सुटा सुकामेवा मुले आवडीने खात नाहीत. परंतु हाच सुकामेवा, खोबरे, डिंक घालून लाडू केले तर लगेच फस्त करतात. तसेच पौष्टीक पण झाले. मी दिवाळीच्या फराळामधेही आवर्जून करते. कसे करायचे साहित्य व कृती पहा,

साहित्य :-
१) किसलेले सुके खोबरे १ १/२  वाट्या
२) खारीक पावडर  १ वाटी
३) खाण्याचा डिंक  १/२ वाटी
४) खसखस २ टीस्पून
४) वेलची पूड २ टीस्पून
५) जायफळ पावडर  १ टीस्पून
६) सुका मेवा काप १/२ वाटी (बदाम,काजू,पिस्ते,मनुका,बेदाणे सर्व मिक्स)
७) गूळ  २ वाट्या
८) शुद्ध तूप १ वाटी
९ ) डेसिकेटेड कोकोनट २ चमचे

कृती :-
प्रथम कोरड्या कढई मध्ये खसखस भाजून घ्यावी.नंतर खोबर्‍याचा कीस भाजावा.दोन्ही कोरड्या वस्तु भाजूनटख झाल्यावर एका प्लेट मध्ये काढून ठेवाव्यात.

नंतर त्याच कढई मध्ये तूप घालावे व तूप गरम झाले की,थोडा-थोडा डिंक टाकून तळून त्याची लाही फुलवून घ्यावी व कडेला काढून ठेवावी. बदाम,काजू,पिस्ते तळून घ्यावेत.शेवटी राहिलेल्या तुपामध्ये खारीक पावडर भाजून घ्यावी.

वरील भाजलेली खसखस थोडी कूट करून घ्यावी.( नाही केले तरी चालते पण कुटली तर खमंग वास येतो). खोबरे व डिंक हातानेच थोडे चुरावे.

आता सर्व भाजलेले साहित्य ,सुकामेवा व जायफळ वेलचीची पूड  मिसळावे, व नीट एकत्र करावे व मिश्रण तयार करावे.

दुसर्‍या एका भांड्यामडे गूळ घ्यावा व दोनच चमचे पाणी घालावे. पातेले गॅसवर ठेवावे व सतत ढवळत रहावे. गूळ वितळून वर आला की गॅस बंद करावा.(पाक करू नये) झटपट सर्व तयार केलेले कोरडे मिश्रण त्यामध्ये घालावे व नीट हलवावे. मिश्रण गरम -गरम असेपर्यंतच झटपट हव्या त्या साईजचे लाडू वळावेत व प्रत्येक लाडू वळल्यावर डेसिकेटेड कोकोनट मध्ये घोळवावा व कडेला ठेवावा.

हे लाडू खूप पौष्टिक असतात.बाळंतीण बाईसाठी खास बनविले जातात.त्यामुळं दूध जास्त येते.

टीप : गुळाऐवजी साखर पण वापरतात.साखरेचा एकतारी पाक बनवावा व नंतर सर्व साहित्य घालावे.पण पौष्टिकतेचा विचार करता ,उपलब्ध असेल तर गुळच वापरावा.  

आपल्या मौल्यवान सूचना व अभिप्राय, आम्हाला ज़रूर द्या. आपल्या प्रतिसादाने नव-नवीन पदार्थ करण्यास प्रेरणा मिळते

साहित्य ::

* कच्चे शेंगदाणे १ वाटी
* चणा डाळीचे पीठ १/४ वाटी
* तांदुळाचे पीठ १ टीस्पून
* गरम मसाला लहान १/२ टीस्पून
* धना-जिरा पावडर १/२ टीस्पून
* आमचूर पावडर १/४ टीस्पून
* चाट मसाला १ टीस्पून
* लाल मिरची पूड,मीठ ,चवीनुसार
* हळद,हिंग आवडिनुसार
* तेल १-२ टेस्पून (ऐच्छीक)
* पाणी गरजेनुसार
* सोडा चिमुट भर

कृती::

प्रथम एका बाउल मध्ये चणा डाळीचे पीठ व तांदुळाचे पीठ घ्यावे. त्यामध्ये वरील सर्व मसाला, सोडा व शेवटी तेल मिसळावे.सर्व मिश्रण कोरडेच ठेवावे.

नंतर शेंगदाणे बुडतील एवढे पाणी घालावे व लगेच पाणी चाळणीत शेंगदाणे ओतून काढून टाकावे.शेंगदाणे ओले करणे एवढाच हेतु आहे.

आता ओले झालेले शेंगदाणे वरील कोरड्या मिश्रणा मध्ये घालावेत .म्हणजे कोरडे पीठ शेंगदाण्याला चिकटेल.सर्व नीट कालवावे. तळाला पीठ कोरडे राहिले तर ,हाताने दोन चमचे पाणी शिपडावे .म्हणजे पूर्ण पीठ शेंगदाण्याला लपेटले जाईल.

आता पीठात घोळवलेले शेंगदाणे मायक्रोवेव ट्रे मधे पसरून ठेवावेत व हाय पाँवरला ४ मिनिट ठेवावेत. मधेच एकदा हलवावेत नाहीतर एकाच बाजूने भाजले जातात. थंड होऊ द्यावेत म्हणजे कुरकुरीत होतात. कुरकूरीत शेंगदाणे हवाबंद डब्यात भरून ठेवा.

असे खमंग व कुरकुरीत शेंगदाणे चहा बरोबर किंवा एरवी सुध्दा मधेच तोंडामध्ये टाकायला छान लागतात.

टिप्स :-
* पीठामधे तेल नाही घातले तरी चालते. तेल घातले तर रंग थोडा उठावदार दिसतो इतकेच.

* पीठामधे घोळवलेले शेंगदाणे गरम तेलामध्ये मंद आचेवर तळले तरी चालतात .तळून टिश्यू पेपर वर काढवेत.थंड होऊ द्यावेत म्हणजे कुरकुरीत होतात.
मी ओवन मधे केले.

* आवडीनुसार मसाल्यामधे आलं-लसूण पेस्ट पण वापरली तरी चालते.

आपल्या प्रतिसादाने नविन गोष्टी करण्यास प्रेरणा मिळते. आपल्या मौल्यवान सूचना व अभिप्राय, आम्हाला ज़रूर द्या.