ता,कोथंबीर
8) मीठ चवीने
9) फोडणीचे साहीत्य
10) पाणी

कृती:-

     प्रथम एकीकडे डाळ दोन वाट्या पाणी घालून कुकरला शिजत लावा.

डाळ शिजेपर्यंत बाटीसाठी दिलेले सर्व साहीत्य एकत्र करून थोडेच पाणी वापरून नेहमीच्या कणिकेपेक्षा थोडी घट्ट कणिक मळून घ्या. 20-25 मिनिटे झाकून ठेवा.

आता शिजलेली डाळ तेलाची फोडणी करा,त्यामधे मिरची,आल लसूण कडीपत्ता घाला व त्यात घाला .डाळीसाठी दिलेले सर्व साहीत्य घाला आणि आवडीनुसार घट्ट किवा पातळ ठेवा.(थोडी घट्टसरच बरी लागते)एक उकळी आणा.डाल तयार.

आता बाटीची कणिक व्यवस्थित भिजून फुलली असेल.त्या कणिकेचे साधारण लिंबाएवढे गोळे करावे व किचित दाबून खोलगट करा .असे सर्व गोळे करून घ्या.

एका पसरट भांड्यात पाणी उकळत ठेवा व त्या उक्ळत्या पाण्यात सर्व गोळे सोडा वरून एक चमचा तेल घाला व 15-20 मिनीट शिजू द्या.

नंतर एका चाळणीत ओतून पाणी काढून टाकावे.थंड होऊ द्यावेत.

आता एका पॅनमधे तेल घालून गरम तेलात मंद आचेवर बाट्या खरपूस तळा.

सर्व्ह करताना तळलेल्या बाटीचे तूकडे करा व वरून गरमा गरम डाळ व घरचे साजूक तूप सोडून खायला द्या.

मस्त पोट भरते व एक वेळचे जेवणच होऊन जाते.

टीप :-डाएट काॅनशिअस लोकांनी preheat ovenla 180° तापमानाला 30 मिनीट तूपाचे ब्रशिंग करून भाजाव्यात.ओव्हनला भाजायच्या असतील तर आधि शिजवायची गरज नाही.पारंपारिक पध्दतीत चूलीमधे भाजतात. किवा शक्य असेल तर तंदूर भट्टीला भाजावे.मी थोड्या ओव्हनला भाजल्या पण मला तळलेलयाच आवडल्या.

ही भाजी म्हणजे ऐत्यावेळी काही भाजी नसेल किंवा काही सुचले नाही की मी करते.सगळ्यान आवडते व पट्कन होते.बटाटे व फ्रोजन मटार उपलब्ध असले की झाले.ताजे मटार असतील तर जास्तच छान!

साहीत्य :-

1) उकडलेले बटाटे 4नग
2) वाफविलेले मटार अर्धी वाटी
3) लाल टमाटा  1
4) मोठा कांदा 1
5) आले लसूण मिरची पेस्ट आवडीप्रमाणे
6) लाल मिरची पावडर
7) मीठ,साखर
8) गरम मसाला किंवा मॅगी मसाला
9) फोडणी साहीत्य
10) तेल
11) गरजेनुसार पाणी
12) कोथंबीर

कृती :-

     प्रथम कांदा व टोमॅटो मोठे कापून मिक्सरला पेस्ट करून घ्या.उकडलेला बटाटा कापून घ्या.

नंतर पॅनमध्ये तेल गरम करून फोडणी करा.त्यात कांदा टोमॅटो पेस्ट, मिरची लसूण आले घालून चांगले तेल सुटेपर्यंत परतावे. परतत आले की त्यात ह्ळद, मिरचीपूड घालावी.नंतर त्यात बटाट्याच्या फोडी व मटार घाला.मसाला,(मी मॅगी मसाला वापरला),मीठ व चवीला चिमूटभर साखर घाला.नीट हलवून गरजेइतके पाणी घालावे.दाटसरच ठेवा. दाट होण्यासाठी काही बटाट्याच्या फोडी चुरडाव्यात. आता एक ऊकळी काढा.

आता तयार भाजी ,वरून कोथंबिर घालून गरमा-गरम पोळी किंवा पुरी बरोबर वाढा.

साहित्य :-

1) उकडलेले मक्याचे दाणे - १ कप 
2) कापलेला कांदा - १/२ कप 
3) बेसन १/४ कप 
4) तांदुळाचे पीठ- २ टीस्पून 
5) आलं - १ इंचाचा तुकडा 
6) मिरच्या- ३ ते ४ 
7) जिरे पूड- १  टीस्पून 
8) धणे  पूड- १  टीस्पून 
9) हळद- १/२  टीस्पून 
10) हिंग- १/२  टीस्पून 
11) चिरलेली कोथिंबीर - १/४ कप 
12) मीठ चवीनुसार 
13) तेल- तळण्यासाठी

कृती :-

प्रथम मक्याचे दाणे , मिरची आणि आले मिक्सरमध्ये पाणी न घालता भरड वाटा. फूड प्रोसेसर मधे जास्त चांगले वाटले जाते.

आता वाटलेल्या मिश्रणात कांदा, कोथिंबीर, वरील सर्व मसाले, बेसन,तांदुळाचे पीठ, मीठ आणि आवश्यकतेनुसार थोडे पाणी टाकून सर्व एकत्र करा. 

नंतर गरम तेलामधे लहान लहान भजी तळुन घ्या. गरमागरम भजी टोमॅटो केचप किंवा कुठल्याही चटणीसोबत खायला द्या.

संध्याकाळचे वेळी मुलांना काहीतरी चटपटीत खायला हवे असते.सहाजिकच आहे सकाळी उठले की दूध मग गडबडीत नेहमीचाच पोटभरीचा नाष्टा व पोळीभाजीचा टीफीन !मग संध्याकाळी मात्र काहीतरी नविन पाहीजे असते. तर मग हे बीटरूट हार्ट ट्राय करा.कसे करायचे पहा

साहीत्य :-

1) पातळ पोहे 2 वाट्या
2) बीटाचा किस 1वाटी
3) मिठ चविनूसार
4) हिरवी मिरची,आले,लसूण पेस्ट एक टीस्पून
5) आमचूर पावडर  ऐच्छीक
6) गरम मसाला 1चमचा
7) ब्रेडक्रम्स किंवा काॅर्नफ्लोअर दोन टेबलस्पून
8) तेल

कृती :-

        प्रथम पातळ पोहे धुवून चाळणीत पाणी निथळण्यास ठेवावे.

बीट साल काढून बारीक किसणीवर किसून घ्यावे.

नंतर वर आधि भिजवून ठेवलेले पोहे चांगले मळून घ्यावेत.

आता त्यामधे किसलेले बीट,मीठ,गरम मसाला,मिरची आले लसूण पेस्ट काॅर्नफ्लोअर घालून परत एकदा नीट मळून मिक्स करून गोळा तयार करावा.

आता तयार पीठाचे लहान गोळे करून घ्यावेत व पोळी लाटावी.साच्याने लहान-लहान बदामाचे आकार कापून घ्यावेत.गरम तेलात तळावे.

थोडे थंड झाले की एकदम खुसखूषीत होतात लगेच साॅस सोबत सर्व्ह करा.अथवा नूसतेही चहा बरोबर देता येतात.

टीप :- फार गार होऊ देऊ नयेत.भजीप्रमाणे गार झाले की मऊ पडतात.म्हणून लगेचच संपवावेत.

आजकाल स्वीटकाॅर्न ( गोड मक्याची कणसे) बाजारात भरपूर प्रमाणात येतात.मक्याचा अनेक प्रकारानी आहारात वापर करता येतो.तसेच मका पौष्टीक पण असतो व पोटभरीचा पण! मक्याचे सूप जर एक बाऊल प्यायले तर एखादे रात्रीचे जेवण नाही घेतले तरी चालते.पोट भरते.तर हे सूप कसे करायचे ते पहा.

साहीत्य :-

1) मक्याचे दाणे वाफवलेले 2 वाट्या
2) गाजर जाड किसून एक
3) सिमला मिरची बारीक चिरून
4) कांदापात बारीक चिरून
5) बिन्स (सर्व भाज्या मिळून एक वाटी)
6) आले-लसूण बारीक चिरून ऐच्छिक
7) मिठ,मिरपूड चवीनुसार
8) बटर एक टेस्पून
9) काॅर्न फ्लोअर 2 टेबलस्पून
10) पाणी 4 वाट्या

कृती :-

प्रथम पॅनमधे बटर गरम करावे व आले,लसूण परतावे. त्यावर भाज्या टाकून थोडे परतून पाणी घाला.

पाण्याला ऊकळी येईपर्यंत मका अर्धी वाटी तसाचा बाजूला ठेउन बाकीचा मिक्सरवर भरड वाटून घ्या.

आता उकळलेल्या पाण्यात वाटलेली पेस्ट व काॅर्नफ्लोअर थोड्या पाण्यात मिक्स करून आणि अख्खा बाजूला ठेवलेला मका सर्व  मिसळावे.मिरपूड, मिठ घालावे व एक उकळी येऊ द्यावे.

गरभा-गरम सर्व्ह करावे.